Kuma 16

Ngai Ainenga Andũ ma Ĩsilaeli Lĩu weetawa Mana

1Andũ onthe ma Ĩsilaeli nĩmambĩĩie kyalo kuma Elimu, na mũthenyanĩ wa ĩkũmi na itano wa mwei wa kelĩ ĩtina wa kuma Misili, nĩmavikie weũnĩ wĩtawa Sini, naw'o wĩ katĩ wa Elimu na Kĩĩma kya Sinaĩ. 2Me kũu weũnĩ nĩmambĩĩie kũnyungunyĩsya kũla kwĩ Mwose na Alũni, 3na kũmea atĩĩ, “Twenda kethĩwa Mwĩai Ngai anatũaĩie nthĩ ya Misili kũla tũnekalaa twĩlingĩlĩte mbisũ syĩ nyama na kũĩsaa lĩu mwingĩ ũndũ tũkwenda; ĩndĩ inyw'ĩ mũnatũetie kũũ weũnĩ mũtũae ithyonthe na nzaa.”

4 # Yoa 6.31 Mwĩai Ngai nĩweeie Mwose atĩĩ, “Nĩngũmũetee mĩkate kuma ĩtunĩ ta mbua. Andũ makaumaalaa kĩla mũthenya na kũkolany'a ĩla ĩmeanĩe mũthenyanĩ ũsu. Kwa nzĩa ĩsu nĩngũmatata nĩsisye kana nĩmatonya kwĩka ũndũ mĩao yakwa ĩkwasya. 5Mũthenyanĩ wa thanthatũ nĩmakolanasye ĩla meũkua yĩ kũndũ kwĩlĩ kwa ĩla makolanasya mĩthenyanĩ ĩla ĩngĩ.”

6Kwoou Mwose na Alũni nĩmeeie andũ onthe ma Ĩsilaeli atĩĩ, “Ĩa mawĩoo nĩmũũmanya kana Mwĩai Ngai nĩwe wamumisye nthĩ ya Misili. 7Kwakya mũkoona ũtheu mũtisu wa Ngai nĩkwĩthĩwa nĩwĩw'ĩte mũinyungunyĩsya ĩũlũ wake. Ithyĩ twĩ aaũ? Kũnyungunyĩsya kwenyu ti ĩũlũ witũ ĩndĩ nĩ ĩũlũ wa Mwĩai Ngai.” 8Kwoou Mwose nĩwameie atĩĩ, “Mwĩai Ngai nĩwe wĩmũnengae nyama ĩa mawĩoo na kwakya aimũnenga mĩkate mũye ũndũ mũkwenda; nĩwĩw'ĩte ũndũ mwĩthĩĩtwe mũinyungunyĩsya kũla ũĩ. Ithyĩ twĩ aaũ? Yĩla mwanyungunyĩsya kũla tũĩ, mwĩthĩawa kwa w'o mũinyungunyĩsya kũla kwĩ Mwĩai Ngai.”

9Mwose nĩweeie Alũni atĩĩ, “Tavya andũ onthe moke maũngame mbee wa Mwĩai Ngai nũndũ nĩwĩw'ĩte kũnyungunyĩsya kwoo.” 10Alũni aendee kũneena na andũ onthe ma Ĩsilaeli, nĩmavĩndũkie masisya weũnĩ na moona ũtheu mũtisu wa Mwĩai Ngai wĩ nthĩnĩ wa kĩla kĩtuĩ kya mũumbĩ. 11Mwĩai Ngai nĩweeie Mwose atĩĩ, 12“Nĩnĩw'ĩte kũnyungunyĩsya kwa andũ ma Ĩsilaeli; matavye ũmee atĩĩ, ‘Ĩa mawĩoo nĩmekwĩsa kũya nyama, na kwakya makaya mĩkate ũndũ mekwenda. Nĩvo ĩndĩ mwĩmanya kana ninyie Mwĩai Ngai, Ngai wenyu.’ ”

13Masaanĩ ma ĩa mawĩoo, nyũnyi syĩtawa ngwae nĩsyookie syausũa kũu kw'onthe kũla mambĩte maeema. Kwakya nĩkweethĩiwe kwĩ ĩmwe yingĩ kĩla vandũ. 14Ĩmwe yĩu nĩyanyiaie, na kũu nthĩ nĩkweethĩiwe twĩndũ tũtheke ta ĩa yĩvalũkangĩte kũu weũnĩ. 15#1Ako 10.3 Yĩla andũ ma Ĩsilaeli matwonie, nĩmakũlanilye, “Tũũ nĩ twaũ?” Nũndũ mayaamanya kĩu nĩ kyaũ.

Mwose nĩwamasũngĩie amea atĩĩ, “Ũũ nĩ lĩu ũla Mwĩai Ngai wamũetee mũye. 16Mwĩai Ngai nĩwĩyĩaĩte nĩ kana kĩla mũndũ akolany'e kwĩanana na ũndũ ũtonya kũya akavũna; mũkeve wa kĩlo ilĩ ũtũmĩwe nĩ mũndũ ũmwe nthĩnĩ wa kĩla ĩeema.”

17Andũ ma Ĩsilaeli nĩmeekie ũu; amwe nĩmakolanilye lĩu mwingĩ na angĩ mũnini. 18#2Ako 8.15 Mathima nĩmeethĩie kana ala makolanĩtye mwingĩ mayaĩ na ũmwe ũthonokete vata woo. O ta ũu ala makolanĩtye mũnini mayaaĩthĩwa na vata wa ũngĩ. Kĩla ũmwe akolanasya ũla ũtonya kũya akavũna. 19Mwose nĩwameie atĩĩ, “Vaikethĩwe mũndũ o na ũmwe ũtialya lĩu ũsu ũvike kwakya.” 20Ĩndĩ amwe moo mayaaĩthukĩĩsya Mwose na kwoou maia lĩu ũmwe. Ũnĩ ũsu kwakya, wausĩe iinyũ na wanyungaa naĩ mũno, na Mwose athatw'a nĩmo. 21Kĩla kwakya nĩmakolanasya kwĩanana na ũndũ mũndũ ũtonya kũya akavũna; syũa yavyũva ũla watiawa kũu nthĩ nĩwatwekaa ũkathela.

22Mũthenyanĩ wa thanthatũ nĩmakolanilye lĩu kũndũ kwĩlĩ, kĩlo inya kwa kĩla mũndũ. Atongoi onthe ma andũ asu nĩmookie matavya Mwose ũndũ ũsu, 23#Kuma 20.8-11 nake amea atĩĩ, “Mwĩai Ngai nĩwĩyĩaĩte nĩ kana ũnĩ wĩĩthĩwa mũthenya mũtheu ũvathĩtwe kwondũ wake. Ũmũnthĩ uai kana mũtheũkye lĩu ũla mũkwenda. Kĩla kĩũtiala kyaĩlĩte kwiwa na kũsũvĩwa kĩtũmĩwa ũnĩ.” 24Kwĩanana na ũndũ Mwose wameaĩe, nĩmaiie kĩla kyatialile nginya ũnĩ ũsu; kĩyaanangĩka kana kũlikwa nĩ iinyũ. 25Mwose nĩwameie atĩĩ, “Yai lĩu ũũ ũmũnthĩ, nĩkwĩthĩwa ũmũnthĩ nĩ Savato ũvathĩtwe kwondũ wa Mwĩai Ngai; mũyĩĩthĩwa mũtonya kũkwata lĩu ũngĩ nza wa maeema. 26No nginya mũkolanasye lĩu mĩthenyanĩ ĩsu thanthatũ, ĩndĩ mũthenya wa mũonza, ũla nĩ mũthenya wa Savato, vaikethĩawa kĩndũ.”

27Mũthenyanĩ wa mũonza andũ amwe nĩmaendie makakolany'e lĩu, ĩndĩ mayaaĩthĩa kĩndũ. 28Mwĩai Ngai nĩwakũlilye Mwose atĩĩ, “Mwĩĩkala ĩvinda yĩana ata mũtekwĩka ũndũ mĩao na momanyĩsyo makwa mekwasya? 29Lilikanai kana nyie Mwĩai Ngai, nĩnĩmũnengete mũthenya wa kũthũmũa, na kĩu nĩkyo kĩtumi mũthenyanĩ wa thanthatũ nĩmũnengae lĩu wa mĩthenya ĩlĩ. Mũthenyanĩ wa mũonza kĩla mũndũ nĩekalae vala wĩkalaa na ndakaume kwake.” 30Kwoou andũ asu nĩmathũmũaa mũthenyanĩ wa mũonza.

31 # Mot 11.7-8 Andũ ma Ĩsilaeli nĩmeetie lĩu ũsu mana. Wailyĩ tũveke tũnini tweũ, na wasamaa tũmĩkate tũvũthũ twĩkĩĩtwe ũkĩ wa nzũkĩ. 32Mwose nĩwameie atĩĩ, “Mwĩai Ngai nũtwĩaĩĩte twose lĩu ũmwe wa mana twie kwondũ wa nzyawa sitũ nĩ kana syonae lĩu ũla watũnengae tũkaya twĩ weũnĩ yĩla watumisye nthĩ ya Misili.” 33#Aevl 9.4 Mwose nĩweeie Alũni atĩĩ, “Osa mũkeve mũnene wĩkĩe kĩlo ilĩ sya lĩu wa mana, na ũiwia mbee wa Mwĩai Ngai kwondũ wa nzyawa sitũ.” 34Kwĩanana na ũndũ Mwĩai Ngai weeaĩie Mwose, Alũni nĩwaiie lĩu ũsu mbee wa Ĩsandũkũ ya Ũtianĩo nĩ kana mana ĩsu yĩkalae vau. 35#Yos 5.12 Andũ ma Ĩsilaeli nĩmaĩe mana ĩsu vandũ va myaka mĩongo ĩna nginya mavika nthĩ ya Kanaani vala matũie. 36(Kĩthimo kĩla kyatũmĩkaa ĩvindanĩ yĩu kya kũthima lĩu wa mbaa mbeke nĩ ũndũ ũmwe na kĩlo mĩongo ĩlĩ.)

Currently Selected:

Kuma 16: KAMBA

Highlight

Compare

Copy