Ali 26
26
Moathimo kwondũ wa Kũmwĩw'a Ngai
(Kũt 7.12-24; 28.1-14)
1 #
Kuma 20.4; Ali 19.4; Kũt 5.8; 16.21-22; 27.1 Mwĩai Ngai nĩwaneenie asya atĩĩ, “Mũikeseũvĩsye ngai sya mĩvw'anano, kana kwasũvya mavisa masyo, kana ituĩ sya mavia, o na mũikasũvye mavia mũmathaithe. Ninyie Mwĩai Ngai, Ngai wenyu. 2Ĩanĩsyai mwĩao wa Savato, na kũnenga ndaĩa vandũ vala nĩthaithĩawa. Ninyie Mwĩai Ngai.
3 #
Kũt 11.13-15; 28.1-14 “Mweeka ũndũ motw'ĩo makwa mekwasya, na kwĩanĩsya mĩao yakwa, 4ngamuĩsya mbua ĩvindanĩ ya yo, nĩ kana mĩũnda yenyu yĩthĩwe na ngetha na mĩtĩ ĩisyaa matunda mayo. 5Mĩũnda yenyu ĩkeethĩawa na lĩu mwingĩ wĩthĩe mũendee na kũketha ngetha ya mbaa mbeke ĩvindanĩ ya kũketha nzavivũ, na mũiendeea kũketha nzavivũ ĩvindanĩ ya kũvanda mbeũ syenyu mĩũndanĩ. Mũkeethĩawa mwĩ na lĩu ũmwĩanĩe, na kũtũaa nthĩ yenyu mwĩ ũsũvĩonĩ.
6“Ngaete mũuo nthĩ yenyu na mũkakomaa mũteũkĩa mũndũ o na wĩva. Ngavetanga nyamũ nthũku sya kĩthekanĩ kuma nthĩ yenyu, na nthĩ ĩsu ndĩkethĩawa na kaũ o na vanini. 7Mũkasindaa amaitha menyu mwĩ kaũnĩ, na kũmoaa. 8Andũ menyu atano makeethĩawa matonya kũsinda amaitha ĩana, na andũ ĩana mayĩthĩwa matonya kũsinda amaitha ngili ĩkũmi, na mũkooaĩaa amaitha menyu kaũnĩ. 9Ngamũathima na kũtuma mũkwata syana mbingĩ mwĩthĩwe mwĩ aingĩ. Ngalĩkonĩ ĩla yakwa ngeanĩsya ũtianĩo wakwa nenyu. 10Mũkeethĩawa na ngetha mbingĩ ũkethĩa no mwĩkale na lĩu ũsu vandũ va mwaka mũima, o na mũyĩsa kwĩkya ũmwe ĩtheka wa ngetha ĩla ngũũ yĩĩthĩwa ĩtialĩte nĩ kana mwone vala mũkwĩkĩa ngetha ĩla nzaũ. 11Ngekalanasya nenyu, na ndikamũlea o na ĩndĩĩ. 12#2Ako 6.16 Ngeethĩawa vamwe nenyu; ngeethĩwa Ngai wenyu, nenyu mũyĩthĩwa andũ makwa. 13Ninyie Mwĩai Ngai, Ngai wenyu ũla wamumisye nthĩ ya Misili nĩ kana mũikaendee kwĩthĩwa mwĩ ngombo sya andũ ma nthĩ ĩsu. Nĩnaanangie ũkũmũ ũla waĩ ĩũlũ wenyu, na natuma mwambĩĩa kũthi mũtekũkĩa mũndũ o na ũmwe.”
Ũkany'o Kwondũ wa Kũlea Kũmwĩw'a Ngai
(Kũt 28.15-68)
14Mwĩai Ngai nĩwaendeeie kũneena asya atĩĩ, “Mwalea kũmbĩw'a na kwĩanĩsya mĩao yakwa yonthe ngamũkany'a. 15Mwalea motw'ĩo makwa na kũlea na ngoo syenyu myamũlo yakwa na kũlea kwĩanĩsya mĩao yakwa yonthe na kwananga ũtianĩo wakwa nenyu, 16ngamũkany'a kwa kũmũetee thĩna mũnene wa mowau matavoaa na ndetema. Mowau asu makatuma mũtw'ĩka ilalinda na kũtuma mũendeea na kũwaa. Mũkavandaa mbeũ mĩũndanĩ yenyu, ĩndĩ mũkanoa mana, nũndũ amaitha menyu makamũvithũkĩaa na maiya ũsyao wa mĩũnda yenyu. 17Ngamũlea na mũkasindĩwa kaũnĩ, na amaitha menyu makamũsumbĩka. Mũkakwatwa nĩ w'ĩa wĩthĩe mwĩsemba mũkĩĩte vate mũndũ ũmũsembanĩtye.
18“Ethĩwa o na mwakwatwa nĩ maũndũ asu mathũkĩte ũu mũkalea kũmbĩw'a, ngongela ũkany'o ũsu wakwa mavinda mũonza nũndũ wa naĩ syenyu. 19Ngaananga vinya wenyu ũla mwĩkathĩĩaa naw'o; kũikethĩawa na mbua kuma matunĩ, na nthĩ ĩkanyiaa na ĩyũma yĩkale kyũma. 20O na mwatethya wĩa na kĩthito kĩana ata, wĩa ũsu ũkeethĩawa wĩ wa mana, nũndũ mĩũnda yenyu ndĩkethĩwa na ngetha, na mĩtĩ yenyu ndĩkethĩwa na matunda.
21“Ethĩwa mũkaendeea na kũleana nakwa na mũilea kũmbĩw'a, ngongeleela ũkany'o wakwa mavinda mũonza kwĩanana na wingĩ wa naĩ syenyu. 22Ngaeka nyamũ nthũku sya kĩthekanĩ syũke kũla mũĩ na iyũaa syana syenyu na indo syenyu, na kũtialya andũ anini mũno wĩthĩe o na malelũ menyu matiwa mate andũ.
23“Ethĩwa ĩtina wa mokany'o asu onthe mũkaendeea kwĩthĩwa mũtekũmbĩw'a na mũiendeea kũleana nakwa, 24nĩvo ĩndĩ o nakwa nĩmũlea na ndyongeleela ũkany'o wakwa mavinda mũonza mbeange nũndũ wa naĩ syenyu. 25Ngamũetee kaũ nĩmũkany'e nũndũ wa kũlea kwĩanĩsya ũtianĩo wakwa nenyu, na mwoombanĩa ndũanĩ syenyu mwĩvithe, ngĩmũetee mowau mathũku, na ngĩmũnengane kwa amaitha menyu. 26Ngatuma mwĩthĩwa na yũa yingĩ wĩse kwĩthĩa iveti ĩkũmi ikauĩa ĩikonĩ yĩmwe mĩkate yonthe ĩla syĩ nayo. Ikamũthimĩaa mĩkate ĩsu, na mwamina kũmĩya yonthe, mũkaendeeaa kwĩw'a nzaa.
27“Ethĩwa ĩtina wa maũndũ asu onthe mũkaendeea kũleana nakwa na mũilea kũmbĩw'a, 28nĩvo ĩndĩ ũthatunĩ wakwa nĩmũlea na ndyongeleela ĩngĩ ũkany'o wakwa mavinda mũonza nũndũ wa naĩ syenyu. 29Mũkakwatwa nĩ nzaa nthũku nginya mũye nyama sya syana syenyu. 30Ngaananga kũndũ kwenyu kũla mũthaithĩaa iĩmanĩ, na ndyananga ithembeo syenyu sya kũvĩvĩsya ũvani, na mwakw'a ngekya mĩĩ yenyu ĩkavalũke ĩũlũ wa mĩvw'anano yenyu ĩte thayũ; ngamũlea vyũ. 31Ngaananga ndũa syenyu vyũ na ndyananga kũndũ kwenyu kwa kũthaithĩa, na o ta ũu ndiketĩkĩla nthembo syenyu syĩ mũuke mũseo. 32Ngaananga nthĩ yenyu yonthe wĩse kwĩthĩa o na amaitha ala meũka kũtũa vo makasaanĩw'a moona wanangĩko ũsu. 33Ngamũetee kaũ na ngĩmũnyaĩĩkĩsya mbaĩnĩ ila ingĩ. Nthĩ yenyu ĩkatiwa yĩ nthei, na ndũa syenyu iitiwa syĩ mbanange vyũ. 34Nĩvo ĩndĩ mĩũnda yenyu ĩkatanĩa myaka ya yo ya kũthũmũa ĩvindanĩ yonthe yĩla yĩĩthĩwa ĩtavandĩtwe kĩndũ, nenyu mũyĩthĩwa mwĩ nthĩ ingĩ mũkwatĩtwe ũkombo. 35Ĩvindanĩ yonthe yĩla mĩũnda ĩsu ĩkethĩwa ĩtavandĩtwe kĩndũ, ĩkathũmũa ũndũ yaaĩlĩte kũthũmũa ĩvindanĩ ya kũthũmũa yĩla mwatwĩe nthĩnĩ wayo.
36“Ala menyu metiala ngatuma makwatwa nĩ w'ĩa ngoonĩ syoo me nthĩ ĩla makethĩwa makwatĩtwe ũkombo wĩse kwĩthĩa nĩmeũtelemw'a nĩ wasya wa ĩtũ yauutwa nĩ kĩseve makasemba. Makasembaa ta mũndũ ũkĩĩte kaũ na kũvalũkanga o na vate mũndũ ũmasembanĩtye. 37Mũkavalũkangany'a ene kwa ene ta mũkĩĩte kaũ o na vala vai mũndũ ũmũsembanĩtye, na mũkeethĩwa mũtatonya kũkita na amaitha menyu. 38Mũkakw'ĩĩa nthĩ sya ũeninĩ, na mũithikwa nthĩ isu sya amaitha menyu. 39Ala makatiala me nthĩ isu sya amaitha menyu, makathela nũndũ wa naĩ syoo na sya aaũmae moo.
40“Ĩndĩ nzyawa syenyu ikaumbũla naĩ syoo na naĩ sya aaũmae moo ala maleanile nakwa na mang'endea, 41na matuma nĩleana namo na kũmatwaa nthĩ ya ũkombo ya amaitha moo. Ĩtina wa ũu yĩla nzyawa syenyu syĩĩnyivya na kwĩtĩkĩla ũkany'o nũndũ wa naĩ syoo na ũng'endu woo, 42#Mwa 17.7-8; 26.3-4; 28.13-14 ngalilikana ũtianĩo wakwa ũla natianĩie na Yakovo, Isaka, na Avalaamu, na ngĩlilikana watho wakwa wa kũnenga andũ makwa nthĩ. 43Ĩvindanĩ yĩla mwĩĩthĩwa nthĩ ĩsu ya amaitha menyu, nthĩ yenyu ĩkatanĩa ĩvinda ya yo ya kũthũmũa yĩla yĩĩthĩwa ĩtiĩtwe yĩ nthei. Ĩvindanĩ o yĩu andũ makeetĩkĩla ũkany'o nũndũ wa naĩ yoo ya kũlea kũatĩĩa myamũlo yakwa na kũvũthya motw'ĩo makwa. 44Ĩndĩ o na ĩvindanĩ yĩu me nthĩ ya amaitha moo, ndikamalea na ndikaekana namo kana kũmamina vyũ, nũndũ kwa kwĩka ũu ngeethĩwa naananga ũtianĩo wakwa namo. Ninyie Mwĩai Ngai, Ngai woo. 45Ĩndĩ kwondũ woo ngalilikana ũtianĩo ũla naseũvisye na aaũmae moo, yĩla noonisye andũ ma nthĩ ila ingĩ ũtonyi wakwa kwa kumya andũ makwa nthĩ ya Misili nĩ kana nyie nĩthĩwe Ngai woo. Ninyie Mwĩai Ngai.”
46Asu nĩmo motw'ĩo, myamũlo na mĩao ĩla Mwĩai Ngai wanengie Mwose e Kĩĩmanĩ kya Sinaĩ kwondũ wa andũ ma Ĩsilaeli.
Currently Selected:
Ali 26: KAMBA
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011