Kuma 1

Kũthĩnw'a kwa Andũ ma Ĩsilaeli me Nthĩ ya Misili

1 # Mwa 46.8-27 Masyĩtwa ma ana ma Yakovo ala maendanisye nake kwĩkala nthĩ ya Misili, kĩla ũmwe e na andũ ma nyũmba yake, nĩmo aa: 2Lũveni, Simioni, Livai na Yuta, 3Isakali, Nzevuluni na Mbengyameni, 4Ndani, Navutalĩ, Ngandi na Aseli. 5Ũtalo wa nzyawa syonthe sya Yakovo waĩ andũ mĩongo mũonza.#1.5 mĩongo mũonza Maandĩko amwe ma tene ma Ndeto ya Ngai maĩtye mĩongo mũonza na atano Mwana wake Yosevu atwĩe kũu nthĩ ya Misili. 6O maendee kwĩkala kũu, Yosevu, ana-a-ĩthe na andũ ala angĩ onthe maĩ thayũ ĩvinda yĩu nĩmakwie mathela. 7#Meko 7.17 Ĩndĩ nzyawa syoo ila nĩmo andũ ma Ĩsilaeli masyaana maingĩva mũno na meethĩwa na vinya, nginya matũa kĩla vandũ nthĩ ĩsu.

8 # Meko 7.18 Nĩvo ĩndĩ mũsumbĩ ũngĩ ũla ũteesĩ maũndũ ma Yosevu wasumbĩkie nthĩ ya Misili. 9Mũsumbĩ ũsu nĩweeie andũ make atĩĩ, “Andũ aa ma Ĩsilaeli nĩ aingĩ na me na vinya kwĩ ithyĩ. 10#Meko 7.19 Tũmatũmĩĩei mawũĩ maikaendee kwingĩva, nũndũ kũkesa kwĩthĩwa kaũ, nomakwatane na amaitha maitũ matũkite na maikĩa maume#1.10 maikĩa maume: Maandĩko amwe ma tene ma Ndeto ya Ngai maĩtye maisumbĩka. nthĩ ĩno.”

11Kwoou andũ ma Misili nĩmaiie aũngamĩi nĩ kana mathĩny'e andũ ma Ĩsilaeli kwa kũmathũkũmĩthya wĩa mũito, na maakĩa mũsumbĩ ndũa sya Vithomu na Lamusesi sya kwiaa lĩu na syĩndũ ingĩ. 12Ĩndĩ o na kau andũ ma Ĩsilaeli nĩmathĩnaw'a mũno, nĩmaendeeie kwingĩva mbee na mbee, na matũa isionĩ mbingĩ sya nthĩ ĩsu. Andũ ma Misili nĩmambĩĩie kũkĩa andũ ma Ĩsilaeli, 13na kwoou mamathũkũmĩthya wĩa mũito mũno, 14na matuma mathayũ moo methĩwa na woo mũnene. Mamanengae wĩa wa mwako na wĩa w'onthe wa mĩũndanĩ; na mawĩanĩ asu onthe maitavĩte ũu, andũ ma Misili mamathũkũmĩthasya vate tei.

15Nĩvo ĩndĩ mũsumbĩ wa Misili waneenie na Sivula na Vua, aka ala mesikasya aka ma Aevelania amea atĩĩ, 16“Yĩla mũkwĩsikya aka ma Aevelania, mwoona nĩ kavĩsĩ keũsyawa, koaei; ĩndĩ ethĩwa nĩ kelĩtu, ekanai nako kekale thayũ.” 17Ĩndĩ esikya asu maĩ na kĩkĩo kya Ngai na kwoou mayaaĩka ũndũ mũsumbĩ wameaĩĩte; vandũ va ũu nĩmaekie twana twa tũvĩsĩ twĩkale thayũ. 18Mũsumbĩ nĩwatũmanie esikya asu metwe na amakũlya atĩĩ, “Mwĩĩka ũu nĩkĩ? Mwĩekana na tũvĩsĩ twĩkale thayũ twakĩ?”

19Esikya asu nĩmasũngĩie mũsumbĩ atĩĩ, “Aka ma Aevelania mayĩilyĩ ta ma Amisili; nũndũ masyaa mĩtũkĩ vate thĩna mwisikya atanavika vala maĩ.” 20Kwoou Ngai nĩweekie esikya asu nesa, na andũ ma Ĩsilaeli maendeea kwingĩva na kwĩthĩwa na vinya mwingĩ mũno, 21na nũndũ maĩ na kĩkĩo kyake, nĩwamanengie mĩsyĩ yoo ene. 22#Meko 7.19 Nĩvo ĩndĩ mũsumbĩ waumisye mwĩao kwa andũ make onthe amea atĩĩ, “Osaai tũvĩsĩ tw'onthe tũla twasyawa nĩ Aevelania na mũitwĩkya ũsĩnĩ wa Naeli, ĩndĩ ekanaai na twĩlĩtu tw'onthe twĩkale thayũ.”

Currently Selected:

Kuma 1: KAMBA

Highlight

Compare

Copy