Mot 8
8
Alũni Ayia Taa vala Syailĩĩlawa
1 #
Kuma 25.31-40; 37.17-24 Mwĩai Ngai nĩwaneenie na Mwose amwĩa atĩĩ, 2“Tavya Alũni ũmwĩe yĩla ũkwilĩĩla ila taa mũonza kĩndũnĩ kĩla kya kwilĩĩla taa, nĩasilĩĩle wĩthĩe kyeni kyasyo kĩmulĩkĩte ngalĩko ya mbee ya kĩndũ kĩu.” 3Alũni nĩweekie ũu, na aia taa isyaĩtye ngalĩko ya mbee ya kĩndũ kĩu kya kwilĩĩla taa, o tondũ Mwĩai Ngai weeaĩĩte Mwose. 4Kĩndũ kĩu kya kwilĩĩla taa kyonthe kyaseũvĩtw'e na thaavu mũtumbatumbe kwĩanana na mũseũvĩlye ũla Mwĩai Ngai woonetye Mwose vau mbeenĩ.
Kũthew'a na kũvathwa kwa Alivai
5Mwĩai Ngai nĩwaneenie na Mwose amwĩa atĩĩ, 6“Vatha Alivai kuma andũnĩ ala angĩ ma Ĩsilaeli na ũimathesya. 7Mathesye kwa nzĩa ĩno: Maminzangĩsye kĩw'ũ kya kũthesya andũ, na ũimea nĩmenze nzw'ĩĩ syonthe ila syĩ mĩĩnĩ yoo, na maivũa ngũa syoo. Kwa kwĩka ũu nĩmekwĩthĩwa me atheu. 8Nĩmose kasalũ na mũtu mũvinyu ũvulanĩtw'e na mauta wĩthĩwe nthembo ya ngetha ya mbaa mbeke, naku ũyosa kasalũ kangĩ kwondũ wa nthembo ya ũekeo wa naĩ. 9Ũmbany'a andũ onthe ma Ĩsilaeli na ũiete Alivai maũngame mbee wa Ĩeema ĩtheu ya kũkomanĩa na Ngai. 10Wamina kũete Alivai mbee wakwa nyie Mwĩai Ngai, andũ ala angĩ ma Ĩsilaeli nĩmamailĩĩle moko mĩtwenĩ yoo. 11Ĩtina wa ũu Alũni nĩanengane Alivai kũla nĩĩ nyie Mwĩai Ngai methĩwe mũthĩnzĩo wa mwanya kuma andũnĩ ma Ĩsilaeli, nĩ kana matethasye wĩa wakwa. 12Nĩvo ĩndĩ Alivai meilĩĩla moko moo mĩtwenĩ ya tũla tũsalũ twĩlĩ, naku ũyumya kamwe kethĩwe nthembo kwondũ wa ũekeo wa naĩ, na kala kangĩ kayĩthĩwa nthembo ya kũvĩvw'a yumĩw'e Ngai, nĩ kana Alivai mathew'e.
13“Vatha Alivai methĩwe mũthĩnzĩo wa mwanya kũla nĩĩ, matetheeasye Alũni na ana make. 14Kwa nzĩa ĩsu vatha Alivai kuma andũnĩ ala angĩ ma Ĩsilaeli nĩ kana methĩwe makwa. 15Wamina kũthesya na kũvatha Alivai makeethĩwa matonya kũka na kũtethya wĩa woo Ĩeemanĩ ĩtheu ya kũkomanĩa na Ngai. 16Nĩnĩnyuvĩte Alivai methĩwe makwa vandũ va kavĩsĩ ka mbee kuma kĩla mũsyĩ wa Andũ ma Ĩsilaeli. 17#Kuma 13.2 Kĩla kavĩsĩ ka mbee ka andũ ma Ĩsilaeli, na nyamũ syoo ila isyaĩtwe mbee nĩ syakwa. Ĩvinda yĩla nooaie syana syonthe sya tũvĩsĩ sya mbee sya andũ ma Misili, na nooaa nyamũ syoo syonthe ila syasyaĩtwe mbee, nĩw'o neevathĩie syana syonthe sya tũvĩsĩ sya andũ ma Ĩsilaeli, vamwe na nyamũ syoo syonthe ila isyaĩtwe mbee. 18Kwoou nĩngwosa Alivai vandũ va syana syonthe sya tũvĩsĩ sya andũ ma Ĩsilaeli ila isyaĩtwe mbee. 19Kuma andũnĩ onthe ma Ĩsilaeli, nĩngũnengane Alivai kũla kwĩ Alũni na ana make methĩwe ta mũthĩnzĩo kwoo. Alivai makatethasya wĩa Ĩeemanĩ ĩtheu ya kũkomanĩa na Ngai vandũ va andũ ala angĩ onthe ma Ĩsilaeli, na maimaumĩasya nthembo ya wĩw'anĩthyo nĩ kana vaikethĩawe ũndũ mũthũku ũtonya kũmakwata yĩla mathengeea vala Vandũ Vatheu.”
20Kwoou Mwose, Alũni, na andũ ala angĩ onthe ma Ĩsilaeli nĩmavathie Alivai kwĩanana na ũndũ Mwĩai Ngai weeaĩĩte Mwose. 21Alivai nĩmeetheisye na mavũa ngũa syoo, na Alũni amanengane kũla kwĩ Mwĩai Ngai ta mũthĩnzĩo wa mwanya. O ta ũu nĩweekie maũndũ ala maĩlĩte kwĩkwa nĩ kana amathesye. 22Andũ ma Ĩsilaeli nĩmeekie maũndũ onthe ala Mwĩai Ngai weeaĩie Mwose ĩũlũ wa Alivai. Kwoou Alivai nĩmeethĩiwe matonya kũtethya wĩa Ĩeemanĩ ĩtheu ya kũkomanĩa na Ngai matongoew'e nĩ Alũni na ana make.
23Mwĩai Ngai nĩwaneenie na Mwose amwĩa atĩĩ, 24“Aũme onthe ma mbaĩ ya Livai ala me na ũkũũ wa myaka mĩongo ĩlĩ na ĩtano na mbee, makatethasya wĩa woo Ĩeemanĩ ĩtheu ya kũkomanĩa na Ngai. 25Ĩndĩ mavikya ũkũũ wa myaka mĩongo ĩtano no nginya mathũmũe kuma wĩanĩ ũsu; maikathũkũme ĩngĩ. 26Nĩmatonya kũtetheesya ana-a-ĩthe moo kũtethya wĩa Ĩeemanĩ ĩtheu ya kũkomanĩa na Ngai, ĩndĩ mo ene mayaĩlĩte kũaĩwa wĩa matethye me oka. Ũu nĩw'o waĩlĩte kũaany'a mawĩa ala Alivai maĩlĩte kũtethya.”
Currently Selected:
Mot 8: KAMBA
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011