Kuma 33
33
Mwĩai Ngai Ayĩaĩa Andũ ma Ĩsilaeli maume Kĩĩmanĩ kya Sinaĩ
1 #
Mwa 12.7; 26.3; 28.13 Mwĩai Ngai nĩwaneenie na Mwose amwĩa, “Uma vau, we na andũ asu waumisye nthĩ ya Misili mũthi nthĩ ĩla nathie Avalaamu, Isaka, na Yakovo, ngĩmea, ‘Nganenga nzyawa syenyu nthĩ ĩsu.’ 2Nĩngũtũma mũlaĩka amũtongoesye na nĩngũlũngya Akanaani, Aamoli, Aititi, Avelisi, Aivi na Ayevusi. 3Mũendete kũlika nthĩ nthwii na nou. Ĩndĩ nyie ndiendany'a nenyu, nũndũ mwĩ andũ me ngoo mbũmũ na nĩndonya kũmũminĩa nzĩanĩ.”
4Yĩla andũ asu meewie ndeto isu syĩ vinya ũu, nĩmakwatiwe nĩ kĩĩo, na vai mũndũ waaĩkĩa syĩndũ syake sya wanake ĩngĩ. 5Meekie ũu nĩkwĩthĩwa Mwĩai Ngai aĩ anamwĩaĩa Mwose amee atĩĩ, “Inyw'ĩ mwĩ andũ me ngoo mbũmũ. Kethĩwa nĩnĩendany'a nenyu vandũ va kavinda kanini nĩũmũmina vyũ. Yu umyai syĩndũ syenyu sya wanake na nĩngũsũanĩa ũndũ ngwĩkana nenyu.” 6Kwoou ĩtina wa andũ ma Ĩsilaeli kuma Kĩĩmanĩ kya Sinaĩ, mayaaĩkĩa ĩngĩ syĩndũ sya wanake.
Ĩeema Ĩtheu ya Kũkomanĩa na Mwĩai Ngai
7Mwose nĩwakothaa kwosa Ĩeema na kũyamba nza, vaasa na maeema ala angĩ, na kũyĩta Ĩeema ĩtheu ya kũkomanĩa na Mwĩai Ngai. Mũndũ o na wĩva ũla ũkwenda kũmanya ũndũ kuma kwa Mwĩai Ngai, nĩwaumaalaa akathi Ĩeemanĩ yĩu. 8Ĩvindanĩ yĩla Mwose ũkumaala athi Ĩeemanĩ yĩu, kĩla mũndũ nĩwaũngamaa mũomonĩ wa Ĩeema yake na kũmũsyaĩĩsya Mwose nginya akathi kũlika Ĩeemanĩ yĩu ya kũkomanĩa na Ngai. 9Yĩla Mwose walika Ĩeemanĩ kĩla kĩtuĩ kya mũumbĩ nĩkyatheeaa kĩkaũngama mũomonĩ wa Ĩeema, nake Mwĩai Ngai aineena na Mwose kuma kĩtuĩnĩ kĩu kya mũumbĩ. 10Andũ mamina kwona kĩtuĩ kĩu kya mũumbĩ kĩũngyĩ mũomonĩ wa Ĩeema, nĩmakumanaa makathaitha, kĩla mũndũ e mũomonĩ wa Ĩeema yake. 11Mwĩai Ngai nĩwaneenaa na Mwose metho kwa metho, o tondũ mũndũ ũneenaa na mũnyanyae, na ĩndĩ Mwose aisyoka maeemanĩ. Ĩndĩ mũtetheesya wake ũla mwanake weetawa Yosua mwana wa Nuni nĩwatiĩlawa Ĩeemanĩ yĩu ya kũkomanĩa na Ngai.
Mwĩai Ngai Ayatha Andũ make kana Akeethĩawa namo
12Mwose nĩweeie Mwĩai Ngai atĩĩ, “Nĩw'o we nũmbĩĩte nĩtongoesye andũ aa mathi nthĩ ĩsu, ĩndĩ ndwaandavya ũla ũũndũmanĩsya nake. Ũnambĩie kana nũmbĩsĩ nesa na nĩwendeeaw'a ninyie. 13Ethĩwa nĩwendeeaw'a ninyie, manyĩsya nzĩa syaku ngũmanye na ngĩendeeaa kwona ũseo kuma vala ũĩ. Lilikana kana andũ aa nĩ maku.”
14Mwĩai Ngai nĩwasũngĩie Mwose amwĩa atĩĩ, “Nĩngũendany'a naku na ngakũnengae mũuo.”
15Mwose amũsũngĩa amwĩa, “Ethĩwa ndwĩendany'a naitũ, ndũketĩkĩle tume vaa. 16Kũkamanyĩka ata kana nĩwendeeaw'a ninyie na andũ maku walea kũendany'a naitũ? Nĩ kyaũ kĩngĩ kĩkatũvathũkany'a nyie na andũ maku kuma kwa andũ ala angĩ me kũũ ĩũlũ wa nthĩ?”
17Mwĩai Ngai amũsũngĩa amwĩa atĩĩ, “Nĩngwĩka ũndũ ũsu wangũlya nũndũ nĩnendeeaw'a nue na nĩngwĩsĩ nesa.”
18Mwose amwĩa, “Nĩngũkwĩsũva, yu mbony'e ũtheu waku mũtisu.” 19#Alo 9.15 Nake Mwĩai Ngai amwĩa, “Ngatuma wona ũseo wakwa w'onthe, na ngatavany'a ĩsyĩtwa yakwa nyie Mwĩai Ngai. Ngamwĩkaa nesa ũla nĩenda kũmwĩka nesa, na kũmwĩw'ĩa tei ũla nĩenda kwĩw'ĩa tei. 20Ĩndĩ ndiketĩkĩla wone ũthyũ wakwa nĩkwĩthĩwa vai mũndũ ũmbona akalea kũkw'a.”
21Mwĩai Ngai nĩwaendeeie na kũmwĩa Mwose atĩĩ, “Vakuvĩ nakwa ve vandũ ve ĩvia ũtonya kũũngama ĩũlũ. 22Ũtheu wakwa mũtisu ũendee na kũvĩtũka, nĩngũũlikya katĩkatĩ wa mavia na ngĩũvithany'a na kĩtaa kya kw'oko kwakwa nginya nĩvĩtũke. 23Nĩvo ĩndĩ nĩvetanga kw'oko kwakwa na ũimbona mũongo; ĩndĩ ũthyũ wakwa ndwaĩlĩte kwoneka.”
Currently Selected:
Kuma 33: KAMBA
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011
