Ali 27
27
Mĩao Ĩũlũ wa Mĩthĩnzĩo ĩla ĩnengetwe Mwĩai Ngai
1Mwĩai Ngai nĩwaneenie na Mwose amwĩa atĩĩ, 2“Neena na andũ ma Ĩsilaeli ũmee ethĩwa mũndũ nĩweevĩta kwa nzĩa ya mwanya avathe mũndũ ũngĩ kwondũ wa Mwĩai Ngai, mũndũ ũsu wavathwa nũtonya kũthaw'a kwa kũĩvĩwa mbesa syĩana ũndũ mũna. 3Ethĩwa nĩ mũndũ-ũme wĩ na ũkũũ wa myaka katĩ wa mĩongo ĩlĩ na mĩongo thanthatũ nĩaĩvĩwe mbesa sya silĩva mĩongo ĩtano kwĩanana na kĩthimo kya mbesa kĩla kĩtũmĩawa Ĩeemanĩ ĩtheu. 4Ethĩwa nĩ mũndũ mũka nĩaĩvĩwe mbesa sya silĩva mĩongo ĩtatũ kwĩanana na kĩthimo kya mbesa kĩla kĩtũmĩawa Ĩeemanĩ ĩtheu. 5Ethĩwa mũndũ ũsu ũvathĩtwe e na ũkũũ wa katĩ wa myaka ĩtano na mĩongo ĩlĩ, mũndũ-ũme nĩaĩvĩwe mbesa sya silĩva mĩongo ĩlĩ, na ethĩwa nĩ mũndũ mũka nĩaĩvĩwe mbesa sya silĩva ĩkũmi. 6Ethĩwa mũndũ ũsu ũvathĩtwe nĩ kana kena ũkũũ wa katĩ wa mwei ũmwe na myaka ĩtano, kavĩsĩ nĩkaĩvĩwe mbesa sya silĩva itano na kelĩtu kaiĩvĩwa mbesa sya silĩva itatũ. 7Ethĩwa nĩ mũndũ wĩ na ũkũũ wa myaka mĩongo thanthatũ na mbee, mũndũ-ũme nĩaĩvĩwe mbesa sya silĩva ĩkũmi na itano, na mũndũ mũka aiĩvĩwa mbesa sya silĩva ĩkũmi.
8“Ethĩwa mũndũ ũla weevĩtie nĩ ngya mũno na ndatonya kũĩva kĩthimo kya mbesa ila itw'ĩtwe, nĩaete mũndũ ũla ũvathĩtwe vala ve mũthembi, nake mũthembi nũkũmũtw'ĩĩa kũĩva mbesa nini kwĩanana na ũtonyi wa mũndũ ũsu ũkũĩva.
9“Ethĩwa mũndũ avatha nyamũ yĩtĩkĩlĩtw'e kumw'a nthembo kwa Mwĩai Ngai, nyamũ ya mũthemba ũsu yaumĩw'a Mwĩai Ngai nĩ ntheu. 10Mũndũ ũla weevĩtie ndatonya kũkũany'a nyamũ ĩsu nzeo na ĩngĩ nthũku, kana kũkũany'a ĩla nthũku na ĩngĩ nzeo. Ethĩwa akakũany'a nyamũ ĩsu na ĩngĩ, nyamũ isu syelĩ ikatw'ĩka syakwa nyie Mwĩai Ngai. 11Ĩndĩ ethĩwa mũndũ eevĩtie avathe nyamũ mbuku ĩla ĩtetĩkĩlĩtw'e kumĩw'a Mwĩai Ngai nthembo, mũndũ ũsu wĩvĩtĩte nĩatwae nyamũ ĩsu kũla kwĩ mũthembi. 12Mũthembi nĩawete thooa wa nyamũ ĩsu kwĩanana na ũseo kana ũthũku wayo. Thooa ũla waweta nĩw'o wĩĩtĩkĩlawa vate ngananĩo. 13Ethĩwa mũndũ ũla wumĩtye nyamũ ĩsu nũkwenda kũmĩĩvĩa ĩendee kwĩthĩwa yĩ yake, no nginya aĩve thooa ũla waĩlĩte na ayongela kĩlungu kĩmwe kya itano kya thooa ũsu.
14“Ethĩwa mũndũ nĩwavatha nyũmba yake yĩthĩwe yĩ ya Mwĩai Ngai, mũthembi nĩawete thooa wayo kwĩanana na ũseo kana ũthũku wayo, na thooa ũla waweta nĩw'o wĩĩtĩkĩlawa vate ngananĩo. 15Ethĩwa mũndũ ũla wavathie nyũmba ĩsu nũkwenda kũmĩĩvĩa ĩendee kwĩthĩwa yĩ yake, no nginya aĩve thooa ũla waĩlĩte na ayongela kĩlungu kĩmwe kya itano kya thooa ũsu.
16“Ethĩwa mũndũ nĩwavatha kĩlungu kya mũũnda wa ng'ũndũ yake kĩthĩwe kya Mwĩai Ngai, thooa wa mũũnda ũsu ũkatalwa kwĩanana na wingĩ wa mbeũ ĩla ĩtũmĩawa kũũvanda; mũũnda ũla ũvandawa kĩlo mĩongo ĩlĩ sya nganũ ĩla yĩtawa mbaale ũkeethĩawa na thooa wa mbesa sya silĩva ĩkũmi. 17Ethĩwa mũndũ ũsu avatha mũũnda ũsu wake Mwakanĩ wa Kũtũnganĩa syĩndũ wathela oou, thooa wa mũũnda ũsu ndũkaolwa kĩndũ. 18Ĩndĩ ethĩwa mũndũ ũsu avatha mũũnda wake ĩtina wa Mwaka ũsu, mũthembi nĩatale thooa waw'o kwĩanana na myaka ĩla ĩtialĩte Mwaka ũla ũngĩ wa Kũtũnganĩa syĩndũ ũvike na aiweta thooa mũnini. 19Ethĩwa mũndũ ũla ũvathĩte mũũnda ũsu nũkwenda kũwũĩvĩa ũendee kwĩthĩwa wĩ wake, no nginya aĩve thooa waw'o na ayongela kĩlungu kĩmwe kya itano kya thooa ũsu na mũũnda ũsu ũitw'ĩka wake ĩngĩ. 20Ĩndĩ ethĩwa mũndũ ũsu ndekwenda kũĩvĩa mũũnda ũsu ũtw'ĩke wake ĩngĩ, kana ethĩwa nĩwaũthooesya mũndũ ũngĩ atanamba kũwũĩvĩa wĩthĩwe wake ĩngĩ kuma kwa Mwĩai Ngai, mũndũ ũsu waũvathie ndatonya kũwũĩvĩa aũtũngĩwe. 21Mwaka ũla ũatĩĩe wa Kũtũnganĩa syĩndũ, mũũnda ũsu ũkatw'ĩka wa Mwĩai Ngai vyũ; ũkeethĩwa wĩ wa athembi.
22“Ethĩwa mũndũ nĩwavatha mũũnda ũthooete, ũte wa ng'ũndũ yake wĩthĩwe wa Mwĩai Ngai, 23mũthembi nĩatale thooa waw'o kwĩanana na myaka ĩla ĩtialĩte Mwaka wa Kũtũnganĩa syĩndũ ũvike. Mũndũ ũsu no nginya aĩve thooa wa mũũnda ũsu mũthenyanĩ o ũsu; mbesa isu nĩ sya Mwĩai Ngai. 24Mwaka wa Kũtũnganĩa syĩndũ wavika, mũũnda ũsu ũtũngĩwe mũndũ ũla waũthooetye na waĩ ng'ũndũ yake.
25“Kĩla thooa ũkamanyĩkaa kwĩanana na kĩthimo kya mbesa kĩla kĩtũmĩawa Ĩeemanĩ ĩtheu.
26“Nyamũ ila isyaĩtwe mbee nĩ sya Mwĩai Ngai, na kwoou vai mũndũ waĩlĩte kũsyoka kũivatha ĩngĩ syĩthĩwe sya Mwĩai Ngai. Nyamũ isu nĩ vamwe na tũsaũ, tũtena twa malondu kana twa mbũi. 27Ĩndĩ ethĩwa kala kasyawa mbee nĩ ka nyamũ mbuku, nĩkatonya kũthoowa kwa thooa ũla waĩlĩte na ũyongelwa kĩlungu kĩmwe kya itano kyaw'o. Nyamũ ĩsu yalea kũthoowa, nĩtonya kũthooew'a mũndũ ũngĩ kwa thooa ũla ũnenganĩtwe.
28 #
Mot 18.14
“Kĩndũ kyonthe kĩla mũndũ wanengane vyũ kĩthĩwe kya Mwĩai Ngai, o na ethĩwa nĩ mũndũ, nyamũ, kana kĩtheka kya ng'ũndũ, kĩitonya kũthoow'a kana kũtũngĩwa mwene o na akĩĩvĩa. Kĩndũ kyonthe kĩla kĩnenganĩtwe vyũ. #27.28: Kĩnenganĩtwe vyũ: Kĩĩ nĩ kĩndũ kĩla kĩnenganĩtwe kwa Mwĩai Ngai ũkethĩa mũndũ ndatonya kũkyovosya 29Mũndũ ũla ũnenganĩtwe vyũ anangwe kwondũ wa Mwĩai Ngai ndatonya kũĩvĩwa mbesa nĩ kana ndakanangwe; no nginya oawe.
30 #
Mot 18.21; Kũt 14.22-29 “Kĩlungu kya ĩkũmi kya syĩndũ ila ivandawa mũũndanĩ, o na ethĩwa nĩ ngetha ya mbaa mbeke, kana matunda nĩ kyakwa nyie Mwĩai Ngai. 31Ethĩwa mũndũ nũkwenda kwovosya kĩlungu kya ĩkũmi kya syĩndũ syake, no nginya aĩve thooa wakyo ũla ũtw'ĩtwe na ayongela kĩlungu kĩmwe kya itano kya thooa ũsu. 32Nyamũ ĩmwe katĩ wa nyamũ ĩkũmi ila iĩthaw'a mũsyĩ nĩ yakwa nyie Mwĩai Ngai. Kwoou yĩla mwatala nyamũ isu, ng'ombe, mbũi kana malondu, kĩla nyamũ ya ĩkũmi nĩ yakwa nyie Mwĩai Ngai. 33Mwene wa nyamũ isu ndaĩlĩte kũivanga yĩla iũtalwa nĩ kana ila mosu wĩthĩe nĩsyo syanyuvwa, na o ta ũu ndaĩlĩte kũkũany'a nyamũ ila syanyuvwa. Akũany'a nyamũ ĩsu na ĩngĩ, nyamũ isu syelĩ ikatw'ĩkaa syakwa nyie Mwĩai Ngai, na iitonya kwovow'a.”
34Ĩsu nĩyo mĩao ĩla Mwĩai Ngai wanengie Mwose e Kĩĩmanĩ kya Sinaĩ kwondũ wa andũ ma Ĩsilaeli.
Currently Selected:
Ali 27: KAMBA
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011