Kuma 20

Mĩao Ĩkũmi

(Kũt 5.1-21)

1Ngai nĩwaneenie ndeto ii syonthe ayasya atĩĩ, 2“Nyie ninyie Mwĩai Ngai, Ngai waku ũla wakumisye nthĩ ya Misili, kũla wekalaa wĩ ngombo.

3“Ndũkethĩwe na ngai ingĩ ate o nyie.

4 # Kuma 34.17; Ali 19.4; 26.1; Kũt 4.15-18; 27.15 “Ndũkeseũvĩsye mũvw'anano wa kwasũvya, kana mũvw'ano wa kĩndũ o na kĩva kĩ ĩũlũ ĩtunĩ, kĩ kũũ nthĩ, kana kĩ kĩw'ũnĩ ungu wa nthĩ. 5#Kuma 34.6-7; Mot 14.18; Kũt 7.9-10 Ndũkathaithe mũvw'anano o na wĩva kana kũũthũkũma, nũndũ ninyie Mwĩai Ngai, Ngai waku na ndyĩtĩkĩla kũthaithanĩw'a na ngai ĩngĩ. Nĩnganasya ala matambendete na nzyawa syoo, o na kũthi kũvika nzyawa ya katatũ na ya kana. 6Ĩndĩ ala mambendete na mekaa ũndũ mĩao yakwa ĩkwasya, nĩnĩmonasya wendo kũthi kũvika nzyawa ngili mbingĩ.

7 # Ali 19.12 “Ndũkawete ĩsyĩtwa yakwa mana, nũndũ nyie Mwĩai Ngai ndikalea kũkany'a mũndũ ũla ũwetaa ĩsyĩtwa yakwa mana.

8 # Kuma 16.23-30; 31.12-14 “Lilikana mũthenya wa Savato ũwĩkalye wĩ mũtheu. 9#Kuma 23.12; 31.15; 34.21; 35.2; Ali 23.3 Wĩna mĩthenya thanthatũ ya kũtethya wĩa waku, 10ĩndĩ mũthenya wa mũonza nĩ mũthenya wa kũthũmũa, ũvathĩtwe kwondũ wakwa nyie Mwĩai Ngai. Mũthenyanĩ ũsu ndũkatethye wĩa o na ũmwe; we mwene, mwana waku, mwĩĩtu waku, mũthũkũmi waku wa mũndũ-ũme kana wa mũndũ mũka, indo syaku, kana mũeni ũla wĩ kwaku. 11#Mwa 2.1-3; Kuma 31.17 Mĩthenyanĩ thanthatũ nyie Mwĩai Ngai nĩnoombie ĩtu na nthĩ, ũkanga na syĩndũ syonthe ila syĩ nthĩnĩ wasyo, na ĩndĩ nathũmũa mũthenyanĩ wa mũonza. Kwoou nyie Mwĩai Ngai nĩnaũathimie mũthenya wa Savato na naũvatha wĩthĩwe wĩ mũtheu.

12 # Kũt 27.16; Mat 15.4; 19.19; Mk 7.10; 10.19; Lk 18.20; Aev 6.2-3 “Nenga ĩthe waku na inyia waku ndaĩa, nĩ kana wĩkale thayũ ĩvinda ĩasa wĩ nthĩ ĩla nyie Mwĩai Ngai, Ngai waku ngũũnenga.

13 # Mwa 9.6; Ali 24.17; Mat 5.21; 19.18; Mk 10.19; Lk 18.20; Alo 13.9; Yak 2.11 “Ndũkoae mũndũ.

14 # Ali 20.10; Mat 5.27; 19.18; Mk 10.19; Lk 18.20; Alo 13.9; Yak 2.11 “Ndũkalaalae.

15 # Ali 19.11; Mat 19.18; Mk 10.19; Lk 18.20; Alo 13.9 “Ndũkoye.

16 # Kuma 23.1; Mat 19.18; Mk 10.19; Lk 18.20 “Ndũkanengane ũkũsĩ wa ũvũngũ ĩũlũ wa mũtũi waku.

17 # Alo 7.7; 13.9 “Ndũkew'ĩe mũsyĩ wa mũtũi waku ĩtomo; ndũkew'ĩe kĩveti kya mũtũi waku ĩtomo, kana mũthũkũmi wake wa mũndũ-ũme, kana wa mũndũ mũka, ng'ombe yake, ĩng'oi yake, kana kĩndũ o na kĩva kya mũtũi waku.”

Andũ Maikwatwa nĩ W'ĩa

(Kũt 5.22-33)

18 # Aevl 12.18-19 Yĩla andũ meewie kĩtandalĩki na wasya wa soo, na moona ũtisi, na kĩĩma kĩtoete syũki, nĩmatetemie nĩ w'ĩa na maũngama vaasa mũno. 19Nĩmeeie Mwose atĩĩ, “Neena naitũ, na nĩtũũkwĩthukĩĩsya; ĩndĩ Ngai ndakaneene naitũ tũikese kũkw'a.”

20Mwose amea atĩĩ, “Mũikakĩe; Ngai ooka kũmũtata na kũtuma mũendeea na kũmwĩw'a nĩ kana mũikeke naĩ.” 21Ĩndĩ andũ nĩmaendeeie na kũũngama vaasa mũno; no Mwose e weka waendie vakuvĩ na kĩla kĩvindu kĩkamu vala Ngai waĩ.

Mĩao Ĩũlũ wa Ithembeo

22Mwĩai Ngai nĩweeaĩie Mwose atavye andũ ma Ĩsilaeli atĩĩ, “Nĩmwonete ũndũ nyie nĩneenete nenyu kuma ĩtunĩ. 23Mũikeseũvĩsye ngai sya silĩva kana thaavu ithaithanĩw'e vamwe nakwa. 24Nzeũvĩsyei kĩthembeo kya mũthanga na kũthembeaa vo nthembo syenyu sya kũvĩvw'a, na nthembo sya ngwatanĩo, malondu menyu, mbũi, na indo. Vandũ vonthe vala nanyuva mũnthaithĩe, ngooka vo na kũmũathima. 25#Kũt 27.5-7; Yos 8.31 Ethĩwa nĩmũũnzeũvĩsya kĩthembeo mũikakyake na mavia masũvye, nũndũ mwatũmĩa ngesa kwasa mavia asu mwĩĩthĩwa mwakĩvukya. 26Mũikambakĩe kĩthembeo kĩna ngasi sya kwambata vo, mũikese kwoneka mwĩ athei yĩla mwambatĩte ngasinĩ isu.”

Currently Selected:

Kuma 20: KAMBA

Highlight

Compare

Copy