Mot 24
24
1Ĩvinda yĩĩ Mbalaamu nĩwamanyie kana Mwĩai Ngai endaa kũathima andũ ma Ĩsilaeli, na kwoou ndaathi kũaũsya ũndũ weekaa navu mbeenĩ. Nĩwavindũkie asisya weũnĩ 2na oona andũ ma Ĩsilaeli mambĩte maeema moo kĩla mbaĩ vandũ vayo. Veva wa Ngai nĩwalikile nthĩnĩ wake 3na aneena wathani ũũ:
“Ũtũmani wa Mbalaamu mwana wa Mbeoli,
ndeto sya mũndũ ũtonya kwona nesa,
4ũla ũtonya kwĩw'a ũndũ Ngai ũkwasya,
ũla wonaa woni kuma kwa Mwene Ũtonyi W'onthe,
avalũkĩte nthĩ, ĩndĩ metho make masalukĩtye.
5Maeema maku we Yakovo nĩmanake mũno,
ĩĩ, mawĩkalo maku we Ĩsilaeli!
6Manyaĩĩkĩe mbee wakwa ta mĩkĩndũ yĩ mwandanĩ,
mailyĩ ta mĩũnda yĩ ũtee wa ũsĩ,
mailyĩ mĩtĩ yĩ mũuke mũseo ĩvandĩtwe nĩ Mwĩai Ngai,
mailyĩ mĩtĩ ya mĩkũũ ĩvandĩtwe ũtee wa kĩw'ũ.
7Makeethĩawa na mbua mbingĩ,
na kũvandaa mbeũ syoo mĩũndanĩ mĩnyithye nesa.
Mũsumbĩ woo akeethĩawa e nguma mbee wa Mũsumbĩ Akaki,
na ũsumbĩ wake ũkakumaw'a.
8Ngai nĩwe wamaumĩsye nthĩ ya Misili;
vinya wake wa kũmokitĩa nĩ ta wa mboo.
Nĩmasindaa amaitha moo,
makatũlanga mavĩndĩ moo, na kũmaatha mũkuthũ na maangi moo.
9 #
Mwa 12.3; 49.9 Andũ ma Ĩsilaeli mailyĩ ta mũnyambũ wĩ vinya,
yĩla ũkomete, vai mũndũ wĩtĩkĩla kũũamũkya.
Mũndũ o na wĩva ũla wĩathima andũ ma Ĩsilaeli akaathimwa;
na mũndũ o na wĩva ũla wĩumanĩa andũ ma Ĩsilaeli, akaumanĩwa.”
10Mbalaki nĩwathatiw'e mũno nĩ Mbalaamu, na akũnany'a moko amwĩa atĩĩ, “Nĩnakũtũmanĩte wũke kũumanĩa amaitha makwa, ĩndĩ yu ũmaathimĩte mavinda atatũ. 11Yu ĩnũka vyũ! Nĩnakwathĩte kana ngakũtuva nesa, ĩndĩ Mwĩai Ngai nĩwatuma ũlea kũkwata ĩtuvi yĩu.”
12Mbalaamu nĩwamũsũngĩie amwĩa atĩĩ, “Nĩnatavisye ala andũ watũmie kũla nĩĩ kana, 13o na ethĩwa ũkanenga silĩva na thaavu w'onthe ũla wĩ nyũmbanĩ yaku ya kĩ-ũsumbĩ, ndikalea kũatĩĩa mwĩao wa Mwĩai Ngai kwa kwĩka kwenda kwakwa nyie mwene. Nganeenaa o maũndũ ala Mwĩai Ngai wambĩa nĩneene.”
Wathani wa Kana wa Mbalaamu
14Mbalaamu nĩweeie Mbalaki atĩĩ, “Yu nĩngũsyoka kwa andũ ma mũsyĩ wakwa, ĩndĩ ndanamba kũthi nĩngũũtavya ũndũ andũ ma Ĩsilaeli meĩka andũ maku ĩvindanĩ yũkĩte.” 15Nĩvo ĩndĩ Mbalaamu waneenie wathani ũũ:
“Ũtũmani wa Mbalaamu mwana wa Mbeoli
ndeto sya mũndũ ũtonya kwona nesa,
16ũla ũtonya kwĩw'a ũndũ Ngai ũkwasya,
na aikwata ũmanyi kuma kwa Ũla wĩ Ĩũlũ Mũno;
ũla wonaa woni kuma kwa Mwene Ũtonyi W'onthe,
avalũkĩte nthĩ, ĩndĩ metho make masalukĩtye.
17Nĩngũmwona ĩndĩ ti yu,
nĩngũmũsisya ĩndĩ ti vakuvĩ.
Kũkauma ndata nthĩnĩ wa Yakovo,
na ndata ya kĩ-ũsumbĩ ĩkookĩla kuma Ĩsilaeli.
Mũsumbĩ ũsu akooaa atongoi ma Moavi,
na kũaa nzyawa syonthe sya Sethi.
18Akasinda amaitha make ala me ndũanĩ ya Etomu,
na aitw'ĩkĩthya nthĩ yoo ng'ũndũ yake,
andũ ma Ĩsilaeli maendee na kũsinda.
19Nthĩnĩ wa Yakovo vakauma mũsumbĩ,
na akamina amaitha moo onthe ala makethĩwa matialĩte ndũanĩ ĩsu.”
Wathani wa Mũthya wa Mbalaamu
20Nĩvo ĩndĩ Mbalaamu woonie Aamaleki nthĩnĩ wa woni na aneena wathani ũũ:
“Mbaĩ ya Aamaleki nĩyo yaĩ vinya mbee wa mbaĩ ila ingĩ syonthe,
ĩndĩ mũminũkĩlyonĩ ĩkaminwa.”
21Nthĩnĩ wa woni wake nĩwoonie Akeni na aneena wathani ũũ:
“Vala mũtũaa ve ũsũvĩo,
vailyĩ ta ndala yakĩtwe vandũ vatũlu ũvainĩ wa ĩvia.
22Ĩndĩ inyw'ĩ Akeni mũkaminwa,
yĩla mwĩkwatwa ũkombo nĩ Asuli.”
23O ĩngĩ Mbalaamu nĩwathanie asya atĩĩ:
“Nũũ ũla wĩtiala yĩla Ngai wĩĩka maũndũ asu?
24Amaitha makooka na meli kuma Saivulasi,
makokita andũ ma Asuli na ma Eveli,
ĩndĩ o namo makaminwa.”
25Nĩvo ĩndĩ Mbalaamu wookĩlile enũka, nake Mũsumbĩ Mbalaki eeyĩendea.
Currently Selected:
Mot 24: KAMBA
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011