Mot 25
25
Andũ ma Ĩsilaeli Maithaitha ngai yĩtawa Mbaali ya Veoli
1Andũ ma Ĩsilaeli maendee kwĩkala Sitimu aũme moo nĩmambĩĩie kwĩka ũmalwaya na aka ma Amoavi ala matũaa vau. 2Aka asu nĩmamathokisye mbokanĩ sya kũthembea ngai syoo, na andũ ma Ĩsilaeli maya na mathaitha ngai isu. 3Kwoou andũ ma Ĩsilaeli nĩmambĩĩie kũthaitha ngai ĩla yĩtawa Mbaali ya Veoli, na nũndũ wa ũu mathatya Mwĩai Ngai mũno. 4Mwĩai Ngai nĩweeie Mwose atĩĩ, “Osa atongoi onthe ma andũ ma Ĩsilaeli na ũimasũĩsya mbee wakwa vala andũ matonya kũmona, nĩ kana ũthatu wakwa nũndũ wenyu ũthele.” 5Mwose nĩweeie asili ma andũ ma Ĩsilaeli atĩĩ, “Kĩla ũmwe wenyu nĩoae mũndũ o na wĩva wa mbaĩ yake ũla ũtw'ĩkĩte mũthaithi wa ngai ya mũvw'anano yĩtawa Mbaali ya Veoli.”
6Mũndũ ũmwe wa mbaĩ ya Ĩsilaeli nĩwoosie mũndũ mũka Mũmitiani, na amũtwaa Ĩeemanĩ Mwose na andũ ala angĩ onthe ma Ĩsilaeli masyaĩĩsye, ĩvindanĩ yĩla maendee na kũĩa me mũvĩanĩ wa Ĩeema ĩtheu ya kũkomanĩa na Mwĩai Ngai. 7Yĩla Vineasi mwana wa Eleasali, mwĩsũkũũe wa mũthembi Alũni woonie ũu, nĩwookĩlile na auma vala ve andũ ala angĩ. Nĩwoosie ĩtumo 8na aatĩĩa mũndũ-ũme ũsu na mũndũ mũka ũla malikĩte Ĩeemanĩ vamwe, na amatonya mũkuthũ na ĩtumo yĩu me elĩ. Kwa kwĩka ũu ũwau mũthũku ũla waendee na kũaa andũ ma Ĩsilaeli nĩwathelile. 9Kũvika vau ũwau ũsu wooaĩte andũ ngili mĩongo ĩlĩ na inya.
10Mwĩai Ngai nĩwaneenie na Mwose amwĩa atĩĩ, 11“Nũndũ wa ũndũ ũsu Vineasi mwana wa Eleasali, mwĩsũkũũe wa mũthembi Alũni weeka, ũthatu wakwa nũndũ wa andũ ma Ĩsilaeli nĩwathela. Nũleete kwĩtĩkĩla ũthaithi wa ngai ingĩ eka nyie, na kĩu nĩkyo kĩtumie ndamina andũ ma Ĩsilaeli ũthatunĩ wakwa. 12Kwoou enda ũkamũtavye kana nĩngũseũvya ũtianĩo wa mũuo nake. 13Nĩngũtianĩa nake kana we e na nzyawa syake makeethĩawa athembi tene na tene, nũndũ ndanetĩkĩla nyie Ngai wake nĩthaithanĩaw'e na ngai ingĩ, na atuma nĩekea andũ ma Ĩsilaeli naĩ yoo.”
14Ũla mũndũ wa Ĩsilaeli wooaiwe e na mũndũ mũka Mũmitiani eetawa Nzimili. Nzimili aĩ mwana wa Salu, ũla waĩ mũtongoi wa mũsyĩ ũmwe wa andũ ma mbaĩ ya Simioni. 15Nake ũla mũndũ mũka Mũmitiani wooaiwe eetawa Kosivi mwĩĩtu wa Nzuli, ũla waĩ mũtongoi wa mũsyĩ ũmwe wa mbaĩ ya Amitiani.
16Mwĩai Ngai nĩweeie Mwose atĩĩ, 17“Enda ũkokite na Amitiani ũmamine, 18nũndũ wa ũthũku ũla makwĩkie yĩla mamũkengie mwĩ Veoli, na nũndũ wa Kosivi mwĩĩtu wa ũmwe wa atongoi ma Mitiani, ũla wooaiwe yĩla kwaĩ ũwau mũthũku ũla wookie nũndũ wa naĩ ĩla meekĩie Veoli.”
Currently Selected:
Mot 25: KAMBA
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011