Kuma 8
8
Ngai Aikany'a Andũ ma Misili kwa Kũmaetee Syoa
1Mwĩai Ngai nĩweeie Mwose atĩĩ, “Enda kwa mũsumbĩ ũkamwĩe nyie Mwĩai Ngai nĩasya, ‘Lekya andũ makwa mathi makanthaithe. 2Walea kũmalekya mathi, nĩngũsilĩla nthĩ yaku kwa kũete syoa syusũe kĩla vandũ ĩũlũ wayo. 3Ũsĩ wa Naeli nũkusũa syoa nginya syume vo ithi ikalike nyũmbanĩ yaku ya kĩ-ũsumbĩ vala ũkoomaa, ũkomonĩ waku, nyũmbanĩ sya anini maku na andũ ala angĩ maku; o ta ũu niũlika maikonĩ maku na syĩndũnĩ ila ingĩ syaku sya kũuĩa mĩkate. 4Syoa isu syĩĩthĩwa iithaanyũkanga ĩũlũ waku na andũ maku na ĩũlũ wa anini maku onthe.’ ”
5Nĩvo ĩndĩ Mwĩai Ngai weeie Mwose atĩĩ, “Tavya Alũni ũmwĩe nĩokĩlye ndata yake amyelekelye kũla kwĩ mbũsĩ, mĩtaũ ya kwĩsĩlya kĩw'ũ, na kũla kũngĩ kw'onthe kwĩ kĩw'ũ, nĩ kana syoa syũke inyaĩĩkĩe kĩla vandũ nthĩ ya Misili.” 6Kwoou Alũni nĩwookĩlilye ndata amyelekelya kũla kwĩ kĩw'ũ kw'onthe na syoa mbingĩ syooka, syanyaĩĩkĩa kĩla vandũ nthĩ ĩsu ya Misili. 7Ĩndĩ o namo eki ma syama ma Misili nĩmatumie syoa syũka kĩla vandũ nthĩ ya Misili kwa kwĩka syama syoo.
8Mũsumbĩ nĩwatũmanie Mwose na Alũni na amea atĩĩ, “Voyai Mwĩai Ngai avete syoa ii kuma vala nĩĩ na kuma vala ve andũ makwa, nakwa nĩngũlekya andũ menyu mathi makamũthembee Mwĩai Ngai.”
9Mwose amũsũngĩa, “Nĩ mwanya waku ũndavye nĩ ĩndĩĩ yĩla ũkwenda nĩvoye kwondũ waku, anini maku na andũ ala angĩ maku onthe, nĩ kana syoa ivetangwe vala mũĩ na nyũmbanĩ syenyu na iitiwa ũsĩnĩ wa Naeli wĩ w'oka.”
10Mũsumbĩ amũsũngĩa, “Wĩtũvoyea ũnĩ.”
Mwose asya, “Ngeeka ũu wasya nĩ kana ũmanye vai ngai ĩngĩ o na yĩva ĩtonya kũvw'ananw'a na Mwĩai Ngai, ũla nĩwe Ngai waitũ. 11Syoa ikauma vala ũĩ, nyũmbanĩ syaku, na iyuma vala ve anini maku na vala ve andũ ala angĩ maku onthe; ikatiwa o ila syĩ ũsĩnĩ wa Naeli.” 12Mwose na Alũni nĩmaumie vala ve mũsumbĩ na Mwose athi avoya Mwĩai Ngai avetange syoa isu waetete kũla kwĩ Mũsumbĩ. 13Mwĩai Ngai nĩweekie o tondũ Mwose wamũvoyie na syoa ila syaĩ nyũmba nthĩnĩ, ila syaĩ kũu nza, na ila syaĩ ithekanĩ syakw'a syonthe. 14Andũ ma Misili nĩmasyũmbanisye mbumbu mbingĩ nginya nthĩ ĩsu yonthe yanyunga naĩ. 15Ĩndĩ yĩla mũsumbĩ woonie kana nĩkwaseũvanga, nĩwaendeeie kũmya ngoo, o tondũ Mwĩai Ngai waneenete, na alea kwĩthukĩĩsya Mwose na Alũni.
Ngai Aikany'a Andũ ma Misili kwa kũmaetee Mbangũle
16Mwĩai Ngai nĩweeie Mwose atĩĩ, “Tavya Alũni ũmwĩe nĩakũne mũthanga na ĩla ndata yake, na kĩla vandũ nthĩ ya Misili, kĩtoo nĩkĩkũalyũka kĩtw'ĩke mbangũle.” 17Nĩmeekie ũu mataviw'e; Alũni nĩwakũnie mũthanga na ndata ĩsu yake na kĩtoo kĩla kyaĩ nthĩ ĩsu yonthe kyaalyũka kyatw'ĩka mbangũle, na syakwata andũ na nyamũ. 18Ala eki ma syama nĩmatatie kwĩka syama syoo nĩ kana o namo maumĩlye mbangũle, ĩndĩ nĩmaemiwe vyũ. Kwoou mbangũle isu nĩsyoombĩĩie andũ na nyamũ. 19#Lk 11.20 Eki asu ma syama nĩmeeie mũsumbĩ atĩĩ, “Ngai nĩwe wĩkĩte kyama kĩĩ ũtonyinĩ wake!” Ĩndĩ mũsumbĩ nĩwaendeeie kũmya ngoo, na o tondũ Mwĩai Ngai waneenete, mũsumbĩ ndaaĩthukĩĩsya Mwose na Alũni.
Ngai Aikany'a Andũ ma Misili kwa Kũmaetee Ngi
20Mwĩai Ngai nĩweeie Mwose atĩĩ, “Ũnĩ kwakya wĩamũka tene ũthi ũkakomane na mũsumbĩ aendete ũsĩnĩ na ũimwĩa Mwĩai Ngai easya, ‘Lekya andũ makwa mathi nĩ kana makanthaithe. 21Walea kũmalekya mathi, nĩngũete ngi mbingĩ mũno ikũmbĩĩe we, anini maku na andũ ala angĩ maku onthe. O ta ũu niũlika nyũmbanĩ syonthe sya andũ ma Misili syusũe ki, na kũmbĩĩa kĩla vandũ wĩthĩe vaikinyĩka. 22Ĩndĩ nĩngũsiĩĩa kĩsio kya Ngoseni vala andũ makwa mekalaa kĩikalike ngi, nĩ kana ũmanye kana nyie Mwĩai Ngai ninyie nĩendee kwĩka maũndũ nthĩ ĩno ya Misili. 23Ũu nĩw'o nĩĩkĩa kĩvathũkany'o katĩ wa andũ makwa na ala maku. Kyama kĩu kĩkooneka ũnĩ.’ ” 24Mwĩai Ngai nĩweekie o tondũ waneenete, na kwoou ngi mbingĩ nĩsyookie na syalika nyũmbanĩ ya mũsumbĩ na nyũmbanĩ sya anini make, na nthĩ yonthe ya Misili yathũkw'a vyũ nĩsyo.
25Nĩvo ĩndĩ mũsumbĩ watũmanie Mwose na Alũni na amea atĩĩ, “Endai mũthembee Ngai wenyu mwĩ o vaa nthĩ ya Misili.” 26Mwose asũngĩa, “Tũitonya kwĩka ũu nĩkwĩthĩwa andũ ma Misili nĩmamenete nthembo sya mbaa indo ila tũũthi kũthembea Mwĩai Ngai, Ngai waitũ. Na ethĩwa tũkathemba nthembo imenetwe nĩ andũ ma Misili twĩ vandũ matonya kũtwona, makatũkimanga na mavia tũkw'e. 27No nginya tũthi kũndũ weũnĩ mũendo wa mĩthenya ĩtatũ tũkamũthembee Mwĩai Ngai waitũ, o tondũ ũkũtwĩaĩa.”
28Nĩvo ĩndĩ mũsumbĩ wameie atĩĩ, “Nĩngũmũlekya mũthi weũnĩ mũkathembee Mwĩai Ngai, Ngai wenyu. Ĩndĩ mũyaĩlĩte kũthi vaasa mũno. Mboyeei o nakwa.”
29Mwose nĩwasũngĩie asya, “Namina kuma vaa oou nĩngũvoya Mwĩai Ngai, na ũnĩ ngi ikauma vala ũĩ, vala ve athũkũmi maku, na andũ maku. Ĩndĩ ndũkatũkenge ĩngĩ na kũvata andũ ma Ĩsilaeli maithi kũthembea Mwĩai Ngai.” 30Kwoou Mwose nĩwaumie vala ve mũsumbĩ na avoya Mwĩai Ngai, nake 31Mwĩai Ngai eeka ũndũ Mwose wamũvoyie, na avetanga ngi vala ve mũsumbĩ, anini make na andũnĩ make onthe. Vai ngi o na ĩmwe yaatiala. 32Ĩndĩ mũsumbĩ nĩwoomisye ngoo yake ĩngĩ na alea kũlekya andũ ma Ĩsilaeli mathi.
Currently Selected:
Kuma 8: KAMBA
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011
