Mot 9
9
Motw'ĩo ĩũlũ wa Mboka ya Vasaka
1 #
Kuma 12.1-13
Mwĩai Ngai nĩwaneenie na Mwose weũnĩ wa Sinaĩ, mweinĩ wa mbee, mwakanĩ wa kelĩ ĩtina wa andũ ma Ĩsilaeli mauma Misili. Nĩwamwĩie atĩĩ, 2“Andũ ma Ĩsilaeli nĩmatanĩe Mboka ya Vasaka ĩvindanĩ yĩla yĩtw'ĩtwe ĩtanĩawe. 3Mũkatanĩa mboka ĩsu mũthenyanĩ wa ĩkũmi na inya wa mwei ũũ ĩa mawĩoo kwĩanana na motw'ĩo na myamũlo ya yo yonthe.” 4Kwoou Mwose nĩwatavisye andũ ma Ĩsilaeli kana nĩmaĩlĩte kũtanĩa Mboka ya Vasaka. 5Nĩmatanĩie mboka ĩsu mũthenyanĩ wa ĩkũmi na inya mweinĩ wa mbee ĩa mawĩoo me weũnĩ wa Sinaĩ. Andũ ma Ĩsilaeli nĩmeekie maũndũ onthe kwĩanana na ũndũ Mwĩai Ngai weeaĩĩte Mwose.
6Amwe ma andũ ma Ĩsilaeli nĩmavukĩtw'e nũndũ wa kũkwata mwĩĩ wa mũndũ mũkw'ũ na kwoou mayaĩ matonya kũtanĩa Mboka ya Vasaka. Mũthenyanĩ o ũsu nĩmaendie vala ve Mwose na Alũni, 7na mamea atĩĩ, “Ithyĩ twĩ avuku nũndũ wa kũkwata mwĩĩ wa mũndũ mũkw'ũ, ĩndĩ nĩ kyaũ kĩtuma tũtaumĩsya Mwĩai Ngai nthembo twĩ vamwe na andũ ala angĩ ma Ĩsilaeli ĩvindanĩ yĩla yĩtw'ĩtwe?”
8Mwose nĩwamasũngĩie amea atĩĩ, “Eteelai nginya nĩmanye ũndũ Mwĩai Ngai ũkũmbĩaĩa ĩũlũ wenyu.”
9Nĩvo ĩndĩ Mwĩai Ngai weeie Mwose 10nĩathi akatavya andũ ma Ĩsilaeli atĩĩ, “Yĩla ũmwe wenyu kana nzyawa syenyu meethĩwa me avuku nũndũ wa kũkwata mwĩĩ wa mũndũ mũkw'ũ, kana meethĩwa me kyalonĩ kũasa, nĩmatonya kũtanĩa Vasaka ya Mwĩai Ngai. 11Nĩmatanĩe mboka ĩsu mũthenyanĩ wa ĩkũmi na inya wa mwei wa kelĩ ĩa mawĩoo. Nĩmaye katena ka ĩlondu vamwe na mũkate ũuĩtwe ũte mbota na nyũnyi syĩ wũũ. 12#Kuma 12.46; Yoa 19.36 Mũikatialye nyama sya katena kau nginya kwakya kwa mũthenya ũla ũatĩĩe, na mũikatũle yĩmwe ya mavĩndĩ mako. Tanĩai Mboka ya Vasaka kwĩanana na motw'ĩo mayo. 13Ĩndĩ ethĩwa mũndũ nĩ mũtheu, na nde kyalonĩ kũasa, na ailea kũtanĩa Mboka ya Vasaka, mũndũ ũsu akaeka kũtalwa ta ũmwe wa andũ makwa, nũndũ ndanambumĩsya nthembo ĩvindanĩ yĩla yĩtw'ĩtwe. Mũndũ ũsu no nginya aĩvĩe naĩ yake.
14“Ethĩwa katĩ wenyu ve mũeni wĩkalanasya nenyu na nũkwenda kũtanĩa Mboka ya Vasaka, mũndũ ũsu no nginya aatĩĩe mĩao na motw'ĩo ma mboka ĩsu. Kĩla mũndũ akaatĩĩaa mĩao ĩsu o na ethĩwa nĩ mũeni, kana asyaĩwe nthĩ yenyu.”
Ĩtu yĩla yaĩ Ĩũlũ wa Ĩeema ya Kũkomanĩa na Ngai
(Kuma 40.34-38)
15Mũthenya ũla Ĩeema ĩtheu yambiwe, ĩtu nĩyookie yayĩvw'ĩka. Kuma wĩoo kũvika kwakya ĩtu yĩu yoonekaa yĩilyĩ mwaki. 16Ũu nĩw'o Ĩeema yĩu yekalaa yĩilyĩ; nĩyekalaa yĩvw'ĩkĩtwe nĩ ĩtu, na ũtukũ ĩtu yĩu yoonekaa yĩilyĩ mwaki. 17Yĩla ĩtu yĩu yookĩla kuma Ĩeemanĩ, andũ ma Ĩsilaeli nĩmookĩlaa makambĩĩa kũthi na mayamba maeema moo vala ĩtu yĩu yaũngama. 18Andũ ma Ĩsilaeli nĩmambĩĩasya kyalo yĩla Mwĩai Ngai wameaĩa mathi, na mayamba maeema moo yĩla wameaĩa kwĩka ũu. Ĩvindanĩ yonthe yĩla ĩtu yĩu yeethĩawa ĩũlũ wa Ĩeema ĩtheu, andũ asu nĩmaendeeaa kwĩkala vau mambĩte maeema. 19O na ĩtu yĩu yekala ĩũlũ wa Ĩeema vandũ va ĩvinda ĩasa, andũ nĩmaatĩĩaa mwĩao wa Mwĩai Ngai, na mailea kwambĩĩa kyalo. 20Mavinda amwe ĩtu yĩu nĩyekalaa ĩũlũ wa Ĩeema ĩtheu vandũ va mĩthenya mĩvũthũ, na andũ mayĩkala vala mambĩte maeema kwĩanana na mwĩao wa Mwĩai Ngai, na mayambĩĩa kyalo yĩla wameaĩa mathi. 21Mavinda amwe ĩtu yĩu nĩyekalaa ĩũlũ wa Ĩeema kuma wĩoo kũvika kwakya, na yookĩla kwakya andũ mayambĩĩa kyalo. Ĩtu yĩu o na yookĩla kwĩ ũtukũ kana mũthenya andũ asu nĩmambĩĩaa kyalo. 22Andũ ma Ĩsilaeli nĩmekalaa vala mambĩte maeema moo na kũlea kwambĩĩa kyalo yĩla ĩtu yĩu yaendeea kwĩkala ĩũlũ wa Ĩeema, o na ethĩwa nĩ vandũ va ĩvinda ya mĩthenya ĩlĩ, kana mwei ũmwe, kana mwaka ũmwe, ĩndĩ ĩtu yĩu yookĩla nĩmambĩĩaa kyalo. 23Mambĩĩaa kyalo kana kwamba maeema moo maatĩĩe mĩao ĩla Mwĩai Ngai wamanengie kwĩsĩla vala ve Mwose.
Currently Selected:
Mot 9: KAMBA
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011