Kuma 21

Ũndũ Ngombo syaĩlĩte Kwĩkwa

(Kũt 15.12-18)

1“Nenga andũ ma Ĩsilaeli myamũlo ĩno: 2#Ali 25.39-46 Ethĩwa nĩwathooa ngombo ya Mũevelania, ĩkũthũkũme vandũ va myaka thanthatũ. Mwakanĩ wa mũonza ĩthaw'e ĩtekũĩva kĩndũ. 3Ethĩwa ndaĩ anatwaana aitw'ĩka ngombo yaku, ndaĩlĩte kuma vo e na kĩveti. Ĩndĩ ethĩwa nĩwatwaanĩte aitw'ĩka ngombo yaku, nũtonya kũthi ena kĩveti kyake. 4Ethĩwa mũnene wa ngombo ĩsu nĩwamĩnenga kĩveti na kyamĩsyaĩa syana sya aũme kana sya eĩtu, kĩveti kĩu na syana syakyo itw'ĩkaa sya mũnene ũsu; mũndũ-ũme ũsu ngombo nowe ũkathaw'a athi e weka. 5Ĩndĩ ethĩwa ngombo ĩsu ĩkaneena ũtheinĩ yasye atĩĩ, ‘Nĩnendete mũnene wakwa, kĩveti kyakwa, na syana syakwa na ndikwenda kũthaw'a nĩthi,’ 6nĩvo ĩndĩ mũnene wayo ũkamĩtwaa mbee wa asili.#21.6 asili: Maandĩko amwe ma Ndeto ya Ngai maĩtye mbee wa Ngai Mũnene ũsu akamĩtwae mũomonĩ kana kĩtuĩnĩ kya mũomo na kũmũtonya kũtũ na mũkuva. Ngombo ĩsu ĩkathũkũmaa mũnene wayo ĩvinda yonthe.

7“Ethĩwa mũndũ nĩwathoosya mwĩĩtu wake ta ngombo, mwĩĩtu ũsu ndakathaw'a athi ũndũ ngombo sya aũme iendaa. 8Mwĩĩtu ũsu akethĩwa athooew'e mũndũ ũkwenda atw'ĩke kĩveti kyake, na mũndũ ũsu ailea kwendeew'a nĩwe, nĩvo ĩndĩ ũkathoow'a ĩngĩ kwa ĩthe wake. Mũnene wake ndaĩlĩte kũmũthoosya kũla kwĩ aeni nũndũ ndanamwĩka ũla waĩlu. 9Ethĩwa mũnene ũsu athooete mwĩĩtu ũsu atw'ĩke mũka wa mwana wake, akekalanasya nake ta mwĩĩtu wake. 10Ethĩwa mũndũ ũsu nĩwatwaa kĩveti kĩngĩ, ndaĩlĩte kũvata kĩla kya mbee lĩu, ngũa, na maũndũ ala angĩ waĩlĩte ũkĩka ta kĩveti kyake. 11Mũndũ ũsu akethĩwa atekwenda kwĩanĩsya maũndũ asu atatũ, no nginya akĩthasye vate ĩtuvi o na yĩmwe ũkũnengwa.

Mĩao ĩũlũ wa Kwĩka Maũndũ Mathũku na Ngũlũ

12 # Ali 24.17 “Ũla wĩkũna mũndũ ũngĩ na kũmũaa o nake nĩwaĩlĩte kũawa. 13#Mot 35.10-34; Kũt 19.1-13; Yos 20.1-9 Ĩndĩ ethĩwa amũaa kwa mbanga, na ndeĩ na mũvango wa kũmũaa, akakĩa athi vandũ vala nĩnyuva kwondũ wenyu, na vau akekalaa ũsũvĩonĩ. 14Ĩndĩ ethĩwa mũndũ akathata na ayũaa ũngĩ na ngũlũ, aĩlĩte kũawa o na ethĩwa akasemba akevithe kĩthembeonĩ kyakwa.

15“Mũndũ ũla wĩkũna ĩthe kana nyinyia, aĩlĩte kũawa.

16 # Kũt 24.7 “Mũndũ ũla wĩũya mũndũ ũngĩ akamũthoosye kana aikwatwa amwiĩte, aĩlĩte kũawa.

17 # Ali 20.9; Mat 15.4; Mk 7.10 “Mũndũ ũla wĩuma ĩthe kana nyinyia, aĩlĩte kũawa.

18“Ethĩwa andũ makatetany'a na ũmwe aikima ũla ũngĩ na ĩvia kana kũmũkũna ngundi, na aiema kũkw'a ĩndĩ ayĩkala ũkomonĩ, 19ũsu ũmũkũnĩte ngundi ndakatalĩlwa ũndũ ethĩwa ũsu ũkũnĩtwe nĩwookĩla na ambĩĩa kũthi na ndata. Ĩndĩ no nginya amũĩve ĩvinda yĩla ũmwaĩsye na kũmũiitĩthya avoe vyũ.

20“Ethĩwa mũndũ nĩwakũna ngombo yake ya mũndũ-ũme kana ya mũndũ mũka na ndata, na yakw'a nũndũ wa kũkũnwa kũu, mũndũ ũsu nĩwaĩlĩte kũkanw'a. 21Ĩndĩ ethĩwa ngombo ĩsu ndĩnakw'a ĩtina wa mũthenya ũmwe kana ĩlĩ, mũnene ũsu ndaĩlĩte kũkanw'a nũndũ o nayo ngombo ĩsu ĩnaĩ ũthwii wake.

22“Ethĩwa aũme mekũkita nĩmatina kĩveti kĩito na kĩisyaa naĩ na kĩilea kũũmĩa mũno, no nginya ũla wakĩtina akĩĩve kĩla mũũme weetya, na kyeetĩkĩlwa nĩ asili. 23Ĩndĩ ethĩwa kĩveti kĩu nĩkyaũmĩw'a mũno, ũĩvanĩsyo ũkeethĩwa thayũ vandũ va thayũ, 24#Ali 24.19-20; Kũt 19.21; Mat 5.38 itho vandũ va itho, ĩeo vandũ va ĩeo, kw'oko vandũ va kw'oko, kũũ vandũ va kũũ, 25ĩvya vandũ va ĩvya, kĩtau vandũ va kĩtau, ĩkũna vandũ va ĩkũna.

26“Ethĩwa mũndũ nĩwakũna itho ya ngombo yake ya mũndũ-ũme kana ya mũndũ mũka na kũyĩvũthũa, no nginya amĩthasye aĩvĩe itho yĩu. 27Ethĩwa amĩkũa ĩeo, no nginya o ta ũu amĩthasye aĩvĩe ĩeo yĩu.

Ũndũ ene ma Nyamũ Maĩlĩte Kwĩkaa

28“Ethĩwa ng'ombe nĩyakima mũndũ na kũmũaa, ĩkimangwe na mavia ĩkw'e, na nyama syayo iikaĩwe nĩ mũndũ. Ĩndĩ mwene wayo ndakatalĩlwe mavĩtyo. 29Ethĩwa ng'ombe ĩsu nĩkimanaa na mwene wayo nĩwakaniw'e na alea kũmĩvingĩa, na ĩndĩ nĩyoaa mũndũ, ĩkimangwe na mavia ĩkw'e, na mwene wayo o ta ũu ayũawa. 30Ethĩwa mwene wayo nĩwatw'ĩĩwa kĩla waĩlĩte kũĩva nĩ kana ndakoawe, no nginya nake aĩve kyonthe kĩla wĩtĩtw'e. 31Ethĩwa ng'ombe ĩsu nĩyoaa kamwana kana kelĩtu, mwĩao ũsu now'o waĩlĩte kũatĩĩwa.

32“Ethĩwa ng'ombe ĩsu nĩyakima na kũaa mũndũ-ũme ngombo kana mũndũ mũka ngombo, mwene wa ng'ombe ĩsu akaĩva mũnene wa ngombo ĩsu ilungu mĩongo ĩtatũ sya silĩva, nayo ng'ombe ĩsu ĩikimangwa na mavia ĩkw'e.

33“Ethĩwa mũndũ nĩwakunũa ĩima, kana kwĩnza na kũyĩtia yĩ ĩkunũe, na ng'ombe kana ĩng'oi yĩivota vo, 34mũndũ ũsu akaĩva nyamũ ĩsu. Akaĩva mwene wayo mbesa na kwosa nyamũ ĩsu ngw'ũ ĩtw'ĩke yake. 35Ethĩwa ng'ombe ya mũndũ nĩyooaa ng'ombe ya mũndũ ũngĩ, andũ asu me elĩ makathoosya ĩla yĩ thayũ na kũaana mbesa isu; o ta ũu nĩmaane nyama sya ng'ombe ĩsu ngw'ũ. 36Ĩndĩ ethĩwa nĩkwĩsĩkĩe kana ng'ombe ĩsu nĩkimanaa kuma tene na mwene wayo ndamĩvingĩaa, no nginya aĩve ng'ombe ĩngĩ na ĩsu ngw'ũ ĩyĩthĩwa yake.

Currently Selected:

Kuma 21: KAMBA

Highlight

Compare

Copy