Kuma 18

Yethilo Aithokea Mwose

1Yethilo mũthembi wa Mitiani, ũla waĩ mũthoni wa Mwose nĩweewie maũndũ onthe ala Ngai weekĩte kwondũ wa Mwose na andũ ma Ĩsilaeli, na ũndũ wamaumisye nthĩ ya Misili. 2#Kuma 2.21-22 Mũthoni wa Mwose nĩwoosete Nzivola mũka wa Mwose, ũla Mwose waĩ anamũtũnga akekale kwa ĩthe, 3#Meko 7.29 vamwe na syana syake ilĩ sya aũme nasyo nĩ Ngelisomu na Elieseli. (Mwose nĩwaĩtye atĩĩ, “Nĩthĩĩtwe ngĩkala ta mũeni nthĩ ya ũeninĩ,” kwoou nĩwaĩ anatw'ĩĩa ũmwe wa syana isu syake sya aũme ĩsyĩtwa akamwĩta Ngelisomu.#18.3 Ngelisomu: Sisya Kuma 2.22 4O ta ũu nĩwaisye ĩngĩ, “Ngai wa ĩthe wakwa nĩwandethisye na anzũvĩa ndikoawe nĩ mũsumbĩ wa Misili,” kwoou nĩwaĩ anatw'ĩĩa mwana wake ũla ũngĩ ĩsyĩtwa akamwĩta Elieseli.#18.4 Elieseli: Ũalyũlo wa ĩsyĩtwa yĩĩ nĩ Ngai nũndetheeasya) 5Yethilo nĩwaendie e na mũka wa Mwose na syana syoo syelĩ, nginya mavika weũnĩ vala Mwose wambĩte maeema kĩĩmanĩ kya Ngai. 6Nĩwatũmanĩte kũla kwĩ Mwose akasya nĩewe kana nĩmokĩte. 7Mwose nĩwaumaalile akathaũe mũthoni; nĩwakumanie mbee wake na amũkethya na ngethi ya wendo. Kĩla ũmwe nĩwakũlilye ũla ũngĩ ũndũ ũtwĩe na ĩndĩ malika ĩeemanĩ. 8Mwose nĩwatavisye mũthoni wake maũndũ onthe, ala Mwĩai Ngai weekie mũsumbĩ wa Misili na andũ make, nĩ kana ovosye andũ ma Ĩsilaeli. O ta ũu nĩwamũtavisye ĩũlũ wa mathĩna ala andũ ma Ĩsilaeli makwatie me nzĩanĩ, na ũndũ Mwĩai Ngai wamavonokisye. 9Yethilo nĩwatanie nũndũ wa maũndũ onthe maseo ala Mwĩai Ngai weekĩte andũ ma Ĩsilaeli, nũndũ nĩwamavonoketye kuma ũtonyinĩ wa andũ ma Misili. 10Nĩvo ĩndĩ Yethilo waisye atĩĩ, “Mwĩai Ngai nĩataĩwe ũla ũmũvonoketye kuma ũtonyinĩ wa mũsumbĩ wa Misili, na wa andũ make! Mwĩai Ngai nĩataĩwe ũla ũvonoketye andũ make kuma ũkombonĩ. 11Yu nĩnĩsĩ kana Mwĩai Ngai e ũtonyi kwĩ ngai syonthe, nĩkwĩthĩwa avonoketye andũ ma Ĩsilaeli kuma ũtonyinĩ wa andũ ma Misili ala mamang'endeaa.” 12Nĩvo ĩndĩ Yethilo waumĩisye Ngai nthembo ya kũvĩvw'a na nthembo ingĩ. Alũni na atongoi onthe ma andũ ma Ĩsilaeli nĩmaendanisye nake makaye lĩu me mbee wa Ngai.

Kũnyuvwa kwa Asili

(Kũt 1.9-18)

13Ũnĩ ũsu Mwose nĩwasilanasya makoani katĩ wa andũ; nĩweethĩiwe aisilany'a andũ aingĩ mũno kuma kĩoko nginya mawĩoo. 14Yĩla mũthoni wake woonie ũndũ ũkwĩkana na andũ nĩwamũkũlilye atĩĩ, “Ũndũ ũũ nĩ mwaũ ũkwĩkana na andũ? Nĩkĩ ũũthũkũma wĩ weka, na andũ mayĩũngama vaa meteelete ũkwona kuma kĩoko nginya mawĩoo?”

15Mwose amũsũngĩa amwĩa atĩĩ, “Nĩkaa ũu nũndũ andũ nĩmokaa kũmbona nĩ kana nĩmatavye kwenda kwa Ngai. 16Yĩla andũ meethĩwa na ngananĩo, nĩmokaa kwakwa nakwa ngĩsilany'a katĩ woo, na kũmatavya motw'ĩo na mĩao ya Ngai.”

17Yethilo nĩweeie Mwose atĩĩ, “Ũndũ ũũ ũkwĩka ti mũseo. 18We vamwe na andũ aa nĩmũũnoa mũno, nũndũ wĩa ũũ nũthonokete vinya waku na ndũũtonya wĩ weka. 19Kwa mbĩthukĩĩsye yu ngũtae na Ngai nĩethĩwe vamwe naku. Ũkaũngamaa vandũ va andũ mbee wa Ngai, na kũmũtavasya maũndũ moo. 20Nĩwaĩlĩte kũmamanyĩsya motw'ĩo na mĩao ya Ngai, na kũmaelesya ĩũlũ wa mwĩkalo ũla maĩlĩte kwĩthĩwa naw'o na kĩla maĩlĩte kwĩka. 21Ũu wĩ o vo, nyuva andũ matonya kwĩthĩwa me atongoi kuma andũnĩ ala angĩ, andũ me na kĩkĩo kya Ngai, aĩkĩĩku na matosaa ĩtuvi ya wendeesyo. Andũ asu matw'ĩkĩthye atongoi ma ikundi sya andũ ngili, ĩana, mĩongo ĩtano, na ingĩ sya andũ ĩkũmi. 22Nĩmasilanasye andũ kĩla ĩvinda. Ũndũ ũla wĩ vinya makakũeteae, ĩndĩ maũndũ ala angĩ makaumasya ũtw'ĩo wamo. Kwoou maũndũ makeethĩwa me laisi kwaku nũndũ andũ asu makatetheanĩasya maũndũ naku. 23Ethĩwa ũkeeka ũu kwĩanana na ũndũ Ngai ũkũkwĩaĩa, ũkeethĩwa ũtonya kũmĩĩsya ũito wa wĩa, namo andũ aa onthe makenũkaa me eanĩe.”

24Kwoou Mwose nĩweethukĩĩisye ũndũ mũthoni wake wamũtavisye, na eeka maũndũ asu onthe. 25Nĩwanyuvie andũ mena ũtonyi kuma andũnĩ onthe ma Ĩsilaeli, maũngamĩe ikundi sya andũ ngili, ĩana, mĩongo ĩtano, na ingĩ sya andũ ĩkũmi. 26Nĩmathũkũmaa ta asili ma andũ kĩla ĩvinda. Maũndũ ala me vinya, nĩmaeteae Mwose, na ala angĩ me laisi mayumya ũtw'ĩo nemo.

27Mwose nĩwataanĩisye na mũthoni wake na asyoka nthĩ ĩla yaĩ yake.

Currently Selected:

Kuma 18: KAMBA

Highlight

Compare

Copy