Kuma 34

Mwose Aiseũvya Masengea Angĩ Elĩ ma Mavia

(Kũt 10.1-5)

1Mwĩai Ngai nĩwaneenie na Mwose amwĩa atĩĩ, “Asũvya masengea angĩ elĩ ma mavia mailyĩ ta ala ma mbee, nakwa nĩngũmaandĩka ndeto ila syaĩ masengeanĩ ala ma mbee wooaie. 2Ĩyũmbany'e ũnĩ kĩoko, na ũyũka Kĩĩmanĩ kya Sinaĩ ĩũlũ tũkomanĩe vo. 3Ndũkokany'e na mũndũ o na ũmwe kana mũndũ o na wĩva onekele kĩĩmanĩ kĩu. Malondu, mbũi, na ng'ombe o nasyo iikaĩthw'e vakuvĩ na kĩĩma kĩu.” 4Kwoou Mwose nĩwasũvisye masengea angĩ elĩ ma mavia mailyĩ ta ala ma mbee. Ũnĩ ũsu kwakya tene nĩwaendie Kĩĩmanĩ kya Sinaĩ ĩũlũ o tondũ Mwĩai Ngai wamwĩaĩe; nĩwakuĩte masengea asu elĩ ma mavia na moko.

5Mwĩai Ngai nĩwatheeie kĩĩmanĩ e nthĩnĩ wa ũla mũumbĩ. Nĩwaũngamie vau e na Mwose na eetavany'a kana nĩwe Mwĩai Ngai. 6#Kuma 20.5-6; Mot 14.18; Kũt 5.9-10; 7.9-10 Mwĩai Ngai nĩwavĩtĩle mbee wa Mwose na asya atĩĩ, “Nyie, Mwĩai Ngai, nĩ Ngai wĩ tei na nĩ mũseo; ndithataa mĩtũkĩ, nĩ wendo mwingĩ ũtaolekaa na nĩ wa kũĩkĩĩwa. 7Nĩnonanasya wendo wakwa mwingĩ kwa nzyawa mbingĩ, na kũekea andũ mavĩtyo, mothũku na naĩ syoo. Ĩndĩ ndikalea kũkany'a syana syoo, na nzũkũlũ syoo o na kũvika nzyawa ya katatũ na ya kana kwondũ wa naĩ sya asyai masyo.”

8Mwose nĩwakumanie na mĩtũkĩ na amũthaitha Mwĩai Ngai, 9na asya atĩĩ, “Mwĩai Ngai, ethĩwa kwa w'o nĩwendeeaw'a ninyie, nĩngũũkũlya ũendany'e naitũ. Andũ aa me ngoo mbũmũ, ĩndĩ tũekee mavĩtyo na naĩ sitũ, na kũtwĩtĩkĩla ta andũ maku we mwene.”

Mwĩai Ngai Aiseũvya Ũtianĩo ĩngĩ na Andũ make

(Kuma 23.14-19; Kũt 7.1-5; 16.1-17)

10Mwĩai Ngai nĩweeie Mwose, “Sisya, yu nĩngũseũvya ũtianĩo na andũ ma Ĩsilaeli. Nĩmekwona ngĩka maũndũ ma kũseng'ya ala mataaĩkwa katĩ wa andũ ĩũlũ wa nthĩ. Andũ onthe nĩmekwona maũndũ ma kũseng'ya ala nyie Mwĩai Ngai ndonya kwĩka nũndũ nĩngwĩka ũndũ wa kũtelemya kũla ũĩ. 11Ĩanĩsya maũndũ ala ngũkwĩaĩa ũmũnthĩ. Nĩngũlũngya Aamoli, Akanaani, Aititi, Avelisi, Aivi, na Ayevusi maume mbee wenyu. 12Ĩsũvĩe kũseũvya wĩw'ano na andũ ma nthĩ ĩla ũendete nũndũ ũsu nũtonya kwĩthĩwa mũteo mũthũku kwenyu. 13#Kũt 16.21 Vandũ va ũu, anangai ithembeo syoo na kwananga ituĩ syoo sya ũthaithi na kũtemanga ituĩ sya ngai yoo nga ĩla yĩtawa Asela.

14“Ndũkathaithe ngai ĩngĩ nĩkwĩthĩwa nyie Mwĩai Ngai, ũla ĩsyĩtwa yakwa nĩ Wĩ kĩwĩu, nĩ Ngai wĩ kĩwĩu. 15Ĩsũvĩe kũseũvya wĩw'ano na andũ ala mekalaa nthĩ ĩsu; nĩkwĩthĩwa yĩla methaitha ngai syoo na kũithembea, makakũthokya wĩthĩwe vamwe namo na ũilika ũtatonĩ wa kũya lĩu ũla maumĩsye ngai isu. 16Ana maku, o ta ũu, nĩmatonya kũtwaa aka asu aeni, namo aka asu maitongoesya ana maku kwĩthĩwa mate aĩkĩĩku kwakwa na kũthaitha ngai syoo, sya andũ matamwĩsĩ Ngai.

17 # Kuma 20.4; Ali 19.4; Kũt 5.8; 27.15 “Ndũkeseũvĩsye ngai sya kyũma kĩtwekethetw'e kwa kũvĩvw'a na mwaki na kũithaitha.

18 # Kuma 12.14-20; Ali 23.6-8; Mot 28.16-25 “Tanĩaa Mboka ya Mũkate ũte Mbota. Vandũ va mĩthenya mũonza, ĩsaa mũkate ũtemwĩkĩe mbota kwĩanana na ũndũ nakwĩaĩe. Ĩkaa ũu ĩvindanĩ yĩla ĩnyuve, ya mwei wa mbee ũla wĩtawa Avivu, nĩkwĩthĩwa mweinĩ ũsu nĩw'o waumie nthĩ ya Misili.

19 # Kuma 13.2 “Kĩla kana ka mbee ka kavĩsĩ na nyamũ nũme ya mbee kũsyawa ya ng'ombe, mbũi, na malondu nĩ syakwa. 20#Kuma 13.13 Ĩndĩ no nginya wovosye ĩng'oi ya mbee ĩũme kuma kwakwa kwa nzĩa ya kũnengane katena ka ĩlondu vandũ vayo. Ethĩwa ndũkwenda kũyovosya, yĩtũle ngingo. O ta ũu no nginya wovosye kana ka mbee ka kavĩsĩ.

“Ndũkaaũke kũnthaitha ũtakuĩte nthembo.

21 # Kuma 20.9-10; 23.12; 31.15; 35.2; Ali 23.3; Kũt 5.13-14 “Wĩna mĩthenya thanthatũ ya kũtethya wĩa waku, ĩndĩ mũthenyanĩ wa mũonza ũkathũmũaa o na ethĩwa nĩ ĩvinda ya kũĩma kana nĩ ĩvinda ya ngetha.

22 # Ali 23.15-21,39-43; Mot 28.26-31 “Ĩthĩawa na Mboka ya Ngetha yĩla wambĩĩa kũketha ũsyao wa mbee wa nganũ yaku. O ta ũu ĩthĩawa na mboka ya Tũsũmba twa Matũ ĩvindanĩ ya mbevo yĩla ũkũmbany'a ũsyao wa matunda maku.

23“Kĩla mwaka, mavinda atatũ, aũme maku onthe makookaa kũnthaitha nyie Mwĩai Ngai Mũsumbĩ, Ngai wa Ĩsilaeli. 24Ngalũngya mbaĩ sya andũ syume mbee waku na kwongeleela mĩvaka ya nthĩ yaku, na vai mũndũ ũkew'ĩa nthĩ yaku ĩtomo yĩla wooka mbee wakwa nyie Mwĩai Ngai, Ngai waku mavinda atatũ kwa mwaka kũnthaitha.

25 # Kuma 12.10 “Ndũkambumĩsye nthembo ya nthakame ĩvulanĩtw'e na mũkate ũuĩtwe na mbota. O ta ũu ndũkaeke nthembo yumĩtw'e ĩvindanĩ ya Mboka ya Vasaka yĩkale kũvika mũthenya ũla ũatĩĩe.

26 # Kũt 14.21; 26.2 “Etae kĩla kĩseo kya ũsyao wa mbee wa nthĩ yaku nyũmbanĩ ya Mwĩai Ngai, Ngai waku.

“Ndũkaue nyama sya katena ka ĩlondu kana ka mbũi na ĩia ya inyia wako.”

27Nĩvo ĩndĩ Mwĩai Ngai wamwĩie Mwose atĩĩ, “Andĩka ndeto isu nũndũ nĩsyo nĩendee kũatĩĩa ngĩseũvya ũtianĩo katĩ wakwa naku na andũ ma Ĩsilaeli.” 28Mwose nĩwekalanilye na Mwĩai Ngai kĩĩmanĩ vandũ va mĩthenya mĩongo ĩna, ũtukũ na mũthenya ate kũya kana kũnyw'a kĩndũ. Nĩwaandĩkie ala masengeanĩ ma mavia ndeto sya ũtianĩo ũsu nayo nĩ ĩla Mĩao ĩkũmi.

Mwose Aitheea kuma Kĩĩmanĩ kya Sinaĩ

29 # 2Ako 3.7-16 Yĩla Mwose watheeie kuma Kĩĩmanĩ kya Sinaĩ akuĩte ala masengea, ũthyũ wake nĩwatisatisaa nũndũ aumĩte kũneena na Ngai, ĩndĩ we ndamanyaa.

30Yĩla Alũni na andũ ma Ĩsilaeli moonie Mwose, na moona ũthyũ wake ũitisatisa, nĩmakĩie kũmũthengeea. 31Ĩndĩ Mwose ameta, na Alũni na atongoi onthe ma andũ ma Ĩsilaeli mathi vala ũĩ, na Mwose aneena namo. 32Ĩtina wa ũu andũ onthe ma Ĩsilaeli nĩmoombanĩie vala ve Mwose na Mwose, amatavya mĩao yonthe ĩla Mwĩai Ngai wamũnengie me Kĩĩmanĩ kya Sinaĩ. 33Mwose amina kũneena namo, nĩweevw'ĩkie ũthyũ na kĩtambaa. 34Ĩndĩ yĩla wathi Ĩeemanĩ ya kũkomanĩa na Mwĩai Ngai akaneene nake, nĩwaumasya kĩtambaa kĩu nginya yĩla ũkauma vo. Yĩla waumaala na kũtavya andũ ma Ĩsilaeli ũndũ weeaĩwa, 35nĩmoonaa ũthyũ wake ũitisatisa. Kwoou Mwose nĩweeyovaa kĩla kĩtambaa ũthyũ ĩngĩ nginya yĩla ũkathi kũneena na Mwĩai Ngai ĩngĩ.

Currently Selected:

Kuma 34: KAMBA

Highlight

Compare

Copy