Kuma 32

Kasalũ ka Thaavu

(Kũt 9.6-29)

1 # Meko 7.40 Yĩla andũ moonie kana Mwose nĩwekala mũno atanatheea kuma Kĩĩmanĩ kya Sinaĩ, nĩmaendie moombanĩlĩĩla Alũni na mamwĩa atĩĩ, “Ũkĩla ũtũseũvĩsye ngai ila ikatũtongoeasya, nũndũ tũyĩsĩ mũndũ ũsu ũkwĩtwa Mwose ũla watumisye nthĩ ya Misili akwatĩtwe nĩ ũndũ mwaũ.”

2Alũni nĩwasũngĩie amea atĩĩ, “Umyai mĩnaĩ ya thaavu ĩla iveti syenyu ana menyu, na eĩtu menyu mekĩĩte matũ na mũindetee.” 3Kwoou andũ onthe nĩmaumisye mĩnaĩ ya thaavu ĩla yaĩ matũnĩ moo, na mamũetee Alũni. 4#1Asu 12.28; Meko 7.41 Nĩwoosie mĩnaĩ ĩsu, amĩtwekethya kwa kũmĩvĩvya na mwaki, na atulũla thaavu ũsu kĩndũnĩ kya kũmba, na aseũvya na ngesa kasalũ ka thaavu.

Andũ nĩmaisye, “Ĩsilaeli, ũũ nĩwe ngai waitũ ũla watumisye nthĩ ya Misili!”

5Yĩla Alũni woonie ũu, nĩwaakie kĩthembeo mbee wa kasalũ kau. Alũni nĩwaneenie asya atĩĩ, “Ũnĩ kũkeethĩwa mboka kwondũ wa Mwĩai Ngai.” 6#1Ako 10.7 Ũnĩ ũsu kwakya tene, andũ asu nĩmaetie nyamũ sya nthembo sya kũvĩvw'a, na ingĩ sya kũya ta nthembo ya ngwatanĩo. Andũ asu nĩmekalile nthĩ matanĩe mboka ĩsu, ĩla yavĩndũkie yatw'ĩka mboka ya ũnywi na kwĩka ũlaalai.

7Mwĩai Ngai nĩwaneenie na Mwose amwĩa atĩĩ, “Theea mĩtũkĩ nũndũ andũ maku, ala waũmisye kuma nthĩ ya Misili nĩmevukĩtye. 8Nĩmatiĩte nzĩa ĩla nameaĩie maatĩĩae. Nĩmaseũvĩtye kasalũ kuma thaavunĩ mũtheũkye, makakathaĩtha, na kũkaumĩsya nthembo. Maendee na kwasya kana kasalũ kau nĩko ngai woo ũla wamatongoeisye kuma nthĩ ya Misili. 9Nĩnonete andũ aa, na sisya, me ngoo mbũmũ. 10Yu ndũkatate kũnziĩĩa. Nĩnthatĩtw'e nĩmo, na nĩngũmamina. Nĩvo ĩndĩ ngakũtw'ĩkĩthya we na nzyawa syaku mbaĩ nene.”

11 # Mot 14.13-19 Ĩndĩ Mwose nĩwamwĩsũvie Mwĩai Ngai, Ngai wake na amwĩa, “Mwĩai Ngai, nĩ kyaũ kĩũtuma ũthatĩa andũ maku mũno wĩana ũu, ala wavonokisye kuma nthĩ ya Misili na ũtonyi na vinya mũnene? 12Nĩ kyaũ kĩtuma ũeka andũ ma Misili methĩwe matonya kwasya kana watongoeisye andũ maku kuma nthĩ ya Misili, ũvangĩte kũmoaĩa iĩmanĩ na kũmamina vyũ? Eka kũthata. Vĩndũa mosũanĩo maku na ndũkaete ũndũ ũũ mũthũku andũnĩ maku. 13#Mwa 22.16-17; 17.8 Lilikana athũkũmi maku Avalaamu, Isaka na Yakovo ala we mwene wathie kwa kwĩvĩta na ĩsyĩtwa yaku ũkyasya atĩĩ, ‘Ngaingĩvya nzyawa syaku ta ndata sya ĩtunĩ na ngainenga nthĩ ĩno yonthe ĩla nasyathie, nayo ĩyĩthĩwa ũtiĩwa wasyo tene na tene.’ ” 14Ĩndĩ Mwĩai Ngai nĩwavĩndũie mosũanĩo make na aeka kũetee andũ make ũndũ ũsu mũthũku waitye nũkũmaetee.

15Mwose nĩwavĩndũkie na atheea kuma kĩĩmanĩ akuĩte na moko make ala masengea elĩ ma mavia. Masengea asu maandĩkĩtwe ĩla mĩao ngalĩko syelĩ. 16Ngai mwene nĩwe waseũvĩtye masengea asu na akaandĩka ĩũlũ wamo kwa kũmatemeleela ĩla mĩao.

17Yĩla Yosua weewie andũ mailonzany'a na wasya mũnene, nĩweeie Mwose atĩĩ, “Ĩthukĩĩsye! Nĩngwĩw'a kĩlonzo kya kaũ maeemanĩ.”

18Ĩndĩ Mwose nĩwamũsũngĩie amwĩa atĩĩ, “Asu ti andũ meũlonzany'a nũndũ wa kũsinda, kana andũ mekũĩa nũndũ wa kũsindwa, ĩndĩ nĩĩw'a wasya wa andũ mekwina.”

19Yĩla Mwose wathengeeie maeemanĩ na oona kala kasalũ, na andũ maisũnga, woo wake nĩwaingĩvie. Nĩwekisye masengea asu wakuĩte matilĩkanga ilungu vau ĩtinanĩ wa kĩĩma. 20Nĩwoosie kasalũ kau maĩ manaseũvya, akavĩvya na mwaki, na akathia katw'ĩka mũtutu. Nĩwanyaĩĩkĩsye mũtutu ũsu kĩw'ũnĩ na alasimĩthya andũ ma Ĩsilaeli manyw'e kĩw'ũ kĩu. 21Nĩvo ĩndĩ Mwose wakũlilye Alũni atĩĩ, “Andũ aa makwĩkie ata nĩ kana ũmatongoesye kwĩka naĩ inenevete ũu?”

22Alũni nĩwamũsũngĩie amwĩa atĩĩ, “Mũnene wakwa ndũkanthatĩe, nĩwĩsĩ ũndũ andũ aa mendete kwĩka naĩ mũno wĩana. 23Nũndũ manambĩie, ‘Tũseũvĩsye ngai ila ikatũtongoeasya nũndũ, mũndũ ũsu ũkwĩtwa Mwose, ũla watumisye nthĩ ya Misili tũyĩsĩ akwatĩtwe nĩ ũndũ Mwaũ.’ 24Nĩvo nĩnameie, ũla wĩ na mĩnaĩ ya thaavu aumye na aindetee. Nĩmanamyumisye na manenga namĩkya mwakinĩ na vauma kasalũ kaa.”

25Mwose nĩwoonie kana Alũni nũmaekie andũ meke ũndũ mekwenda na kwĩyĩkĩĩthya nthoni mbee wa amaitha moo. 26Kwoou Mwose nĩwaũngamie mũvĩanĩ wa maeema na asya, “Ũla wĩ ngalĩko ya Mwĩai Ngai nũũ? Nĩ oke vaa nĩĩ”. Nĩvo ĩndĩ Alivai onthe moombanĩie vala waĩ. 27Nĩvo Mwose wameie atĩĩ, “Mwĩai Ngai, Ngai wa Ĩsilaeli eĩaĩa kĩla ũmwe wenyu ose ũvyũ wake na ayĩsĩla kĩla vandũ maeemanĩ, kuma mũvĩanĩ ũmwe kũvika ũla ũngĩ, na kũaa ana-a-ia make, anyanyae make na atũi make.” 28Alivai nĩmeekie kwĩanana na ndeto sya Mwose na mũthenya ũsu mooaa andũ ta ngili itatũ. 29Nĩvo ĩndĩ Mwose wameie atĩĩ, “Ũmũnthĩ nĩmwavathwa kwondũ wa Mwĩai Ngai nũndũ mũinetĩkĩlana na ana menyu na ana-a-ia menyu na kwoou nĩwamũathima mũthenyanĩ ũũ wa ũmũnthĩ.”

30Ũnĩ ũsu, Mwose nĩweeie andũ atĩĩ, “Nĩmwĩkĩte naĩ nene mũno. Ĩndĩ yu nĩngwambata ĩngĩ kĩĩmanĩ kũla kwĩ Mwĩai Ngai, nĩvatonyeka ngamwĩtĩsya ũekeo kwondũ wa naĩ yenyu.” 31Kwoou Mwose nĩwasyokie kũla kwĩ Mwĩai Ngai na amwĩa atĩĩ, “Andũ aa nĩmekie naĩ nene! Nĩmeseũvĩisye ngai sya thaavu. 32#Sav 69.29; Ũvu 3.5 Mwa maekee naĩ yoo; ĩndĩ ethĩwa ndwĩmaekea, vuta ĩsyĩtwa yakwa ĩvukunĩ yĩla ũandĩkĩte masyĩtwa ma andũ maku.”

33Ĩndĩ Mwĩai Ngai nĩweeie Mwose atĩĩ, “Ũla wĩkĩte naĩ mbee wakwa, nĩwe ngũvuta ĩsyĩtwa yake ĩvukunĩ yakwa. 34Enda yu ũtongoesye andũ mathi vala naũtavisye. Lilikana kana mũlaĩka wakwa nũkũũtongoesya, ĩndĩ ĩvinda nĩyũkĩte yĩla ngakany'a andũ aa kwondũ wa naĩ yoo.” 35Kwoou Mwĩai Ngai nĩwaeteie andũ ũwau, nũndũ nĩmatumie Alũni aseũvya kasalũ ka thaavu.

Currently Selected:

Kuma 32: KAMBA

Highlight

Compare

Copy