Mot 14
14
Andũ Maing'endea Mwose
1Andũ ma Ĩsilaeli mamina kwĩw'a ndeto ila atongoi moo maneenie, nĩmaĩie ũtukũ mũima. 2Nĩmanyungunyĩisye kũla kwĩ Mwose na Alũni mayasya atĩĩ, “Nĩ kavaa kethĩwa twakw'ĩĩie nthĩ ya Misili kana kethĩwa nĩtũkw'ĩĩa vaa weũnĩ! 3Mwĩai Ngai atũtwaĩte nthĩ ĩsu nĩkĩ? Twĩthi kũaĩwa kaũnĩ, na iveti na syana sitũ iikwatwa ũkombo. Tyo kavaa tũkasyoka nthĩ ya Misili?” 4Nĩvo ĩndĩ maneenanisye ene kwa ene masya atĩĩ, “Nĩtũnyuvei mũtongoi na tũisyoka nthĩ ya Misili!”
5Mwose na Alũni nĩmakumanie matina nthĩ na ũthyũ mbee wa andũ onthe ma Ĩsilaeli mamesũve. 6Yosua mwana wa Nuni na Kalevu mwana wa Yevune, amwe ma ala atongoi maendie makamanye kwa kĩmbithĩ ũndũ andũ ma nthĩ ya Kanaani matũaa, nĩmatembũangie ngũa syoo nĩ woo. 7Nĩmaneenie na andũ onthe ma Ĩsilaeli mamea atĩĩ, “Nthĩ ĩla tũnaendie kũmanya ũndũ ĩilyĩ nĩ nthĩ nzeo mũno. 8Ethĩwa Mwĩai Ngai nĩwendeeaw'a nĩ ithyĩ, nũkũtũtongoesya na kũtũvikya nthĩ ĩsu nthwii na nou na aitũnenga tũmĩmesye. 9#Aevl 3.16 Mũikatate kũng'endea Mwĩai Ngai, na mũikakĩe andũ ala matũaa nthĩ ĩsu. Nĩtũũmokita tũmasinde vate thĩna. Mũikakĩe nũndũ Mwĩai Ngai e vamwe naitũ, na nũsindĩte ngai ila imasũvĩaa.” 10Andũ onthe ma Ĩsilaeli nĩmavangie kũmakimanga na mavia, ĩndĩ nĩmoonie ũtheu mũtisu wa Mwĩai Ngai waumĩla ĩũlũ wa Ĩeema ĩtheu ya kũkomanĩa na Ngai.
Mwose Ayĩsũva Ngai Nũndũ wa Andũ ma Ĩsilaeli
11Mwĩai Ngai nĩwaneenie na Mwose amwĩa atĩĩ, “Andũ aa meendeea kũmbũthya nginya ĩndĩĩ? Melea kũndĩkĩĩa nginya ĩndĩĩ, na nĩw'o nĩkĩte syama mbingĩ katĩ woo? 12Nĩngũmaetee ũwau mũthũku na ngĩmamina, ĩndĩ nĩngũũtw'ĩkĩthya ĩthe wa mbaĩ nene ya andũ aingĩ kwĩ mo na yĩ vinya mbee woo!”
13 #
Kuma 32.11-14
Ĩndĩ Mwose nĩweeie Mwĩai Ngai atĩĩ, “Waumisye andũ aa nthĩ ya Misili na ũtonyi waku. Yĩla andũ ma Misili mekwĩw'a ũndũ wĩkanĩte na andũ maku, 14nĩmeũtavya andũ ala mekalaa nthĩ ĩno. Andũ ma nthĩ ĩno nĩmaminĩte kwĩw'a kana we Mwĩai Ngai wĩ vamwe naitũ, nĩwonekaa vyũ yĩla ĩtu yaku yaũngama ĩũlũ waitũ, na kana ũtũtongoeasya mũthenya wĩ nthĩnĩ wa kĩtuĩ kya mũumbĩ, na ũtukũ ũitũtongoesya wĩ nthĩnĩ wa kĩtuĩ kya mwaki. 15Woaa andũ aa maku onthe, andũ ma mbaĩ ila ingĩ ala mekwĩw'a ũndũ wĩkĩte nĩmekwasya atĩĩ, 16‘Mwĩai Ngai nũnaemiwe nĩkũete andũ make nthĩ ĩla wamathie kwa kwĩvĩta, na kwoou nũmoaĩie weũnĩ.’ 17Kwoou yu ĩndĩ Mwĩai Ngai nĩngũkwĩsũva ũtwony'e vinya waku na ũyĩka ũndũ wathanie yĩla waisye, 18#Kuma 20.5-6; 34.6-7; Kũt 5.9-10; 7.9-10 ‘Nyie Mwĩai Ngai ndithataa mĩtũkĩ, nĩ wendo mwingĩ ũtaolekaa, na nĩnĩekeaa andũ mothũku na mavĩtyo moo. Ĩndĩ ndikalea kũkany'a syana syoo, na nzyawa syoo o na kũvika nzyawa ya katatũ na ya kana kwondũ wa naĩ sya asyai masyo.’ 19Yu Mwĩai Ngai kwĩanana na wendo waku mwingĩ ũla ũtaolekaa, nĩngũkwĩsũva ũekee andũ aa naĩ yoo, o ũndũ wĩthĩĩtwe ũimaekea kĩla ĩvinda kuma yĩla maumie nthĩ ya Misili.”
20Mwĩai Ngai nĩwasũngĩie Mwose amwĩa atĩĩ, “Nĩnamaekea o tondũ wambĩsũva nĩke. 21#Aevl 3.18 Ĩndĩ ũu wĩ o vo, o tondũ nĩkalaa thayũ, na o ũndũ nthĩ yusũĩte ũtheu mũtisu wakwa, nĩngwathana kana, 22vai ũmwe wa andũ asu ũkekala thayũ nginya alike nthĩ ya Kanaani. Nĩmonete ũtheu wakwa mũtisu, na syama ila neekie nthĩ ya Misili na weũnĩ, ĩndĩ nĩmandatĩte mavinda maingĩ, na nĩmaleete kũmbĩw'a. 23Andũ asu maikalika nongi nthĩ ĩla nathie aaũmae moo; vai ũmwe wa ala mang'endeaa ũkalika nthĩ ĩsu. 24#Yos 14.9-12 Ĩndĩ nũndũ mũthũkũmi wakwa Kalevu e kĩvathũkany'o namo, na nĩwĩkalĩte aimbĩw'a vyũ, ngamũtwaa nĩmũlikye nthĩ ĩla waendie kũmanya ũndũ ĩilyĩ, na ĩkatw'ĩka ya nzyawa syake. 25Nũndũ Aamaleki na Akanaani matũaa myandanĩ ya nthĩ ĩsu, ũnĩ mwĩsyoka na ĩtina mũthi weũnĩ mwelekele Ũkanganĩ Mũtune.”
Mwĩai Ngai Aikany'a Andũ ma Ĩsilaeli
26Mwĩai Ngai nĩwaneenie na Mwose na Alũni amea atĩĩ, 27“Andũ aa athũku meendeea kũnyungunyĩsya nũndũ wakwa nginya ĩndĩĩ? Nĩnĩnoetw'e nĩ kũnyungunyĩsya kũu kwoo! 28Endai mũkamee atĩĩ, ‘Nĩngwĩvĩta kana o tondũ nyie nĩ thayũ, nĩngũmwĩka maũndũ ala nĩw'ĩte mũineena. Nyie Mwĩai Ngai nĩnaneena. 29#Aevl 3.17 Nĩmũũkw'a na mĩĩ yenyu ĩinyaĩĩkĩa weũnĩ ũũ. Nĩkwĩthĩwa nĩmũnyungunyĩĩtye nũndũ wakwa, vai ũmwe wenyu ũla waĩ na ũkũũ wa myaka mĩongo ĩlĩ na mbee yĩla mwatalawa ũkavika nthĩ ĩsu. 30Vai ũmwe wenyu ũkalika nthĩ ĩla neevĩtie kana ngamũtwaa mũkatũe kw'o, ate o Kalevu mwana wa Yevune na Yosua mwana wa Nuni. 31Syana syenyu ila mwaisye kana ikooswa itw'ĩkĩthw'e ngombo, ngaitwaa ikatanĩe nthĩ ĩsu mwalea. 32Ĩndĩ inyw'ĩ mũkakw'ĩĩa vaa weũnĩ. 33#Meko 7.36 Syana syenyu ikangangaa kũũ weũnĩ vandũ va myaka mĩongo ĩna, na ikathĩna nũndũ wa kwĩthĩwa mũte aĩkĩĩku, nginya inyw'onthe mũkw'ĩĩe weũnĩ mũthele. 34Mũkathĩna kwondũ wa naĩ syenyu vandũ va myaka mĩongo ĩna. Mwaka ũmwe ũkeethĩawa ũũngamĩte vandũ va mũthenya ũmwe wa ĩla mĩthenya mĩongo ĩna ĩla ala matũmiwe Kanaani mekalile maendee kũmanya ũndũ nthĩ ĩsu ĩilyĩ. Mũkamanya ũndũ kwĩthĩawa kũilyĩ yĩla nyie namũlea! 35Nĩngwĩvĩta kana ũu nĩw'o nĩmwĩka inyw'ĩ andũ athũku ala mũmbanĩte vamwe nĩ kana mũngananĩsye. Inyw'onthe mũkakw'ĩĩa vaa weũnĩ. Nyie Mwĩai Ngai nĩnaneena.’ ”
36Ala andũ Mwose watũmĩte mathi makamanye kwa kĩmbithĩ ũndũ nthĩ ya Kanaani ĩilyĩ, na masyoka matuma andũ ma Ĩsilaeli mamũnyungunyĩĩsya Mwĩai Ngai nũndũ wa ũvoo mũthũku ũla maetie ĩũlũ wa nthĩ ĩsu, 37nĩmooaiwe nĩ ũwau mũthũku ũla Mwĩai Ngai wamaeteie. Andũ asu nĩmo manyaĩĩkisye ũvoo mũthũku ĩũlũ wa nthĩ ya Kanaani. 38Yosua mwana wa Nuni na Kalevu mwana wa Yevune nomo mataakw'a katĩ wa andũ ala maendie kũmanya kwa kĩmbithĩ ũndũ nthĩ ya Kanaani ĩilyĩ.
Andũ ma Ĩsilaeli Maitata Kũlika Kanaani Ĩvinda ya Mbee
(Kũt 1.41-46)
39Yĩla Mwose watavisye andũ ma Ĩsilaeli ũvoo ũsu nĩmaĩie na woo mwingĩ. 40Ũnĩ ũsu kwakya tene nĩmaendie melekele nthĩ ĩla yĩ iĩma. Nĩmaneenaa mayasya atĩĩ, “Yu nĩtwĩyũmbanĩtye kũthi nthĩ ĩla Mwĩai Ngai watwathie. Nĩtũkwĩtĩkĩla kana nĩtũvĩtĩtye.”
41Ĩndĩ Mwose amea atĩĩ, “Yu mwĩlea kũmwĩw'a Mwĩai Ngai nĩkĩ? Ũndũ ũsu mũkwenda kwĩka ndwĩtonyeka! 42Mũikathi nthĩ ĩla yĩ iĩma nĩkwĩthĩwa nĩmũũsindwa nĩ amaitha menyu nũndũ Mwĩai Ngai nde vamwe nenyu. 43Mwathi kũkita na Aamaleki na Akanaani nĩmũũkw'ĩĩa kaũnĩ; Mwĩai Ngai ndeĩthĩwa vamwe nenyu nũndũ nĩmũleete kũmwĩw'a.”
44Ũu wĩ o vo andũ ma Ĩsilaeli nĩmaleile kwĩw'a na maendeea kwambata nthĩ ĩla yĩ iĩma, o na vala Ĩsandũkũ ya Ũtianĩo ya Mwĩai Ngai yatiĩtwe maeemanĩ, na Mwose o nake ndaauma vo. 45Nĩvo ĩndĩ Aamaleki na Akanaani ala matwĩe nthĩ ĩsu mokitie andũ ma Ĩsilaeli na mamasinda. Nĩmamasembanisye nginya mathi kũmatiĩla ndũanĩ ya Olima.
Currently Selected:
Mot 14: KAMBA
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011