Kuma 31

Athũkũmi me na Ũmanyi ala Maseũvisye Ĩeema Ĩtheu ya Kũkomanĩa na Mwĩai Ngai

(Kuma 35.30—36.1)

1Mwĩai Ngai nĩwaneenie na Mwose amwĩa atĩĩ, 2“Nĩnĩmũnyuvĩte Mbesaleli mwana wa Ũli na mwĩsũkũũe wa Uulu wa mbaĩ ya Yuta, 3na nĩnĩmusũĩtye na Veva wakwa, ũtonyi, kĩlĩko, ũĩ, na ũmanyi wa kũseũvya syĩndũ sya mĩthemba yonthe. 4Nũtonya kũseũvya syĩndũ mbanake aitũmĩa thaavu, silĩva, na kyũma kĩtawa mbulonzi. 5O ta ũu nũtonya kwasa mavia ma thooa mũnene, na kwasa mbwaũ o na kũtethya mawĩa ma mĩthemba yonthe. 6Ũu wĩ o vo, nĩnĩnyuvĩte Ooliavu mwana wa Aisamaki, wa mbaĩ ya Ndani amũtetheesye Mbesaleli. O ta ũu nĩnĩnengete andũ ala angĩ me na ũmanyi ũtonyi nĩ kana methĩwe matonya kũseũvya syĩndũ syonthe ila nĩkwĩaĩĩte. 7Makaseũvya yĩla Ĩeema ĩtheu ya kũkomanĩa na Ngai, yĩla Ĩsandũkũ ya Ũtianĩo na ngunĩko ya yo ĩla nĩ vandũ vakwa va kũekeaa naĩ, na mĩio ĩla yĩĩkĩwa ĩeemanĩ. 8O ta ũu makaseũvya ĩla Mesa na mĩio ya yo, kĩla kĩndũ kya kwilĩĩla taa kya thaavu mũthei na mĩio yakyo, na kĩla kĩthembeo kya kũvĩvĩsya ũvani, 9kĩthembeo kya nthembo sya kũvĩvw'a na mĩio yakyo, na kala kalaĩ ka kũthambĩa na ĩtina yako. 10Makaseũvya ila ngũa nzeo mbanake sya kĩ-ũthembi sya Alũni na ana make ila makatũmĩaa ũthũkũminĩ woo ta athembi, 11mauta matheu ma kwĩtĩkĩsya na ũla ũvani wĩ mũuke mũseo wa vala Vandũ Vatheu. Maiseũvya syĩndũ isu syonthe no nginya meke ũndũ nĩkwĩaĩĩte.”

Mwĩao Ĩũlũ wa Savato

12Mwĩai Ngai nĩwaneenie na Mwose amwĩa atĩĩ, 13“Neena na andũ ma Ĩsilaeli ũmee atĩĩ, ‘Lilikanai mĩthenya yakwa ya Savato nũndũ ũũ nĩ wonany'o katĩ wakwa nenyu ĩvinda yonthe yĩla yũkĩte, nĩ kana mũmanye kana Nyie Mwĩai Ngai nĩnĩmũtw'ĩte andũ makwa. 14Mũkalilikanaa mũthenya wa Savato nũndũ nĩ mũtheu kwenyu. Mũndũ o na wĩva ũla wĩvukya Savato akooawa. Ũla ũkathũkũma wĩa o na wĩva mũthenya wa Savato ndakatalwe ĩngĩ ta ũmwe wa andũ makwa. 15#Kuma 20.8-11; 23.12; 34.21; 35.2; Ali 23.3; Kũt 5.12-14 Mũkatethasya wĩa mĩthenya thanthatũ, ĩndĩ mũthenya wa mũonza nĩ mũthenya mũnene wa kũthũmũa ũvathĩtwe kwondũ wakwa. Mũndũ ũla wĩtethya wĩa o na wĩva mũthenya ũsu akooawa. 16Kwoou andũ ma Ĩsilaeli makalilikanaa Savato. Makamĩtanĩaa nzyawanĩ syonthe ila ikoka ta ũtianĩo wa kĩla ĩvinda. 17#Kuma 20.11 Ũsu ũkeethĩawa wonany'o katĩ wakwa na andũ ma Ĩsilaeli tene na tene nũndũ ĩvindanĩ ya mĩthenya thanthatũ nĩnoombie ĩtu na nthĩ, na mũthenya wa mũonza nathũmũa.’ ”

18Yĩla Ngai waminie kũneena na Mwose Kĩĩmanĩ kya Sinaĩ, nĩwamũnengie ala masengea elĩ ma mavia, ala Ngai mwene waandĩkĩte ĩla mĩao.

Currently Selected:

Kuma 31: KAMBA

Highlight

Compare

Copy