Kuma 7

1Mwĩai Ngai nĩwaneenie na Mwose amwĩa atĩĩ, “Nakũtw'ĩkĩthya ta Ngai kũla kwĩ mũsumbĩ wa Misili, nake mwana-a-inyia waku Alũni, akeethĩawa ta mwathani waku. 2Ũkatavasya Alũni maũndũ onthe ala nakwĩaĩa, nake aitavya mũsumbĩ alekye andũ ma Ĩsilaeli maume nthĩ yake. 3#Meko 7.36 Ĩndĩ ngoomĩthya ngoo ya mũsumbĩ, na o na noonany'a vinya wakwa na kwĩka maũndũ ma kũseng'ya nthĩ ya Misili, 4ndakamwĩthukĩĩsya. Nĩvo ĩndĩ nakwa nĩetee nthĩ ya Misili ũkany'o mũnene na kumya andũ makwa ma Ĩsilaeli nthĩ ĩsu. 5Kwoou andũ ma Misili makamanya kana ninyie Mwĩai Ngai yĩla nĩtũmĩa ũtonyi wakwa ĩũlũ woo na kumya andũ ma Ĩsilaeli nthĩ yoo.” 6Mwose na Alũni nĩmeekie kĩla ũndũ kwĩanana na ũndũ Mwĩai Ngai wameyĩaĩĩte. 7Ĩvinda yĩu maneenaa na mũsumbĩ wa Misili, Mwose aĩ na ũkũũ wa myaka mĩongo nyanya, nake Alũni aĩ na ũkũũ wa myaka mĩongo nyanya na ĩtatũ.

Ndata ya Alũni Ĩkĩalyũka na Kũtw'ĩka Nzoka

8Mwĩai Ngai nĩweeie Mwose na Alũni atĩĩ, 9“Ethĩwa mũsumbĩ akamwĩa mwĩke kyama kya kwonany'a kana nĩnĩmũtũmĩte, wĩmwĩa Alũni ose ĩla ndata yake na aimĩlekya vau nthĩ mbee wa mũsumbĩ, nayo ĩkaalyũka ĩtw'ĩke nzoka.” 10Kwoou Mwose na Alũni nĩmaendie kũla kwĩ mũsumbĩ na meeka o ũndũ Mwĩai Ngai wameaĩĩte. Alũni nĩwalekilye ndata yake vau nthĩ mbee wa mũsumbĩ na anini make nayo yaalyũka yatw'ĩka nzoka. 11Nĩvo ĩndĩ mũsumbĩ waisye nĩetĩwe andũ oĩ na awe ma Misili ala meekaa syama. Andũ asu o namo nĩmeekie syama syoo o ta kĩu kya Alũni. 12Nĩmalekangilye ndata syoo vau nthĩ, nasyo syaalyũka syatw'ĩka nzoka. Ĩndĩ isu syoo nĩsyamelilw'e nĩ ĩsu ya Alũni. 13Ĩndĩ ũu wĩ o vo, mũsumbĩ nĩwaendeeie na kũmya ngoo, na o tondũ Mwĩai Ngai waneenete, mũsumbĩ alea kwĩthukĩĩsya Mwose na Alũni.

Maũndũ ma Kũthĩny'a Andũ Mayĩkwa Nthĩ ya Misili

Ngai Aikany'a Andũ ma Misili kwa Kũmaetee Nthakame

14Nĩvo ĩndĩ Mwĩai Ngai weeie Mwose atĩĩ, “Mũsumbĩ nĩwũmĩtye ngoo na nũkũlea kũlekya andũ mathi. 15Kwoou thi ũkakomane nake ũnĩ kwakya aendete ũsĩnĩ wa Naeli. Wĩmweteela vau ũtee wa ũsĩ na wĩĩthĩwa ũkwete ĩla ndata ĩnaalyũkĩte ĩkatw'ĩka nzoka. 16Na ĩndĩ ũimwĩa mũsumbĩ atĩĩ, ‘Mwĩai Ngai, Ngai wa Aevelania nũndũmĩte vala ũĩ ngũtavye ũlekye andũ make nĩ kana mathi weũnĩ makamũthaithe. Ĩndĩ kũvika vau nũleete. 17#Ũvu 16.4 Kwoou we mũsumbĩ, Mwĩai Ngai easya nũkwĩka ũndũ ũtie wamanya nĩwe ũũ. Nĩthi nĩkũne kĩw'ũ kĩya kĩ ũsĩnĩ wa Naeli na ndata ĩno ngwete na kyonthe nĩkĩkũalyũka kĩtw'ĩke nthakame. 18Makũyũ ala mevo nĩmeũkw'a, na ũsĩ w'onthe ũinyunga naĩ mũno wĩthĩe andũ ma Misili mainyw'ĩkya kĩw'ũ kya w'o.’ ”

19Mwĩai Ngai nĩweeie Mwose atĩĩ, “Tavya Alũni nĩose ĩla ndata yake na aimyũkĩlya amyelekelye kw'onthe kũla kwĩ kĩw'ũ nthĩ ya Misili: Mbũsĩnĩ, mĩtaũnĩ ya kwĩsĩlya kĩw'ũ, silanganĩ na ndianĩ syonthe. Kĩw'ũ kĩla kĩ kũndũnĩ kũu kw'onthe nĩkĩkũalyũka kĩtw'ĩke nthakame, na kĩla vandũ nthĩ ĩsu veĩthĩwa na nthakame, o na mĩionĩ ya ĩikonĩ, ya mĩtĩ na ya mavia.”

20Mwose na Alũni nĩmeekie ũu Mwĩai Ngai wameaĩe. Vau mbee wa mũsumbĩ na anini make, Alũni nĩwookĩlilye ndata yake akũna kĩw'ũ kya Ũsĩ wa Naeli na kĩw'ũ kyonthe kya ũsĩ ũsu kyaalyũka kyatw'ĩka nthakame. 21Makũyũ ala maĩ ũsĩnĩ ũsu nĩmakwie mathela, na ũsĩ ũsu w'onthe wanyunga naĩ mũno weethĩa andũ ma Misili mainyw'ĩkya kĩw'ũ kyaw'o, na kĩla vandũ nthĩ ĩsu veethĩwa nthakame. 22Nĩvo ĩndĩ o namo ala eki ma syama ma Misili matumie kĩw'ũ kĩtw'ĩka nthakame kwa kwĩka syama syoo. Mũsumbĩ nĩwaendeeie kũmya ngoo o ta tene, na o tondũ Mwĩai Ngai waneenete, mũsumbĩ ndaaĩtĩkĩla kwĩthukĩĩsya Mwose na Alũni. 23Vandũ va ũu, nĩwakwatie nzĩa asyoka nyũmbanĩ yake ya kĩ-ũsumbĩ, na ndaatinda aikwatĩĩa ũndũ ũsu Mwose na Alũni meekie. 24Andũ onthe ma Misili nĩmenzangie kũu ũtee wa Ũsĩ wa Naeli makwate kĩw'ũ manyw'e, nĩkwĩthĩwa mayaĩ manyw'ĩkya kĩw'ũ kya ũsĩ ũsu. 25Nĩvathelile matukũ mũonza ĩtina wa Mwĩai Ngai aalyũla kĩw'ũ kya Ũsĩ wa Naeli kyatw'ĩka nthakame.

Currently Selected:

Kuma 7: KAMBA

Highlight

Compare

Copy