Mot 11
11
Mwĩai Ngai Aikany'a Andũ ma Ĩsilaeli na Mwaki
1Andũ ma Ĩsilaeli nĩmambĩĩie kũnyungunyĩsya kũla kwĩ Mwĩai Ngai nũndũ wa mathĩna ala maĩ namo. Mwĩai Ngai eew'a kũnyungunyĩsya kwoo nĩwathatie mũno na amaetee mwaki. Mwaki ũsu nĩwakanie vala mambĩte maeema moo na wavĩvya ndee imwe sya maeema. 2Nĩvo ĩndĩ andũ asu meekaĩlile Mwose, nake Mwose avoya Mwĩai Ngai na mwaki ũsu wavoa. 3Kwoou vandũ vau nĩveetiwe Tavela,#11.3 Tavela Ũalyũlo wa ĩsyĩtwa yĩĩ nĩ kwakana nũndũ vau nĩvo Mwĩai Ngai wakanisye mwaki wake katĩ woo.
Andũ ma Ĩsilaeli Mayĩtya Nyama
4Andũ ma Ĩsilaeli me kyalonĩ nĩmaendanĩtye na andũ amwe mataĩ ma mbaĩ yoo, ala maĩ na wendi mũnene wa nyama. Andũ ma Ĩsilaeli o namo nĩmambĩĩie kũnyungunyĩsya mayasya atĩĩ, “Twenda kethĩwa nĩvatonyeka tũkona nyama tũkaya! 5Nĩtũũlilikana ũndũ yĩla twaĩ nthĩ ya Misili twaĩsaa makũyũ ala tũkwenda na vai kĩndũ twaĩvaa. O ta ũu nĩtwaĩsaa mongũ, matikitiki, kĩtũngũũ kĩtawa liki, kĩtũngũũ mbene na kĩtũngũũ saumu. 6Yu twĩĩw'a tũtekwenda kũya nũndũ tũtindĩaa kũya o lĩu ũũ wĩtawa mana!”
7 #
Kuma 16.31
Mana yailyĩ ta tũveke twa mũvya, na yoonekaa ĩilyĩ ta mauta ma veteliamu. 8Andũ nĩmaendaa mombanĩtye mana na maimĩthia na ĩvia kana maimĩkima na ndĩĩ. Nĩmamĩtheũkasya na mbisũ na kũseũvya tũmĩkate. Mana yasamaa ta tũmĩkate tũuĩtwe na mauta. 9#Kuma 16.13-15 Yĩla kweethĩwa na ĩmwe maeemanĩ ũtukũ, o nayo mana nĩyatheeaa.
10Mwose nĩweewie andũ ma mĩsyĩ yonthe ya Ĩsilaeli mainyungunyĩsya maũngyĩ mĩvĩanĩ ya maeema moo. Mwĩai Ngai nĩwathatie mũno, nake Mwose akwatwa nĩ kĩũũyũ. 11Nĩvo ĩndĩ Mwose wakũlilye Mwĩai Ngai atĩĩ, “Ũnengete thĩna ũũ wĩana ũu nĩkĩ? Nĩkĩte ũndũ mwaũ ũtakwendeeasya nĩ kana ũnenge wĩa ũitavĩte ũu wa kũtongoesya andũ aa onthe? 12Nĩkũlya, ninyie noombie andũ aa onthe kana ninyie namasyaie? Nĩ kyaũ kyatumie ũmbĩa nĩmasũvĩae ũndũ mũei wa kana ũkakũaa na moko make nginya ngamavikye nthĩ ĩla wathie aaũmae moo? 13Ndonya kumya nyama va syĩanĩe andũ aa onthe! Matindaa mainyungunyĩsya kũla nĩĩ maimbĩa, ‘Tũnenge nyama tũye!’ 14Nditonya kũtongoesya andũ aa onthe nĩ nyioka; wĩa ũũ nĩ mũito mũno kwakwa! 15Ethĩwa wĩendeea kũmbĩka ũu, nĩ kavaa ũmbũae oyu! Ethĩwa nĩnonete ũseo kwaku ndũkandeke nĩendee kwona mathĩna aa nĩ namo.”
Mwose Ainyuva Atongoi Mĩongo Mũonza ma Kũmũtetheesya
16Mwĩai Ngai nĩweeie Mwose atĩĩ, “Ũmbany'a aũme mĩongo mũonza ala wĩsĩ kana nĩ atongoi ma andũ ma Ĩsilaeli, na nĩmanengetwe ndaĩa. Maete Ĩeemanĩ ĩtheu ya kũkomanĩa na Ngai, na ũimea maũngame vakuvĩ naku. 17Nĩngũka vau nĩneene naku na kwosa ũmwe wa Veva ũla ngũnengete, na ngĩmanenga Veva ũsu. Nĩvo ĩndĩ meĩthĩwa matonya ũkũtetheesya kũthũkũma andũ aa nĩ kana ndũkakue mũio ũsu wĩ weka. 18Yu tavya andũ ũmee nĩmeyũmbanĩsye mũthenya wa ũnĩ kwa kwĩthesya, na makanengwa nyama maye. Mwĩai Ngai nĩwĩw'ĩte kĩĩo kyenyu mũyasya kethĩwa nĩmũkwata nyama mũkaya, na kana yĩla mwatũaa Misili mwaĩ vaseo kwĩ ũmũnthĩ. Kwoou Mwĩai Ngai akamũnenga nyama, nenyu mũkaiya. 19Mũikaya nyama isu vandũ va mũthenya ũmwe, kana ĩlĩ, kana ĩtano, kana ĩkũmi, kana mĩongo ĩlĩ, 20ĩndĩ mũkaiya vandũ va mwei mũima! Mũkaiya syumĩlĩĩle manyiũũ nginya imũtiikĩe. Ũu wĩĩthĩwa nũndũ nĩmũmũleete Mwĩai Ngai ũla wĩkalaa katĩ wenyu, na mũkanyungunyĩsya kũla ũĩ mũyasya nĩ kava kethĩwa mũyaauma nthĩ ya Misili.”
21Ĩndĩ Mwose nĩweeie Mwĩai Ngai atĩĩ, “Nyie ndongoesye andũ ngili maana thanthatũ maendete na maũũ, naku wĩasya, ‘Nĩngũmanenga nyama maye vandũ va mwei ũmwe!’ 22Nĩkũlya, ve mbũi na malondu kana ng'ombe matonya kũaĩwa makaya makeanĩwa? Makũyũ onthe ala me ũkanganĩ makakwatw'a andũ asu nĩmaya makeanĩwa?” 23Nake Mwĩai Ngai asũngĩa Mwose amwĩa atĩĩ, “Ũtonyi wakwa ndwĩ kĩthimo, oyu mĩtũkĩ nũũmanya kana ũndũ ũsu nasya nũũtonyeka kana ndwĩtonyeka.”
24Nĩvo ĩndĩ Mwose waendie na atavya andũ ma Ĩsilaeli ũndũ Mwĩai Ngai wasya. Nĩwoombanisye atongoi mĩongo mũonza na amaete maũngama melingĩlĩte Ĩeema ĩtheu ya Kũkomanĩa na Ngai. 25Mwĩai Ngai nĩwatheeie e nthĩnĩ wa yĩla ĩtu na aneena na Mwose. Nĩwoosie ũmwe wa Veva ũla wanengete Mwose na aũnenga atongoi asu mĩongo mũonza. Yĩla Veva ũsu walikile atongoinĩ asu nĩmambĩĩie kwathana; ĩndĩ ĩtina wa ũu mayaathana ĩngĩ.
26Atongoi elĩ katĩ wa ala mĩongo mũonza, Elitati na Metati nĩmatiĩtwe maeemanĩ; mayaĩ manathi nza wa Ĩeema ĩtheu ya kũkomanĩa na Ngai. Me vau maeemanĩ Veva ũsu nĩwookie na wamalika na o ta ũu o namo mambĩĩa kwathana. 27Mwanake ũmwe nĩwasembie na athi kũtavya Mwose kana Elitati na Metati nĩmekwathanĩa maeemanĩ.
28Yosua mwana wa Nuni, ũla wambĩĩe kũtetheesya Mwose kuma e mwanake nĩwaneenie na Mwose amwĩa atĩĩ, “Mũnene wakwa, matavye maeke kwĩka ũu!”
29Nake Mwose amũsũngĩa amwĩa atĩĩ, “Wĩthĩnĩka nũndũ wakwa nĩkĩ? Nenda kethĩwa Mwĩai Ngai nũnenga andũ onthe Veva wake makatw'ĩka athani!” 30Nĩvo ĩndĩ Mwose na atongoi asu mĩongo mũonza masyokie maeemanĩ.
Mwĩai Ngai Aiete Ngwae
31Mwĩai Ngai nĩwatumie kĩseve kĩuutana na kyaete ngwae kuma ũkanganĩ. Kĩseve kĩu nĩkyatumie ngwae isu ivalũkanga ũtee wa maeema kwĩlingĩla maeema asu, na ikanyaĩĩka vandũ va mũendo wa mũthenya ũmwe. Syaũlũkaa syĩ ta mita ĩmwe kuma nthĩ.#11.31 Syaũlũkaa syĩ ta mita ĩmwe kuma nthĩ: Kana Syoombĩte mbumbu ya ũtũlu wa ta mita ĩmwe
32Kwoou mũthenya ũsu w'onthe, ũtukũ ũsu, na mũthenya ũla waatĩĩe, andũ matindĩie kũkwata ngwae. Kĩla ũmwe woo oombanisye ngwae syĩ na ũito wa mbee wa kĩlo ngili ĩmwe. Nĩmanĩkie ngwae isu kĩla vandũ kwĩlingĩla maeema nĩ kana inyiae. 33Andũ asu maendee kũya nyama isu, matanamba kũimina, Mwĩai Ngai nĩwathatiw'e mũno nĩmo na amaetee ũwau mũthũku mũno. 34Vandũ vau nĩveetiwe Kĩvilothi-ataava#11.34 Kĩvilothi-ataava Ũalyũlo wa ĩsyĩtwa yĩĩ nĩ mbũa sya ĩtomo nũndũ vau nĩvo vathikiwe andũ ala maĩ na ĩtomo ya nyama.
35Kuma vau andũ ma Ĩsilaeli nĩmaendie Aaselothi vala mambie maeema moo.
Currently Selected:
Mot 11: KAMBA
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011