Mot 10
10
Masoo Maseũvĩtw'e na Silĩva
1Mwĩai Ngai nĩwaneenie na Mwose na amwĩa atĩĩ, 2“Seũvya masoo elĩ na silĩva mũtumbatumbe ma kũtũmĩa yĩla ũkũmbany'a andũ ma Ĩsilaeli vamwe, na yĩla ũkwenda mambĩĩe kyalo. 3Yĩla masoo asu mavuvw'a me elĩ, andũ onthe ma Ĩsilaeli makookaa kũmbanĩa vala ũĩ mũvĩanĩ wa Ĩeema ĩtheu ya kũkomanĩa na Ngai. 4Ĩndĩ soo ũmwe wavuvwa, no atongoi ma mbaĩ me oka meũkaa kũmbanĩa vala ũĩ. 5Yĩla soo wavuvwa na wasya wa kwonany'a kana nĩmwaĩlĩte kwambĩĩa kyalo, andũ ma mbaĩ ila syambĩte maeema moo ngalĩko ya wumĩlonĩ wa syũa nĩmambĩĩe kũthi. 6Soo wavuvwa ĩngĩ na wasya ũsu wa kwambĩĩa kyalo, andũ ma mbaĩ ila syambĩte maeema moo ngalĩko ya ĩtheo namo mambĩĩae kũthi. Kwoou yĩla soo wavuvwa na wasya wa kwambĩĩa kyalo, ũsu ũkeethĩawa wonany'o wa kwambĩĩa kũthi. 7Ĩndĩ yĩla ũkwenda kũmbany'a andũ onthe ma Ĩsilaeli, vuvaa masoo asu na wasya ũte wa kwambĩĩa kyalo. 8Masoo asu makavuvawa nĩ ana ma Alũni ala nĩ athembi.
“Mũkaatĩĩaa mwĩao ũũ ĩvinda yonthe yĩla yũkĩte: 9Yĩla mũkũkita mwĩ nthĩ ĩla yenyu, mũyĩsiĩĩa kuma kwa mũmaitha ũmũvithũkĩĩte, mwĩvuvaa masoo asu na wasya wa kwonany'a kana mwĩ kaũnĩ. Nyie Mwĩai Ngai, Ngai wenyu ngamũtetheeasya na kũmũtangĩĩa kuma amaithanĩ menyu. 10O ta ũu mĩthenyanĩ yenyu ya ũtanu, na yĩla mũũtanĩa mboka syenyu ila itw'ĩtwe na Mboka ya Kũtisa kwa Mwei, mũkavuvaa masoo asu yĩla mũkumya nthembo sya kũvĩvw'a na sya ngwatanĩo; nĩvo ĩndĩ nĩmũlilikanaa. Ninyie Mwĩai Ngai, Ngai wenyu.”
Andũ ma Ĩsilaeli Mayuma Weũnĩ wa Sinaĩ
11Mũthenyanĩ wa mĩongo ĩlĩ wa mwei wa kelĩ, mwakanĩ wa kelĩ ĩtina wa andũ ma Ĩsilaeli mauma Misili, yĩla ĩtu yeethĩawa ĩũlũ wa Ĩeema ĩtheu ya kũkomanĩa na Mwĩai Ngai nĩyookĩlile. 12Nĩvo ĩndĩ andũ ma Ĩsilaeli mambĩĩie kyalo kuma weũnĩ wa Sinaĩ. Ĩtu yĩu nĩyaendie nginya yesa kũũngamĩla weũnĩ wa Valani.
13Nĩmambĩĩie kyalo kyoo kya mbee maatĩĩe mwĩao wa Mwĩai Ngai ũla Mwose wamanengete. 14Ikundi ila syaĩ ungu wa kĩvevelo kya mbaĩ ya Yuta nĩsyo syaĩ sya mbee kwambĩĩa kyalo. Kĩkundi kya mbaĩ ya Yuta kyatongoew'e nĩ Nasoni mwana wa Aminatavu. 15Nethaneli mwana wa Nzuali nĩwe watongoesye kĩkundi kya mbaĩ ya Isakali, 16nake Eliavu mwana wa Eeloni atongoesye kĩkundi kya mbaĩ ya Nzevuluni.
17Nĩvo ĩndĩ Ĩeema ĩtheu yambũiwe, na andũ ma nzyawa sya Ngelisoni na sya Melali ala mayĩkuaa mambĩĩsya kyalo.
18Ikundi ila syaĩ ungu wa kĩvevelo kya mbaĩ ya Lũveni nĩsyaatĩĩie. Kĩkundi kya mbaĩ ya Lũveni kyatongoew'e nĩ Elisuli mwana wa Seteuli. 19Elumieli mwana wa Nzulisatai nĩwe watongoesye kĩkundi kya mbaĩ ya Simioni, 20nake Eliasavu mwana wa Ndeueli atongoesye kĩkundi kya mbaĩ ya Ngandi. 21Nzyawa sya Koathi nĩsyaatĩĩie ikuĩte ila syĩndũ ntheu. Mbee wa matanavika, Ĩeema ĩtheu yaaĩlĩte kwĩthĩwa yĩ yambe.
22Ikundi ila syaĩ ungu wa kĩvevelo kya mbaĩ ya Evalaimu nĩsyaatĩĩie. Kĩkundi kya mbaĩ ya Evalaimu kyatongoew'e nĩ Elisama mwana wa Amiuti. 23Ngamalieli mwana wa Vetasuli nĩwe watongoesye kĩkundi kya mbaĩ ya Manase, 24nake Avitani mwana wa Ngitioni atongoesye kĩkundi kya mbaĩ ya Mbengyameni.
25Kũminũkĩlya, ikundi ila syaĩ ungu wa kĩvevelo kya mbaĩ ya Ndani nĩsyaatĩĩie. Ikundi isu syeethĩawa ĩtina nĩ kana isũvĩe ala me mbee kuma amaithanĩ. Kĩkundi kya mbaĩ ya Ndani kyatongoew'e nĩ Aieseli mwana wa Amisatai. 26Vakieli mwana wa Okalani nĩwe watongoesye kĩkundi kya mbaĩ ya Aseli, 27nake Aila mwana wa Enani nĩwe watongoesye kĩkundi kya mbaĩ ya Navutalĩ. 28Ũu nĩw'o ikundi sya andũ ma Ĩsilaeli syaatĩanĩaa yĩla mekwambĩĩa kyalo.
29Mwose nĩwaneenie na Ovavu mwana wa mũthoni wake Yethilo ũla waĩ Mũmetia amwĩa atĩĩ, “Nĩtũkilĩlye kwambĩĩa kyalo kya kũthi nthĩ ĩla Mwĩai Ngai waisye kana akatũnenga. Mwĩai Ngai nĩwathanie kana akatuma andũ ma Ĩsilaeli maendeea nesa, na kwoou ũka tũendany'e na tũkakũaĩa moseo ala twĩkwata.”
30Ovavu nĩwasũngĩie Mwose amwĩa atĩĩ, “Aiee, nyie nĩngũsyoka nthĩ ĩla nasyaĩwe, na kũla kwĩ andũ makwa.”
31Ĩndĩ Mwose amwĩa, “Mwa ndũkatate kũthi ũtũtie. We nĩwĩsĩ vala tũtonya kwamba maeema maitũ weũnĩ, naku ũkatwonasya nzĩa ĩla twaĩlĩte kwĩsĩla. 32Waendany'a naitũ, tũkakũaĩa syĩndũ nzeo syonthe ila Mwĩai Ngai wĩtũnenga.”
33Andũ ma Ĩsilaeli nĩmaumie Sinaĩ, kĩĩmanĩ kĩtheu kya Mwĩai Ngai, na mathi kyalo kya mĩthenya ĩtatũ. Kĩla ĩvinda maendete nĩmatongoeaw'a nĩ ala meethĩawa makuĩte Ĩsandũkũ ya Ũtianĩo ya Mwĩai Ngai, nĩ kana amony'e vala mekwamba maeema. 34Yĩla mauma vala mambĩte maeema maendete kwamba maeema vandũ vangĩ, yĩla ĩtu ya Mwĩai Ngai nĩyaendaa yĩ ĩũlũ woo mũthenya.
35 #
Sav 68.1
Andũ ala makuĩte Ĩsandũkũ ya Ũtianĩo ya Mwĩai Ngai mambĩĩa kũthi Mwose nĩwaneenaa akasya atĩĩ, “Ũkĩla ame Mwĩai Ngai! Nyaĩĩkya amaitha maku na ũituma ala makũmenaa makĩa.” 36Yĩla ala makuĩte Ĩsandũkũ yĩu mathũmũa, nĩwaneenaa akasya atĩĩ, “Syoka ame Mwĩai Ngai kũla kwĩ andũ aa aingĩ ma Ĩsilaeli.”
Currently Selected:
Mot 10: KAMBA
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011