Mot 3
3
Ana ma Alũni
1Ii nĩsyo nzyawa sya Alũni na Mwose ĩvindanĩ yĩla Mwĩai Ngai waneenaa na Mwose Kĩĩmani kya Sinaĩ. 2#Mot 26.60 Ana ma Alũni maĩ ana, namo nĩ: Natavu, ũla nĩwe waĩ mwana wa mbee, Aviu, Eleasali, na Ĩthamali. 3Asu nĩmo metĩkĩiw'e mauta na mavathwa methĩwe athembi. 4#Ali 10.1-2; Mot 26.61 Ĩndĩ Natavu na Aviu nĩmakwie yĩla mathembeie Mwĩai Ngai nthembo ya ũvani na mwaki ũtetĩkĩlĩtw'e yĩla maĩ Weũnĩ wa Sinaĩ, na kwoou mayaakwata syana. Eleasali na Ĩthamali nĩmathũkũmaa ta athembi ĩvindanĩ yĩla Alũni waĩ thayũ.
Alivai Mainyuvwa Matetheeasye Athembi
5Mwĩai Ngai nĩwaneenie na Mwose amwĩa atĩĩ, 6“Ete Alivai na ũimanengane kũla kwĩ mũthembi Alũni methĩawe atetheesya make. 7Makatethasya wĩa kwondũ wa Alũni na andũ onthe ma Ĩsilaeli yĩla mekũthũkũma Ĩeemanĩ ĩtheu ya kũkomanĩa na Ngai. 8Makasũvĩaa syĩndũ syonthe ila syĩ Ĩeemanĩ ĩtheu ya kũkomanĩa na Ngai, na kũtethasya wĩa Ĩeemanĩ yĩu kwondũ wa andũ ala angĩ onthe ma Ĩsilaeli. 9Nengane Alivai kũla kwĩ Alũni na ana make; nĩmo manenganĩtwe katĩ wa mbaĩ sya Ĩsilaeli mamatetheeasye. 10Nyuva Alũni na ana make metethasye wĩa wa athembi. Mũndũ ũngĩ o na wĩva ũla wĩtata kũtethya wĩa ũsu no nginya oawe.”
11Mwĩai Ngai nĩwaendeeie kũneena na Mwose aimwĩa atĩĩ, 12“Nĩnĩnyuvĩte Alivai kuma andũnĩ ma Ĩsilaeli vandũ va kavĩsĩ ka mbee kuma kĩla mũsyĩ wa andũ ma Ĩsilaeli. Alivai nĩ makwa, 13#Kuma 13.2 nũndũ tũvĩsĩ tw'onthe tũla tũsyaĩtwe mbee andũnĩ ma Ĩsilaeli, na nyamũ syoo syonthe ila isyaĩtwe mbee nĩ syakwa. Ĩvindanĩ yĩla nooaie tũvĩsĩ tw'onthe tũla twasyaĩtwe mbee andũnĩ ma Misili, na nooaa nyamũ syoo syonthe ila syasyaĩtwe mbee, nĩw'o neevathĩie syana syonthe sya mbee kuma andũnĩ ma Ĩsilaeli, o vamwe na nyamũ syoo ila syasyaĩtwe mbee. Ninyie Mwĩai Ngai.”
Kũtalwa kwa Alivai
14Mwĩai Ngai nĩwaneenie na Mwose weũnĩ wa Sinaĩ amwĩa atĩĩ, 15“Tala Alivai kwĩanana na mĩsyĩ na mbaĩ syoo. Tala aũme onthe ala me na ũkũũ wa mwei ũmwe na mbee.” 16Kwoou Mwose nĩwatalile Alivai kwĩanana na ũndũ Mwĩai Ngai wamwĩaĩĩte. 17Aa nĩmo masyĩtwa ma ana ma Livai: Ngelisoni, Koathi na Melali. 18Aa nĩmo masyĩtwa ma ana ma Ngelisoni kwĩanana na mĩsyĩ yoo: Livini na Simei. 19Nao masyĩtwa ma ana ma Koathi kwĩanana na mĩsyĩ yoo nĩmo aa: Amilamu, Isali, Eviloni na Usieli. 20Ana ma Melali kwĩanana na mĩsyĩ yoo maĩ Mali na Musi. Isu nĩsyo syaĩ mbaĩ sya Alivai kwĩanana na mĩsyĩ yoo.
21Mbaĩ ya Ngelisoni yaĩ mĩsyĩ ya Livini na Simei. 22Aũme onthe ala maĩ na ũkũũ wa mwei ũmwe na mbee, ala matalilwe maĩ ngili mũonza na maana atano. 23Andũ ma mbaĩ ya Ngelisoni maaĩlĩte kwamba maeema moo ngalĩko ya ũthũĩlonĩ wa syũa, ĩtina wa yĩla Ĩeema ĩtheu. 24Mũtongoi wa mbaĩ ĩsu ya Ngelisoni aĩ Eliasavu mwana wa Laeli. 25Wĩa ũla andũ ma mbaĩ ya Ngelisoni matethasya waĩ kũsũvĩa Ĩeema ĩtheu ya kũkomanĩa na Ngai, syĩndũ sya kũyĩvw'ĩka, suka ila syaĩ mũvĩanĩ wa kũlika Ĩeemanĩ yĩu, 26suka ila syeelingĩlĩte kĩwanza kya Ĩeema, na ila syaĩ mũvĩanĩ wa kĩwanza kĩu, na ila syaanĩtye kĩthembeo na Ĩeema. O ta ũu nĩmasũvĩaa makanda ala matũmĩawa kwamba Ĩeema, na syĩndũ ila ingĩ syonthe syatũmĩawa kwamba Ĩeema yĩu.
27Mbaĩ ya Koathi yaĩ mĩsyĩ ya Amilamu, Ĩsali, Eviloni, na Usieli. 28Aũme onthe ala maĩ na ũkũũ wa mwei ũmwe na mbee ala matalilwe waĩ ngili nyanya na maana thanthatũ na wĩa woo waĩ kũsũvĩa Ĩeema ĩtheu. 29Andũ ma mbaĩ ya Koathi maaĩlĩte kwamba maeema moo ngalĩko ya ĩtheo ya Ĩeema ĩtheu. 30Mũtongoi wa mbaĩ ĩsu aĩ Elisavani mwana wa Usieli. 31Wĩa ũla andũ ma mbaĩ ya Koathi matethasya waĩ kũsũvĩa Ĩsandũkũ ya Ũtianĩo, mesa ya mũkate ũthembewe Mwĩai Ngai, kĩndũ kya kwilĩĩla taa, ithembeo, syĩndũ ila athembi matũmĩaa me vala Vandũ Vatheu, na suka ila syĩ mũomonĩ wa kũlika vala Vandũ Vatheu Mũno. Andũ ma mbaĩ ya Koathi nĩmatethasya wĩa w'onthe ũla ũkonanĩtye na syĩndũ isu.
32Eleasali mwana wa mũthembi Alũni nĩwe watongoesye atongoi ala angĩ ma Alivai. Nĩwe waũngamĩe andũ onthe ala mathũkũmaa vala Vandũ Vatheu.
33Mbaĩ ya Melali yaĩ mĩsyĩ ya Mali na Musi. 34Aũme onthe ala maĩ na ũkũũ wa mwei ũmwe na mbee ala matalilwe maĩ ngili thanthatũ na maana elĩ. 35Andũ ma mbaĩ ya Melali maaĩlĩte kwamba maeema moo ngalĩko ya ĩũlũ ya Ĩeema ĩtheu. Mũtongoi wa mbaĩ ĩsu aĩ Nzulieli mwana wa Aviaili. 36Wĩa ũla andũ ma mbaĩ ya Melali manyuvĩtwe matethasye waĩ kũsũvĩa mbwaũ sya kũũngamya Ĩeema ĩtheu, mĩamba ya yo, ituĩ, matina, na syĩndũ syonthe ila sya kũikwatany'a. Matethasya wĩa w'onthe ũla wakonanĩtye na syĩndũ isu. 37O ta ũu nĩmo masũvĩaa ituĩ, matina, syambo, na makanda. Syĩndũ isu nĩsyo syatũmĩawa kwondũ wa kũseũvya kĩwanza kĩla kĩthyũlũlũkĩte Ĩeema. 38Mwose, Alũni na ana moo nĩmo maaĩlĩte kwamba maeema moo mbee wa Ĩeema ĩtheu, ngalĩko ya wumĩlonĩ wa syũa. Wĩa woo waĩ wa kũtethya wĩa w'onthe wa kĩ-ũthaithi Ĩeemanĩ ĩtheu kwondũ wa andũ onthe ma Ĩsilaeli. Mũndũ ũngĩ o na wĩva ũla watataa kũtethya wĩa ũsu aĩ no nginya oawe. 39Aũme onthe ma Alivai ala maĩ na ũkũũ wa mwei ũmwe na mbee, ala Mwĩai Ngai weeaĩĩte Mwose na Alũni matale kwĩanana na mbaĩ syoo maĩ ngili mĩongo ĩlĩ na ilĩ.
Alivai Mayosa Mwanya wa Tũvĩsĩ twa mbee twa Ĩsilaeli
40Mwĩai Ngai nĩwaneenie na Mwose amwĩa atĩĩ, “Tala aũme onthe ma Ĩsilaeli ala masyaĩtwe mbee, na me na ũkũũ wa mwei ũmwe na mbee, na ũiandĩka masyĩtwa moo. 41Osa Alivai methĩwe makwa vandũ va aũme ma Ĩsilaeli onthe ala masyaĩtwe mbee. O ta ũu osa indo sya Alivai syĩthĩwe syakwa vandũ va ila isyaĩtwe mbee sya andũ ma Ĩsilaeli.” 42Kwoou Mwose nĩwatalile aũme ma Ĩsilaeli ala masyaĩtwe mbee, kwĩanana na ũndũ Mwĩai Ngai wamwĩaĩĩte. 43Aũme onthe ala masyaĩtwe mbee na maĩ na ũkũũ wa mwei ũmwe na mbee, ala maandĩkiwe masyĩtwa moo maĩ ngili mĩongo ĩlĩ na ilĩ, maana elĩ na mĩongo mũonza na atatũ.
44Mwĩai Ngai nĩwaendeeie kũneena na Mwose aimwĩa atĩĩ, 45“Yu vatha Alivai onthe methĩwe makwa vandũ va aũme onthe ma Ĩsilaeli ala masyaĩtwe mbee. O ta ũu vatha indo syonthe sya Alivai vandũ va indo sya andũ ma Ĩsilaeli ila isyaĩtwe mbee. 46Nũndũ aũme ala masyaĩtwe mbee ma Ĩsilaeli nĩ aingĩ kwĩ aũme ma Alivai kwa aũme maana elĩ na mĩongo mũonza na atatũ, no nginya wovosye asu me ĩũlũ. 47Kĩla ũmwe akoovoaw'a na silĩva itano kwĩanana na kĩthimo kya mbesa kĩla kĩtũmĩawa Ĩeemanĩ ĩtheu. 48Mbesa isu sya kwovosya aũme asu inengwe Alũni na ana make.” 49Kwoou aũme ma Ĩsilaeli ala mathonokete ũtalo wa aũme ma Alivai nĩmanengie Mwose mbesa sya kũmovosya. 50Mwose oombanisye silĩva ngili ĩmwe maana atatũ na mĩongo thanthatũ na itano, 51na ainenga Alũni na ana make kwĩanana na ũndũ Mwĩai Ngai wamwĩaĩĩte.
Currently Selected:
Mot 3: KAMBA
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011