Kuma 2

Kũsyawa kwa Mwose

1Mũndũ ũmwe wa mbaĩ ya Livai nĩwatwaie mũndũ mũka Mũlivai. 2#Meko 7.20; Aevl 11.23 Mũndũ mũka ũsu nĩwaitavie na asyaa kavĩsĩ. Yĩla woonie ũndũ kanakavĩte, nĩwakavithie vandũ va myei ĩtatũ. 3Ĩndĩ yĩla woonie atakavithĩkya mbee wa vau, nĩwoosie kĩkavũ kya makangaa, akĩmala lami ũsiĩĩe kĩw'ũ kũlika nthĩnĩ. Nĩwalikilye kala kana kĩkavũnĩ kĩu, na akĩlikya makangaanĩ ala maĩ ũtee wa Ũsĩ wa Naeli. 4Mwĩĩtu-a-inyia wa kana kau nĩwaũngamaa vandũ vaasa, asyaĩĩsye kana ve ũndũ ũtonya kwĩkĩka kwako.

5Nĩvo ĩndĩ mwĩĩtu wa mũsumbĩ wookie ũsĩnĩ wa Naeli kũthamba, namo athũkũmi make ma aka meethĩwa mayĩsĩla o kũu ũtee wa ũsĩ. Nĩwoonie kĩla kĩkavũ kĩ makangaanĩ na atũma ũmwe wa athũkũmi make akakyose amũetee. 6Yĩla mwĩĩtu wa mũsumbĩ wakĩvingũie, nĩwoonie kana kayĩĩa na kwoou akew'ĩa ĩnee. Nĩwaisye atĩĩ, “Kaa nĩ kamwe ka syana sya Aevelania.”

7Nĩvo ĩndĩ mwĩĩtu-a-inya wa kana kau wamũkũlilye mwĩĩtu wa mũsumbĩ, “Nũkwenda nĩende ngaũmanthĩe mũndũ mũka Mũevelania akũee kana kau?”

8Mwĩĩtu wa mũsumbĩ amũsũngĩa, “Ĩĩ, enda.” Kwoou mwĩĩtu ũsu athi na aete inyia wako. 9Mwĩĩtu wa mũsumbĩ nĩweeie mũndũ mũka ũsu atĩĩ, “Osa kana kaa ũende ũkandee na ngakũĩva.” Kwoou nĩwoosie kana kau na athi kũkaea. 10#Meko 7.21 Kana kau kamina kwĩana, ũla mũndũ mũka wakaeaa nĩwakatwaie kwa mwĩĩtu wa mũsumbĩ, nake akosa katw'ĩka kana kake. Mwĩĩtu wa mũsumbĩ nĩwaneenie asya, “Namũkusisye namumya kĩw'ũnĩ na kwoou nĩmwĩta, ‘Mwose.’ ”#2.10 Mwose: Ĩsyĩtwa yĩĩ yĩtamũkĩkaa ta ndeto ya Kĩevelania ya kwasya kusya wumye.

Mwose aikĩa na kũthi Mitiani

11 # Aevl 11.24 #Meko 7.23-28 Mwose amina kũtw'ĩka mũndũ mũima, mũthenya ũmwe nĩwaumaalũkile athi vala Aevelania maĩ na oona maithũkũmĩthw'a wĩa mũito mũno. O na nĩwoonie Mũmisili ũmwe aivũa Mũevelania, ũmwe wa ana-a-ĩthe make. 12Mwose nĩwasyaisye ngalĩko syonthe, na yĩla woonie kana vai mũndũ ũmũsyaĩĩsye, nĩwooaie Mũmisili ũsu na avitha mwĩĩ wake kĩthangathĩnĩ. 13Ũnĩ ũsu nĩwaumaalũkile ĩngĩ na eethĩa aũme elĩ Aevelania mayũkita. Nĩwakũlilye ũla waĩ na ĩvĩtyo atĩĩ, “Wĩkũna mũndũ wa mbaĩ yenyu nĩkĩ?”

14Mũndũ ũsu nĩwamũkũlilye, “Nũũ ũla ũkũtwie mũnene na mũsili waitũ? Wĩenda kũmbũaa o ũndũ ũnooaie ũla Mũmisili?” Nĩvo ĩndĩ Mwose wakwatiwe nĩ w'ĩa na asũanĩa ngoonĩ, “Vate ndĩi ũndũ ũsu nũmanyĩkĩte nĩ andũ.” 15#Meko 7.29; Aevl 11.27 Yĩla mũsumbĩ weewie kana Mwose nĩwooaie Mũmisili, nĩwambĩĩie kũmũmantha amũae, ĩndĩ Mwose akĩa athi kũtũa nthĩ ya Mitiani.

Mũthenya ũmwe, Mwose nĩwailyĩ nthĩ vakuvĩ wa kĩthima. 16Eĩtu mũonza ma Yethilo, mũthembi wa Mitiani, nĩmookie kũtava kĩw'ũ, na mausũsya kĩndũ kĩla manyithĩasya mbũi na malondu ma ĩthe woo. 17Aĩthi amwe nĩmookie mamalũngya, ĩndĩ Mwose amatetea na amanyithĩsya indo syoo. 18Yĩla eĩtu asu masyokie vala ve ĩthe woo, nĩwamakũlilye atĩĩ, “Kweethĩwa ata mwasyokethya tene wĩana ũu ũmũnthĩ?”

19Mamũsũngĩa, “Mũmisili ũmwe nũtũvonokisye yĩla tũlũngilw'e nĩ aĩthi, na o na atũtavĩa kĩw'ũ atũnyithĩsya indo sitũ.”

20Nake akũlya eĩtu make, “Na aĩva mũndũ ũsu? Mũmũtiie nĩkĩ? Endai mũkamwĩte oke aye lĩu.”

21Kwoou Mwose nĩweetĩkĩlile kwĩkala kwa Yethilo, nake amũnenga mwĩĩtu wake Nzivola atw'ĩka mũka wake. 22Nzivola nĩwasyaie kavĩsĩ na Mwose akatw'ĩĩa ĩsyĩtwa aketa Ngelisomu#2.22 Ngelisomu: Ĩsyĩtwa yĩĩ yĩtamũkĩkaa ta ndeto ya Kĩevelania ya kwasya mũeni. nũndũ nĩwaneenie asya, “Nyie nĩ mũeni nthĩ ĩno.”

23Ĩtina wa ĩvinda ĩasa, mũsumbĩ wa Misili nĩwakwie, ĩndĩ andũ ma Ĩsilaeli no maendee kũluma nũndũ wa kũkwatwa ũkombo na kũĩa nĩ kana matetheew'e. Ngai nĩweewie kĩĩo kyoo, 24#Mwa 15.13-14 na o ta ũu eew'a kũluma kwoo, na alilikana ũtianĩo wake na Avalaamu, Isaka na Yakovo. 25Ngai nĩwoonie kũthĩnw'a kwa andũ ma Ĩsilaeli na amew'ĩa tei.

Currently Selected:

Kuma 2: KAMBA

Highlight

Compare

Copy