Ali 25
25
Mwaka wa Mũonza
(Kũt 15.1-11)
1 #
Kuma 23.10-11
Mwĩai Ngai nĩwaneenie na Mwose e Kĩĩmanĩ kya Sinaĩ amwĩa atĩĩ, 2“Neena na andũ ma Ĩsilaeli ũmee mwamina kũlika nthĩ ĩla nyie Mwĩai Ngai ngũmũnenga, mũkanenga ndaĩa kwa kũlea kũĩma nthĩ ĩsu kĩla mwakanĩ wa mũonza. 3Vandũ va myaka thanthatũ mũkavandaa lĩu mĩũndanĩ yenyu, na kũsea mĩsavivũ yenyu, na mũiketha ũsyao wa syĩndũ isu. 4Ĩndĩ mwaka wa mũonza nĩ mwaka ũla mĩũnda ĩtaĩlĩte kũĩmwa o na vanini, na nĩmũvathe kwondũ wa Mwĩai Ngai. Mũyaĩlĩte kũvanda kĩndũ mĩũndanĩ yenyu, kana kũsea mĩsavivũ yenyu. 5Mũikakethe kĩndũ o na kĩva kĩla kĩĩmesya mĩũndanĩ ta metĩkĩa, kana kũtw'a nzavivũ kuma mĩsavivũnĩ ĩla ĩte mĩsee. Mwakanĩ ũsu mĩũnda ndĩkavandawe kĩndũ. 6O na vala mĩũnda ĩsu nĩtiĩtwe na ĩkalea kũĩmwa vandũ va mwaka ũsu ũmwe, ĩkeethĩawa na lĩu ũtonya kũĩwa ninyw'ĩ, ngombo syenyu, athũkũmi menyu ma aka na ma aũme, aeni ala matwĩe katĩ wenyu, 7indo syenyu, na nyamũ sya kĩthekanĩ. Lĩu w'onthe ũla mĩũnda ĩsu ĩkasyaa nũtonya kũĩwa.
Mwaka wa Kũtũnganĩa Syĩndũ
8“Mũkatalaa myaka mũonza mavinda mũonza, yonthe yĩthĩwe myaka mĩongo ĩna na kenda. 9Nĩvo ĩndĩ mũthenyanĩ wa ĩkũmi wa mwei wa mũonza ũla nĩw'o Mũthenya wa ũekeo wa naĩ, mwĩtũma mũndũ avuve soo kĩla vandũ nthĩ yenyu yonthe. 10Kwa nzĩa ĩsu mũkavathaa mwaka wa mĩongo ĩtano na kũtavany'a ũthasyo kwa andũ onthe ala matwĩe nthĩ yenyu. Mwakanĩ ũsu mĩũnda yonthe ĩla yathooiw'e no nginya itũngĩwe ene ala mamĩthooisye kana nzyawa syoo, na mũndũ o na wĩva ũla wathooiwe ethĩwe ngombo aithaw'a asyoke kwa andũ ma mũsyĩ wake. 11Mwakanĩ ũsu mũikaavande kĩndũ mĩũndanĩ yenyu, kana kũketha ũsyao wa metĩkĩa, kana kũtw'a nzavivũ kuma mĩsavivũnĩ ĩte mĩsee. 12Mwaka ũsu w'onthe ũkeethĩawa wĩ mwaka mũtheu kwenyu, na mũkaĩsaa lĩu wa metĩkĩa w'oka kuma mĩũndanĩ yenyu.
13“Mwakanĩ ũsu mĩũnda yonthe ĩla yathooiw'e ĩtũngĩwe ene. 14Kwoou ethĩwa mũndũ nũkũteea mũndũ ũngĩ wa Ĩsilaeli kĩtheka kana nũkũthooa kĩtheka kuma kwake, mũikakengane ene kwa ene. 15Thooa wa kĩtheka kĩu ũkamanyĩkaa kwĩanana na myaka ĩla mũũnda ũtonya kũvandwa na kũkethwa, mbee wa Mwaka ũla ũngĩ wa Kũtũnganĩa syĩndũ ũte mũviku. 16Ethĩwa myaka ĩla ĩtialĩte nĩ mingĩ, thooa wa kĩtheka kĩu waĩlĩte kwĩthĩwa wĩ ĩũlũ, ĩndĩ ethĩwa vatialĩte myaka mĩnini, thooa wakyo ũkeethĩawa wĩ ĩtheo, nũndũ kĩla kĩĩthĩawa kĩithoow'a nĩ ngetha ĩla ĩtonya kuma mũũndanĩ ũsu. 17Mũikakengane ene kwa ene, ĩndĩ mwĩw'ei Ngai wenyu; ninyie Mwĩai Ngai, Ngai wenyu.
Lĩu ũla Wĩĩsawa Mwakanĩ wa Mũonza
18“Atĩĩai motw'ĩo na kwĩanĩsya myamũlo yakwa na kwĩka ũndũ ĩkwasya, nĩ kana mwĩkale nthĩ ya Kanaani mwĩ ũsũvĩonĩ. 19Nthĩ ĩsu ĩkeethĩawa na ngetha na mũkeethĩawa na lĩu mwingĩ na kwĩkalaa mwĩ ũsũvĩonĩ.
20“Ĩndĩ mũndũ nũtonya kũkũlya, ‘Tũkaya kyaũ mwakanĩ wa mũonza, yĩla twĩĩthĩawa tũteũvanda kĩndũ mĩũndanĩ kana kũketha?’ 21Mwakanĩ wa thanthatũ ngamũathima na ngetha mbingĩ mwĩkale mũiya vandũ va myaka ĩtatũ. 22Mwakanĩ wa nyanya yĩla mũũvanda mbeũ mĩũndanĩ yenyu, mũkeethĩawa mũiya lĩu ũla mwakethie mwakanĩ wa thanthatũ, na lĩu ũsu ũkeethĩawa ũtonya kũmwĩanĩa nginya yĩla mwĩketha lĩu ũsu mwavanda.
Kũtũngĩwa Nthĩ ĩla Mũndũ Ũminĩte Kũthoosya
23“Mũikaathoosye nthĩ yenyu wĩthĩe mũitonya kũmĩtũngĩwa ĩngĩ, nũndũ nthĩ ĩsu ti yenyu; nĩ yakwa nyie Ngai, na inyw'ĩ nĩ ta aeni nĩnengete mwanya wa kũmĩtũmĩa.
24“Nthĩnĩ wa nthĩ yonthe ya ng'ũndũ yenyu yĩla mũndũ wathoosya kĩtheka, no nginya anengwe mwanya wa kũĩva kĩtw'ĩke kyake ĩngĩ. 25Ethĩwa mũndũ wa mbaĩ ya Ĩsilaeli nĩwatw'ĩka ngya na athoosya kĩsio kya kĩtheka kyake, mũndũ wa mũsyĩ wake nĩaĩvĩe kĩtheka kĩu kĩtũngĩwe mwene. 26Ĩndĩ ethĩwa mũndũ ũsu ngya nde na mũndũ wa mũsyĩ wake ũtonya kwovosya kĩtheka kĩu nĩ kana akĩtũngĩwe, ĩndĩ we mwene ayĩsa kũendeea nesa na aikwata mbesa itonya kũkĩthooa ĩngĩ, 27nĩaĩve mũndũ ũla ũnakĩthooete mbesa itonya kũĩvĩa myaka ĩla ĩtialĩte mbee wa Mwaka wa Kũtũnganĩa syĩndũ ũtanavika, na aitũngĩwa kĩtheka kyake. 28Ĩndĩ ethĩwa mũndũ ũsu nde na mbesa syĩanĩĩe kũĩvĩa kĩtheka kĩu atũngĩwe, kĩtheka kĩu kĩkaendeea kwĩthĩwa kĩkya mũndũ ũla ũkĩthooete nginya yĩla Mwaka wa Kũtũnganĩa syĩndũ wĩvika. Mwakanĩ ũsu kĩtheka kĩu kĩkatũngĩwa mwene wakyo.
29“Ethĩwa mũndũ nĩwathoosya nyũmba yake ĩla yakĩtwe nthĩnĩ wa ndũa mbiĩĩe, mũndũ ũsu e na mwanya wa kũĩvĩa nyũmba ĩsu ĩtw'ĩke yake ĩngĩ mwakanĩ wa mbee ĩtina wa kũmĩthoosya. 30Ĩndĩ alea kũĩvĩa nyũmba ĩsu ĩtw'ĩke yake ĩngĩ mwaka ũsu ũtanathela, mũndũ ũsu ndethĩawa atonya kũtũngĩwa nyũmba ĩsu ĩngĩ, na kwoou yĩthĩawa yamew'a vyũ nĩ ũla wamĩthooie e na nzyawa syake. Mwakanĩ wa Kũtũnganĩa syĩndũ wavika, nyũmba ĩsu ndĩkatũngĩwa mwene. 31Nyũmba ila syakĩtwe motũinĩ mate maiĩĩe ikeekawa o tondũ itheka syaĩlĩte kwĩkwa; mũndũ ũla wathoosya nyũmba yake e na mwanya wa kũmĩĩvĩa ĩtw'ĩke yake ĩngĩ. Nyũmba isu syaĩlĩte kũtũngwa Mwakanĩ wa Kũtũnganĩa syĩndũ wavika. 32Ĩndĩ ũu wĩ o vo, Alivai me na mwanya wa kũĩvĩa nyũmba syoo ila syĩ nthĩnĩ wa ndũa syoo ĩvindanĩ o na yĩva itw'ĩke syoo ĩngĩ. 33Ethĩwa Mũlivai nĩwathoosya nyũmba yĩ ndũanĩ isu syoo, na ailea kũmĩĩvĩa nĩ kana atũngĩwe nyũmba ĩsu ĩngĩ, nyũmba ĩsu no nginya ĩtũngĩwe mwene Mwakanĩ wa Kũtũnganĩa syĩndũ, nũndũ nyũmba sya Alivai ila syĩ ndũanĩ isu nĩ syoo, manengetwe kuma andũnĩ ma Ĩsilaeli syĩthĩwe syoo mavinda onthe. 34Ĩndĩ isesi sya kũĩthĩsya ila ithyũlũlũkĩte ndũa sya Alivai iyaĩlĩte kwĩsa kũthoow'a o na ĩndĩĩ; ĩsu nĩ ng'ũndũ yoo ĩvinda yonthe.
Mĩao ĩũlũ wa Kũkovethya Ngya
35 #
Kũt 15.7-8
“Ethĩwa ũmwe wa andũ ma Ĩsilaeli o taku nĩwatw'ĩka ngya, na eethĩwa atetonya, no nginya ũmũtethye o ũndũ ũtonya kũtetheesya mũeni wĩkalaa kwaku, nĩ kana aendee kwĩkalany'a naku. 36Ndũkose ũtandĩthyo kuma kwa mũndũ ũsu ngya, ĩndĩ mũkĩe Ngai, na ũiekana na mũndũ ũsu wa Ĩsilaeli o taku mwĩkalany'e. 37#Kuma 22.25; Kũt 23.19-20 Ndũkamũkovethye mbesa nĩ kana ũkwate ũtandĩthyo wasyo, kana kũmũnenga lĩu na ũyenda akũtũngĩe mwingĩ mbee wa lĩu ũla ũmũnengete. 38Ninyie Mwĩai Ngai, Ngai wenyu ũla wamumisye nthĩ ya Misili, nĩ kana nĩmũnenge nthĩ ya Kanaani na ndyĩthĩwa Ngai wenyu.
Kũthaw'a kwa Ngombo
39 #
Kuma 21.2-6; Kũt 15.12-18 “Ethĩwa ũmwe wa andũ ma Ĩsilaeli o taku nĩwatw'ĩka ngya, kũvikĩa eethoosya kũla ũĩ ethĩwe ngombo, ndũkaamũkue ta ngombo. 40Nĩekale kwaku ta mũthũkũmi kana ta mũeni, na aikũthũkũma nginya Mwaka wa Kũtũnganĩa syĩndũ ũvike. 41Ĩvindanĩ yĩu we e na syana syake makauma kwaku na maisyoka kũla kwĩ andũ ma mũsyĩ woo, vala ve ng'ũndũ ya aaũmae moo. 42Andũ ma Ĩsilaeli nĩ athũkũmi makwa nyie Mwĩai Ngai, ala naumisye nthĩ ya Misili, na kĩu nĩkyo kitumi mataĩlĩte kũthoow'a ta ngombo. 43Ndũkameke naĩ, ĩndĩ ĩthĩwa wĩ mwĩwi kwa Ngai waku. 44Ethĩwa mũndũ nũkwenda ngombo sya aũme kana sya aka, nũtonya kũithooa kuma andũnĩ ma mbaĩ ila imũthyũlũlũkĩte. 45O ta ũu mũndũ nũtonya kũthooa ngombo kuma andũnĩ ala matwĩe katĩ wenyu ta aeni, kana akathooa syana sya aeni asu ikatw'ĩka ngombo syake. 46Mũndũ ũsu nũtonya kũnengane ngombo isu ikatw'ĩka ũtiĩwa wa syana syake, ikaithũkũmaa ĩvindanĩ ya thayũ wasyo w'onthe. Ĩndĩ mũyaĩlĩte kwĩka mũndũ o na wĩva wa Ĩsilaeli naĩ.
47“Ethĩwa mũeni kana mũndũ ũtwĩe katĩ wenyu kwa kavinda nĩwatw'ĩka mũndũ mũthwii, na mũndũ ũngĩ wa andũ ma Ĩsilaeli aitw'ĩka ngya, na kwĩthoosya kũla kwĩ mũeni ũsu, kana kũla kwĩ ũmwe wa andũ ma mũsyĩ ũla mũeni ũsu wumĩte, 48ĩtina wa mũndũ ũsu mũthwii kũmũthooa, ngombo ĩsu yĩthĩawa yĩna mwanya wa kũthaw'a. Ngombo ĩsu nĩtonya kũthaw'a nĩ mwana-a-ĩthe, 49kana mwendw'a-ĩthe kana mwana wa mwendw'a-ĩthe, kana mũndũ o ũngĩ wa mũsyĩ wake. O ta ũu ethĩwa ngombo ĩsu ĩkakwata ũthwii nĩtonya kwĩyĩĩvĩa ĩkathaw'a. 50Ngombo ĩsu yĩw'ane na ũla wamĩthooie, na maitalana myaka ĩla ĩvĩtũkĩte kuma yĩla yeethooisye nginya Mwaka wa Kũtũnganĩa syĩndũ, na o ta ũu mayĩw'ana thooa ũla yaĩlĩte kũĩvwa nĩ kana ĩthaw'e. Thooa ũsu waĩlĩte kũtalwa kwĩanana na ĩtuvi yĩla mũthũkũmi waĩlĩte kũĩvwa vandũ va myaka ĩsu. 51Ethĩwa vatialĩte myaka mingĩ Mwaka wa Kũtũnganĩa syĩndũ ũvike, ngombo ĩsu ĩĩve mbesa mbingĩ sya ila yathooiwe nasyo. 52Ĩndĩ ethĩwa vatialĩte myaka mĩnini Mwaka wa Kũtũnganĩa syĩndũ ũvike, matalane mbesa kwĩanana na myaka ĩla ĩtialĩte na ngombo ĩsu ĩiĩva ũla wamĩthooete mbesa isu nĩ kana ĩthaw'e. 53Ngombo ĩsu yoswe ta mũthũkũmi ũandĩkĩtwe atuvawe kĩla mwaka. Mũnene wa ngombo ndaĩlĩte kũmĩka naĩ. 54Ethĩwa ngombo ĩsu ndĩnathaw'a kwĩsĩla ĩmwe ya nzĩa isu, no nginya ĩthaw'e vamwe na syana syayo Mwakanĩ ũla ũatĩĩe wa Kũtũnganĩa syĩndũ, 55nũndũ andũ ma Ĩsilaeli nĩ athũkũmi makwa ala naumisye nthĩ ya Misili. Ninyie Mwĩai, Ngai wenyu.”
Currently Selected:
Ali 25: KAMBA
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011