Kuma Ũelesyo wa Ĩvuku Yĩĩ
Ũelesyo wa Ĩvuku Yĩĩ
Ndeto ĩno “Kuma” yĩna kĩeleelo kya “Kũthi” na ĩwetete ũndũ ũla mũnene mũno weekĩkie kwa andũ ma Ĩsilaeli na nĩw'o ũeleetw'e ĩvukunĩ yĩĩ: Kũthi kwa andũ ma Ĩsilaeli kuma nthĩ ya Misili vala matwĩe me ngombo. Ĩvuku yĩĩ yĩna ilungu inya nene: Kya mbee nĩ kũthaw'a kwa Aevelania asu kuma ũkombonĩ. Kya kelĩ nĩ kyalo kyoo kya kũthi kĩĩmanĩ kya Sinaĩ. Kya katatũ nĩ Ngai kũseũvya ũtianĩo na andũ make Kĩĩmanĩ kya Sinaĩ, ũla watumie amanenga mĩao ĩũlũ wa mwĩkalo mũseo, mwĩkalanĩlye na ũthaithi maatĩĩae. Kya kana nĩ kwaka na kũseũvya vandũ vala andũ ma Ĩsilaeli methaithĩaa, na ĩũlũ wa mĩao ĩkonetye athembi na kũthaitha Ngai.
Ũndũ ũla mũnene mbee wa aa onthe nĩ kana ĩvuku yĩĩ yĩeleetye maũndũ ala Ngai weekie, aendee kumya andũ make ũkombonĩ na amombany'a matw'ĩka andũ ma mbaĩ ĩmwe yĩna wĩkwatyo wa ĩvinda yĩla yũkĩte.
Mũndũ ũla ũwetetwe mũno ĩvukunĩ yĩĩ nĩ Mwose, ũla Ngai wanyuvie atongoesye andũ make kuma Misili. Kĩlungu kĩla kĩsĩkĩe mũno ĩvukunĩ yĩĩ nĩ kĩla kĩ ĩla Mĩao Ĩkũmi (20.1-17).
Maũndũ ala me Ĩvukunĩ Yĩĩ
Andũ ma Ĩsilaeli maithaw'a kuma Misili 1.1—15.21
a. Mayĩkala ta ngombo nthĩ ya Misili 1.1-22
b. Kũsyawa kwa Mwose na thayũ wake e mũnini 2.1—4.31
c. Mwose na Alũni maithi kũneenany'a na mũsumbĩ wa Misili 5.1—11.10
d. Mboka ya Vasaka na kyalo kya kuma Misili 12.1—15.21
Kuma Ũkanga Mũtune kũthi Kĩĩmanĩ kya Sinaĩ 15.22—18.27
Kũnengwa mĩao na ũtianĩo 19.1—24.18
Wĩkalo Mũtheu wa Ngai na mĩao ĩũlũ wa ũthaithi 25.1—40.38
Currently Selected:
Kuma Ũelesyo wa Ĩvuku Yĩĩ: KAMBA
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011