Mot 2
2
Ũndũ Mbaĩ sya Andũ ma Ĩsilaeli Syambĩte Maeema
1Mwĩai Ngai nĩwaneenie na Mwose na Alũni amea atĩĩ, 2“Andũ ma Ĩsilaeli makambaa maeema moo kĩla mũndũ vala ve kĩvevelo kyake, vala ve ũvano wa andũ ma mũsyĩ wake. Makambaa maeema moo mathyũlũlũkĩte Ĩeema ĩtheu ya kũkomanĩa na Ngai na mayĩsyaĩtye.
3“Ala meambaa maeema moo ngalĩko ya wumĩlonĩ wa syũa ya Ĩeema ĩtheu ya kũkomanĩa na Ngai nĩ ikundi ila syĩ ungu wa kĩvevelo kya Yuta. Mũtongoi woo nĩ Nasoni mwana wa Aminatavu. 4Ũtalo wa aũme ma kĩkundi kyake nĩ ngili mĩongo mũonza na inya, na maana thanthatũ. 5Andũ ma mbaĩ ya Isakali nĩmo meambaa maeema moo vakuvĩ na ala ma mbaĩ ya Yuta. Mũtongoi woo nĩ Nethaneli mwana wa Nzuali. 6Ũtalo wa aũme ma kĩkundi kyake nĩ ngili mĩongo ĩtano na inya, na maana ana. 7Andũ ma mbaĩ ya Nzevuluni nĩmo meatĩĩaa kwamba maeema moo. Mũtongoi woo nĩ Eliavu mwana wa Eeloni. 8Ũtalo wa aũme ma kĩkundi kyake nĩ ngili mĩongo ĩtano na mũonza, na maana ana. 9Ũtalo wa aũme onthe ala meĩthĩwa mambĩte maeema moo ungu wa kĩvevelo kya Yuta kwĩanana na ikundi syoo, nĩ ngili ĩana na mĩongo nyanya na thanthatũ na maana ana. Asu nĩmo makethĩawa me ma mbee kũthi kaũnĩ.
10“Ala meambaa maeema moo ngalĩkonĩ ya ĩtheo ya Ĩeema ĩtheu ya kũkomanĩa na Ngai nĩ ikundi ila syĩ ungu wa kĩvevelo kya Lũveni. Mũtongoi woo nĩ Elisuli mwana wa Seteuli. 11Ũtalo wa aũme ma kĩkundi kyake nĩ ngili mĩongo ĩna na thanthatũ, na maana atano. 12Andũ ma mbaĩ ya Simioni nĩmo meambaa maeema moo vakuvĩ na ala ma mbaĩ ya Lũveni. Mũtongoi woo nĩ Selumieli mwana wa Nzulisatai. 13Ũtalo wa aũme ma kĩkundi kyake nĩ ngili mĩongo ĩtano na kenda na maana atatũ. 14Andũ ma mbaĩ ya Ngandi nĩmo meatĩĩaa kwamba maeema moo. Mũtongoi woo nĩ Eliasavu mwana wa Leueli. 15Ũtalo wa aũme ma kĩkundi kyake nĩ ngili mĩongo ĩna na itano, maana thanthatũ na mĩongo ĩtano. 16Ũtalo wa aũme onthe ala meĩthĩwa mambĩte maeema moo ungu wa kĩvevelo kya Lũveni kwĩanana na ikundi syoo nĩ ngili ĩana na mĩongo ĩtano na ĩmwe, maana ana na mĩongo ĩtano. Asu nĩmo makethĩawa me ma kelĩ kũthi kaũnĩ.
17“Nĩvo ĩndĩ Alivai makaendaa me katĩ makuĩte Ĩeema ĩtheu ya kũkomanĩa na Ngai; ikundi ĩla ilĩ sya mbee ikeethĩawa itongoetye, na ila ingĩ ilĩ syĩ ĩtina. Kĩla kĩkundi kĩkaendaa kĩatĩĩe kĩla kĩngĩ kwĩanana na ũndũ mambĩte maeema, kĩla kĩmwe kĩ ungu wa kĩvevelo kyoo.
18“Ala meamba maeema moo ngalĩko ya ũthũĩlonĩ wa syũa ya Ĩeema ĩtheu ya kũkomanĩa na Ngai nĩ ikundi ila syĩ ungu wa kĩvevelo kya Evalaimu. Mũtongoi woo nĩ Elisama mwana wa Amiuti. 19Ũtalo wa aũme ma kĩkundi kyake nĩ ngili mĩongo ĩna na maana atano. 20Andũ ma mbaĩ ya Manase nĩmo meatĩĩaa kwamba maeema moo. Mũtongoi woo nĩ Ngamalieli mwana wa Vetasuli. 21Ũtalo wa aũme ma kĩkundi kyake nĩ ngili mĩongo ĩtatũ na ilĩ na maana elĩ. 22Andũ ma mbaĩ ya Mbengyameni nĩmo meatĩĩaa kwamba maeema moo. Mũtongoi woo nĩ Avitani mwana wa Ngitioni. 23Ũtalo wa aũme ma kĩkundi kyake nĩ ngili mĩongo ĩtatũ na itano na maana ana. 24Ũtalo wa aũme onthe ala meĩthĩwa mambĩte maeema moo ungu wa kĩvevelo kya Evalaimu kwĩanana na ikundi syoo nĩ ngili ĩana yĩmwe na nyanya na ĩana yĩmwe. Asu nĩmo makethĩawa me ma katatũ kũthi kaũnĩ.
25“Ala meambaa maeema moo ngalĩko ya ĩũlũ ya Ĩeema ĩtheu ya kũkomanĩa na Ngai nĩ ikundi ila syĩ ungu wa kĩvevelo kya Ndani. Mũtongoi woo nĩ Aieseli Mwana wa Amisatai. 26Ũtalo wa aũme ma kĩkundi kyake nĩ ngili mĩongo thanthatũ na ilĩ na maana mũonza. 27Andũ ma mbaĩ ya Aseli nĩmo meatĩĩaa kwamba maeema moo. Mũtongoi woo nĩ Vakieli mwana wa Okalani. 28Ũtalo wa aũme ma kĩkundi kyake nĩ ngili mĩongo ĩna na ĩmwe na maana atano. 29Andũ ma mbaĩ ya Navutalĩ nĩmo meatĩĩaa kwamba maeema moo. Mũtongoi woo nĩ Aila mwana wa Enani. 30Ũtalo wa aũme ma kĩkundi kyake nĩ ngili mĩongo ĩtano na itatũ na maana ana. 31Ũtalo wa aũme onthe ala meĩthĩwa mambĩte maeema moo ungu wa kĩvevelo kya Ndani nĩ ngili ĩana na mĩongo ĩtano na mũonza na maana thanthatũ. Asu nĩmo makethĩawa me ma mũthya kũthi kaũnĩ, kĩla kĩkundi kĩ ungu wa kĩvevelo kyoo.”
32Asu nĩmo andũ ma Ĩsilaeli ala matalilwe kwĩanana na mĩsyĩ yoo. Andũ onthe ala matalilwe me maeemanĩ, kĩla amwe me kĩkundinĩ kyoo maĩ ngili maana thanthatũ na itatũ, maana atano na mĩongo ĩtano. 33Kwĩanana na ũndũ Mwĩai Ngai weeaĩĩte Mwose, Alivai mayaatalwa vamwe na andũ ala angĩ ma Ĩsilaeli.
34Kwoou andũ ma Ĩsilaeli nĩmeekie maũndũ onthe ala Mwĩai Ngai weeaĩĩte Mwose. Nĩmambie maeema kĩla ũmwe e ungu wa kĩvevelo kyake, na o ta ũu nĩmaendaa kĩla ũmwe e na andũ ma mbaĩ na mũsyĩ wake.
Currently Selected:
Mot 2: KAMBA
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011
