Kuma 19

Andũ ma Ĩsilaeli me Kĩĩmanĩ kya Sinaĩ

1Andũ ma Ĩsilaeli nĩmavikie weũnĩ wa Sinaĩ mũthenyanĩ wa mbee wa mwei wa katatũ, ĩtina wa kuma nthĩ ya Misili. 2Yĩla maumie Levitimu mathi kũvika weũnĩ wa Sinaĩ, nĩmaakie maeema vakuvĩ na Kĩĩma kya Sinaĩ. 3Mwose nĩwambatie kĩĩmanĩ kĩu akakomane na Ngai.

Mwĩai Ngai nĩweetie Mwose kuma kĩĩmanĩ na amwĩa atĩĩ, “Ũũ nĩw'o waĩlĩte kũtavya nzyawa sya Yakovo, andũ ma Ĩsilaeli, 4‘Nĩmwonete ũndũ nyie Mwĩai Ngai neekie andũ ma Misili, na ũndũ namũkuie o tondũ ndiũ ĩkuaa tũswii twayo nthwaunĩ syayo na namũete vala nĩĩ. 5#Kũt 4.20; 7.6; 14.2; 26.18; Tito 2.14 #1Vet 2.9 Kwoou ethĩwa mũkeethukĩĩasya ũndũ ngũmũtavya na kwĩanĩasya ũtianĩo wakwa, mũkeethĩwa andũ makwa. Nthĩ yonthe nĩ yakwa, ĩndĩ inyw'ĩ mũkatw'ĩwa andũ makwa anyuve. 6#Ũvu 1.6; 5.10 Mũkeethĩwa andũ mavathĩtwe methĩwe makwa mwene, na mũkanthũkũmaa ta athembi. Isu nĩsyo ndeto ila ũũthi kũtavya andũ ma Ĩsilaeli.’ ” 7Kwoou Mwose nĩwatheeie kuma kĩĩmanĩ, na oombany'a atongoi onthe ma andũ, na amatavya ũndũ Mwĩai Ngai wamwĩaĩe. 8Andũ onthe nĩmasũngĩie vamwe masya atĩĩ, “Nĩtũkwĩka maũndũ asu onthe Mwĩai Ngai ũneenete,” nake Mwose atavya Mwĩai Ngai ũsũngĩo wa andũ asu.

9Mwĩai Ngai nĩweeie Mwose atĩĩ, “Nĩngũka vala ũĩ nĩ nthĩnĩ wa mũumbĩ mũkamu, nĩ kana andũ mew'e ngĩneena naku na makakũĩkĩaa kuma yu kũendeea na mbee.”

Mwose nĩwatavisye Mwĩai Ngai ũndũ andũ maisye, 10na Mwĩai Ngai amwĩa atĩĩ, “Enda kũla kwĩ andũ ũkamatavye nĩmethesye ũmũnthĩ na ũnĩ. Matavye ũmee no nginya mathesye ngũa syoo, 11na kwĩyũmbanĩsya mũthenya wa katatũ. Mũthenyanĩ ũsu nyie Mwĩai Ngai ngooka Kĩĩmanĩ kya Sinaĩ andũ onthe mene. 12#Ũvu 1.6; 5.10 Naku ĩkĩa mũvaka kũthyũlũlũka kĩĩma kĩu na ũimea, ‘Ĩsũvĩei mũikese kwambata kĩĩmanĩ ĩũlũ kana kũkinya mũvaka wakyo. Ũla wĩkinya kĩĩmanĩ kĩu, akooawa. 13Ũla wĩkĩkinya akakimangwa na mavia kana kũathwa na maangi; ndakathengeewa nĩ mũndũ, na ndakaekwa ekale thayũ o na ethĩwa nĩ nyamũ kana mũndũ. Yĩla soo wĩvuvwa ĩvinda ĩasa, now'o meĩtĩkĩlw'a kwambata kĩĩmanĩ kĩu.’

14“Ĩtina wa Mwose kũtheea kuma kĩĩmanĩ, nĩwaendie kũla kwĩ andũ na amea methesye, na kwoou nĩmatheisye ngũa syoo.” 15Nĩvo ĩndĩ Mwose wasyokie amea atĩĩ, “Ĩyũmbanĩsyei mũthenya wa katatũ, na ĩvindanĩ yĩĩ mũikamanyane kĩ-mwĩĩ na mũndũ mũka.”

16 # Ũvu 4.5 #Kũt 4.11-12 Mũthenyanĩ wa katatũ kwakya nĩkweethĩiwe kĩtandalĩki na ũtisi. Mũumbĩ mũkamu nĩwaumĩlile kĩĩmanĩ ĩũlũ, na kweew'ĩka wasya mũnene wa soo. Andũ onthe ala maĩ mwakonĩ wa maeema nĩmatetemie nĩ w'ĩa. 17Mwose nĩwatongoeisye andũ asu mauma maeemanĩ mathi makakomane na Ngai. Nĩmaũngamie vakuvĩ na kĩĩma kĩu. 18Kĩĩma kya Sinaĩ kyonthe nĩkyavw'ĩkiwe nĩ syũki, nũndũ Mwĩai Ngai nĩwatheeie ĩũlũ wakyo e nthĩnĩ wa mwaki. Syũki yĩla yaumaa vo nĩyambatie ta syũki ya ndumbĩa, na kĩĩma kĩu kyonthe kyatetema mũno. 19Ũla wasya wa soo nĩwaendeeie kwongeleka, na Mwose aneena, nake Ngai amũsũngĩa na wasya mũnene. 20Nĩvo ĩndĩ Mwĩai Ngai watheeie Kĩĩmanĩ kĩu kya Sinaĩ ĩũlũ, na eeta Mwose athi vau ũĩ. Kwoou Mwose nĩwambatie vo, 21na Mwĩai Ngai amwĩa atĩĩ, “Theea ũkakany'e andũ nĩ kana maikakĩle ũla mũvaka moke kũmbona; maũkĩla, aingĩ moo nĩmeũkw'a. 22O ta ũu, athembi ala mekũka vakuvĩ nakwa no nginya methesye, ethĩwa ti ũu ngamakany'a.”

23Mwose nĩweeie Mwĩai Ngai atĩĩ, “Andũ asu maitonya kwambata kĩĩmanĩ ĩũlũ, nũndũ we mwene ũnatũkanisye watwĩa, ‘Ĩkĩai mũvaka kũthyũlũlũka kĩĩma na kũkĩvatha kĩthĩwe kĩtheu.’ ”

24Nĩvo ĩndĩ Mwĩai Ngai weeie Mwose atĩĩ, “Theea ũkoke wĩ na Alũni. Ĩndĩ athembi na andũ maikakĩle mũvaka mokĩte kũla nĩĩ ndikese kũmakany'a.” 25Kwoou Mwose nĩwatheeie kũla kwĩ andũ, na amatavya ũndũ Mwĩai Ngai wasya.

Currently Selected:

Kuma 19: KAMBA

Highlight

Compare

Copy