Kuma 22

Mĩao ĩũlũ wa Kũĩvana

1“Ethĩwa mũndũ nĩwooya ng'ombe kana ĩlondu na kũyũaa kana kĩyĩthoosya, no nginya aĩve ng'ombe itano vandũ va ĩmwe na malondu ana vandũ va ĩlondu yĩmwe.

2“Ethĩwa kĩng'ei nĩkyakwatw'a kĩyũya, na kĩikũnwa na kũkw'a, ũla wakyũaa ndatalĩlawa ĩvĩtyo ya kũaa. 3Ĩndĩ ethĩwa kyakwatw'a kĩyũya mũthenya, ũla wĩkyũaa akeethĩwa na ĩvĩtyo ya kũaa.

4“Ethĩwa nyamũ ĩla yũyĩtwe; yooĩthĩwa ng'ombe, ĩng'oi kana ĩlondu, nĩyeethĩwa kwake yĩ thayũ, akaĩvaa ilĩ vandũ va kĩla ĩmwe.

5“Ethĩwa mũndũ nĩwalekya indo syake iye mũũndanĩ wake wa lĩu kana wa mĩsavivũ na ayĩekana nasyo ilike mũũndanĩ wa mũndũ ũngĩ na kwananga syĩndũ ila syĩ mũũndanĩ ũsu, no nginya aiĩvĩe kuma ngethanĩ ĩla nzeo ya mũũnda wake wa lĩu kana wa mĩsavivũ.

6“Ethĩwa mũndũ nĩwakwatya mwaki mũũndanĩ na wanyaĩĩkw'a nĩ nyeki wathi mũũndanĩ wa mũndũ ũngĩ na kũvĩvya kĩla kĩmeete mũũndanĩ ũsu kana ngetha ĩla ĩtemetwe ĩkombanw'a vamwe, ũla ũkwatisye mwaki ũsu no nginya aĩvĩe wasyo ũsu.

7“Ethĩwa mũndũ nĩweetĩkĩla kwiĩa mũtũi wake mbesa kana syĩndũ sya vata, na iyũyĩwa mũsyĩnĩ kwake, kĩng'ei kĩu kyakwatwa, kĩkaĩva syĩndũ isu kũndũ kwĩlĩ. 8Ethĩwa kĩng'ei kĩu kĩinakwatwa, mwene wa mũsyĩ ũsu akaetwe mbee wa asili nĩ kana kũmanyĩke kana nokwĩthĩwa nowe wũyĩte syĩndũ sya mũtũi wake.

9“Ethĩwa andũ elĩ makeethĩwa na ngananĩo ĩũlũ wa ng'ombe, mang'oi, malondu, ngũa kana kĩndũ o na kĩva kyaĩte, kĩla ũmwe woo ayasya, ‘Kĩĩ nĩ kyakwa,’ andũ asu elĩ maĩlĩte kũete ĩkoani yĩu mbee wa asili. Mũndũ ũla asili asu meĩthĩa kana nĩwe wĩ mavĩtyo, no nginya aĩve mũtũi wake kũndũ kwĩlĩ.

10“Ethĩwa mũndũ nĩwavithya ĩng'oi, ng'ombe, ĩlondu, kana nyamũ ĩngĩ kwa mũtũi wake nĩ kana amũsũvĩĩe, na nyamũ ĩsu ĩikw'a kana ĩiũmĩa kana ĩyũywa vate mũndũ wene, 11ĩkoani yoo yĩkasilwa kwa nzĩa ya mũtũi ũsu kwĩvĩta mbee wa Mwĩai Ngai kana ndaaũya kĩndũ kya ũsu ũngĩ. Mwene wa nyamũ ĩsu aĩlĩte kwĩtĩkĩla wĩvĩto ũsu, na ndaĩlĩte kũĩvĩthya kĩndũ. 12Ĩndĩ ethĩwa nyamũ ĩsu ĩkooyĩwa kwake, mũtũi ũsu aĩlĩte kũĩva mwene. 13Ethĩwa nĩyalĩka nĩ nyamũ sya kĩtheka, mũndũ ũla ũnavithĩtw'e nĩaete matialyo mayo methĩwe ũkũsĩ na ndakaĩvĩthw'a nyamũ ĩsu ĩnalĩkile.

14“Ethĩwa mũndũ nĩwavoya nyamũ kuma kwa mũndũ ũngĩ na ĩiũmĩa kana kũkw'a mwene wayo ate vakuvĩ, no nginya amĩĩve. 15Ĩndĩ ethĩwa yakw'a mwene e vakuvĩ, mũndũ ũsu ndaĩlĩte kũmĩĩva. Ethĩwa yĩĩ nyamũ ũkomboete, wasyo wayo ũkaĩvwa nĩ kĩla ũkomboete nakyo.

Mĩao ĩũlũ wa Mwĩkalo Mũseo

16 # Kũt 22.28-29 “Ethĩwa mũndũ-ũme nĩwakenga mwĩĩtu ũtaamanyana kĩ-mwĩĩ na mũndũ, na ũtemwĩvaasye na aimanyana kĩ-mwĩĩ nake, no nginya aĩvĩe mwĩĩtu ũsu ngasya, na aitw'ĩka kĩveti kyake. 17Ĩndĩ ethĩwa ĩthe wa mwĩĩtu ũsu nĩwalea vyũ kũmũnengane kwa mũndũ ũsu, mũndũ-ũme ũsu no nginya aĩve ngasya ĩla ĩĩvĩawa eĩtu mataamanyana kĩ-mwĩĩ na mũndũ.

18 # Kũt 18.10-11 “Ndũkaeke mũndũ mũka mũoi ekale thayũ.

19 # Ali 18.23; 20.15-16; Kũt 27.21 “Ũla ũkamanyana kĩ-mwĩĩ na nyamũ, nĩoawe.

20 # Kũt 17.2-7 “Ũla ũthembeaa ngai ingĩ eka nyie Mwĩai Ngai, nĩoawe.

21 # Kuma 23.9; Ali 19.33-34; Kũt 24.17-18; 27.19 “Ndũkamwĩke naĩ kana kũmũthĩny'a mũndũ wĩ ũeninĩ; lilikanai kana o nenyu mwaĩ aeni nthĩ ya Misili.

22“Ndũkeke naĩ kĩveti ndiwa kana mwana ndiwa. 23Wamathĩny'a na maimbĩkaĩla, vate nzika ngeew'a kĩĩo kyoo. 24Ũndũ ũsu ũkatuma nĩthata mũno na ngatuma mũaĩwa kaũnĩ. Iveti syenyu ikatw'ĩka ndiwa na syana syenyu iitiwa ĩte na aaĩthe.

25 # Ali 25.35-38; Kũt 15.7-11; 23.19-20 “Ethĩwa nĩwakovethya ũmwe wa andũ makwa ngya mbesa, ndũkatinde ũkĩmũandũa, na ndũkamwĩtye ũtandĩthyo wasyo. 26#Kũt 24.10-13 Ethĩwa nĩwoosa ngũa ya mũndũ ũngĩ ta ũĩkĩĩthyo wa ũkũĩva thiĩ, mũtũngĩe syũa yĩtanathũa. 27Nĩkwĩthĩwa ngũa ĩsu noyo wĩ nayo yĩ yoka ya kwĩvw'ĩka. Akakoma evw'ĩkĩte kĩngĩ kyaũ? Ambĩkaĩla ngeew'a kĩĩo kyake, nũndũ nĩ tei mwingĩ.

28 # Meko 23.5 “Ndũkamũume Ngai kana kũuma mũtongoi wa andũ maku. 29“Mbumĩsye nthembo kuma ngethanĩ yaku yonthe ya mbaa mbeke, ndivai, na ya mauta ma mĩthata.

“No nginya kana kaku ka mbee ka kavĩsĩ ũkanengane kwakwa.

30“Ĩka o ta ũu kuma indonĩ syaku na malondunĩ maku. Syĩkalae na aainyia vandũ va mĩthenya mũonza, na ũyĩinenange kwakwa mũthenyanĩ wa nyanya.

31 # Ali 17.15 “Inyw'ĩ mwĩ andũ makwa avathe, kwoou mũyaĩlĩte kũya nyama sya nyamũ yũaĩtwe nĩ nyamũ sya kĩthekanĩ; vandũ va ũu, ĩkĩsyai ngitĩ nyama isu.

Currently Selected:

Kuma 22: KAMBA

Highlight

Compare

Copy