Mot 26
26
Kũtalwa kwa Andũ ma Ĩsilaeli Ĩvinda ya Kelĩ
1 #
Mot 1.1-46
Ĩtina wa ũla ũwau ũsu mũthũku, Mwĩai Ngai nĩwaneenie na Mwose na Eleasali mwana wa mũthembi Alũni amea atĩĩ, 2“Talai andũ onthe ma Ĩsilaeli kwĩanana na mĩsyĩ yoo; aũme ala me na ũkũũ wa myaka mĩongo ĩlĩ na mbee na matonya kũthi kaũnĩ.” 3Mwose na mũthembi Eleasali nĩmaneenie na andũ me ũiĩnĩ wa Moavi mũingo wa Ũsĩ wa Yolotani vakuvĩ na Yeliko mamea atĩĩ, 4“Talai aũme ala me na ũkũũ wa myaka mĩongo ĩlĩ na mbee, kwĩanana na ũndũ Mwĩai Ngai wĩaĩte.”
Ũũ nĩw'o ũtalo wa andũ ma Ĩsilaeli ala maumie nthĩ ya Misili:
5Mbaĩ ya Lũveni mwana ũla mũkũũ wa Yakovo yaĩ na mĩsyĩ ya ana make ala nĩ Anoki, Valu, 6Esiloni na Kalimi. 7Ũtalo wa aũme ma mĩsyĩ ĩsu waĩ ngili mĩongo ĩna na itatũ, maana mũonza na mĩongo ĩtatũ. 8Mwana wa Valu eetawa Eliavu, 9na ana ma Eliavu maĩ Nemueli, Ndathani na Avilamu. Ndathani na Avilamu nĩ ala aũme manyuvĩtwe nĩ andũ ma Ĩsilaeli. Nĩmang'endeie Mwose na Alũni na meethĩwa na ngwatanĩo na aatĩĩi ma Kola yĩla mamũng'endeie Mwĩai Ngai. 10Ĩvindanĩ yĩu nthĩ nĩyaatũkie yamamelya, na makw'a vamwe na Kola na aatĩĩi make yĩla mwaki wavĩvisye andũ maana elĩ na mĩongo ĩtano, na kwondũ wa ũu matw'ĩka ũkany'o kwa andũ ala angĩ. 11Ĩndĩ ana ma Kola mayaakw'a.
12Mbaĩ ya Simioni yaĩ na mĩsyĩ ya ana make ala nĩ: Nemueli, Yamini, Yakini, 13Nzela na Sauli. 14Ũtalo wa aũme ma mĩsyĩ ĩsu waĩ ngili mĩongo ĩlĩ na ilĩ, na maana elĩ.
15Mbaĩ ya Ngandi yaĩ na mĩsyĩ ya ana make ala nĩ, Nzevoni, Aki, Suni, 16Osini, Eeli, 17Aloti, na Aleli. 18Ũtalo wa aũme ma mĩsyĩ ĩsu waĩ ngili mĩongo ĩna na maana atano.
19Eeli na Onani ana ma Yuta makw'ĩĩe nthĩ ya Kanaani. 20Mbaĩ ya Yuta yaĩ na mĩsyĩ ya ana make ala nĩ Siela, Velesi, na Nzela. 21O ta ũu mbaĩnĩ ĩsu vaĩ mĩsyĩ ya ana ma Velesi ala nĩ Esiloni na Amuli. 22Ũtalo wa aũme ma mĩsyĩ ĩsu waĩ ngili mĩongo mũonza na thanthatũ na maana atano.
23Mbaĩ ya Isakali yaĩ na mĩsyĩ ya ana make ala nĩ Tola, Vuva, 24Yasuvu na Similoni. 25Ũtalo wa aũme ma mĩsyĩ ĩsu ya Isakali waĩ ngili mĩongo thanthatũ na inya na maana atatũ.
26Mbaĩ ya Nzevuluni yaĩ na mĩsyĩ ya ana make ala nĩ Seletu, Eloni na Yaleeli. 27Ũtalo wa aũme ma mĩsyĩ ĩsu waĩ ngili mĩongo thanthatũ na maana atano.
28Mbaĩ sya ana ma Yosevu syaĩ ilĩ: Manase na Evalaimu.
29Mbaĩ ya Manase yaĩ na mũsyĩ wa Makili mwana wake ũla waĩ ĩthe wa Ngileati. Mĩsyĩ ĩno ĩatĩĩe yaĩ ya nzyawa sya Ngileati 30ila nĩ Ieseli, Eleki, 31Asilieli, Sekemu, 32Semita na Eevieli. 33Nzeloveati mwana wa Eevieli ndaĩ na syana sya aũme, ĩndĩ aĩ na eĩtu. Masyĩtwa ma eĩtu asu make nĩ Maala, Noa, Okila, Milika, na Tilisa. 34Ũtalo wa aũme ma mĩsyĩ ĩsu waĩ ngili mĩongo ĩtano na ilĩ na maana mũonza.
35Mbaĩ ya Evalaimu yaĩ na mĩsyĩ ya ana make ala nĩ Suthela, Mbekeli na Taani. 36Nzyawa sya Suthela nĩsyo syaĩ andũ ma mũsyĩ wa Elani. 37Ũtalo wa aũme ma mĩsyĩ ĩsu waĩ ngili mĩongo ĩtatũ na ilĩ na maana atano.
Ĩsu nĩyo mĩsyĩ ĩla yaumanĩte na nzyawa sya Yosevu.
38Mbaĩ ya Mbengyameni yaĩ na mĩsyĩ ya ana make ala nĩ Mbela, Asiveli, Ailamu, 39Suvamu na Uvamu. 40Nzyawa sya Mbela nĩsyo syaĩ andũ ma mĩsyĩ ya Aliti, na Naamani. 41Ũtalo wa aũme ma mĩsyĩ ĩsu waĩ ngili mĩongo ĩna na itano na maana thanthatũ.
42Mbaĩ ya Ndani yaĩ na mũsyĩ wa mwana wake Suaamu, 43na ũtalo wa aũme ma mũsyĩ ũsu waĩ ngili mĩongo thanthatũ na inya na maana ana.
44Mbaĩ ya Aseli yaĩ na mĩsyĩ ya ana make ala nĩ Imina, Isiva na Mbelia. 45Nzyawa sya Mbelia nĩsyo syaĩ andũ ma mũsyĩ wa Eeveli na Malikieli. 46Aseli aĩ na mwĩĩtu weetawa Selaa. 47Ũtalo wa aũme ma mĩsyĩ ĩsu waĩ ngili mĩongo ĩtano na itatũ na maana ana.
48Mbaĩ ya Navutalĩ yaĩ na mĩsyĩ ya ana make ala nĩ Yaseeli, Nguni, 49Yeseli na Silemu. 50Ũtalo wa aũme ma mĩsyĩ ĩsu waĩ ngili mĩongo ĩna na itano na maana ana.
51Ũtalo wa aũme onthe ma Ĩsilaeli waĩ ngili maana thanthatũ na ĩmwe, maana mũonza na mĩongo ĩtatũ.
52 #
Mot 34.13; Yos 14.1-2 Mwĩai Ngai nĩwaneenie na Mwose amwĩa atĩĩ, 53“Andũ ma Ĩsilaeli makaaĩwa nthĩ ya Kanaani yĩthĩwe ng'ũndũ yoo kwĩanana na masyĩtwa ma mĩsyĩ yoo. 54Mbaĩ ĩla yĩna andũ aingĩ ĩnengwe kĩsio kĩnene kya nthĩ na mbaĩ ĩla yĩna andũ anini ĩinengwa kĩsio kĩnini; kĩla mbaĩ ĩkakwataa ng'ũndũ ya yo kwĩanana na masyĩtwa ala maandĩke.
55“Nthĩ ĩsu ya Kanaani ĩaanw'e kwa kũkũnĩwa kũla. Kĩla mbaĩ ĩkakwataa ng'ũndũ kwĩanana na masyĩtwa ma mĩsyĩ yoo. 56Kĩla kĩsio kya nthĩ ya ng'ũndũ kĩkaanaw'a kwa kũkũnĩwa kula, na kĩla mbaĩ ĩikwata kĩsio kya nthĩ ya ng'ũndũ kwĩanana na ũndũ andũ ma mbaĩ ĩsu meana.”
57Mbaĩ ya Livai yaĩ na mĩsyĩ ya Ngelisoni, Koathi na Melali. 58O ta ũu mbaĩ ĩsu ya Livai yaĩ na mĩsyĩ ya Livini, Eviloni, Mali, Musi na Kola. Koathi nĩwe waĩ ĩthe wa Amilamu. 59Mũka wa Amilamu eetawa Yokeveti, mwĩĩtu wa Livai na asyaĩwe nthĩ ya Misili. Yokeveti asyaĩe Amilamu ana elĩ namo nĩ Alũni na Mwose, na o ta ũu amũsyaĩa mwĩĩtu weetawa Miliamu. 60#Mot 3.2 Ana ma Alũni maĩ Natavu, Aviu, Eleasali, na Ĩthamali. 61#Ali 10.1-2; Mot 3.4 Natavu na Aviu makwie yĩla mathembeie Mwĩai Ngai nthembo ya ũvani na mwaki ũtetĩkĩlĩtw'e. 62Ũtalo wa aũme onthe ma Alivai ala maĩ na ũkũũ wa mwei ũmwe na mbee waĩ ngili mĩongo ĩlĩ na itatũ. Mayaatalanĩlw'a vamwe na andũ ala angĩ ma Ĩsilaeli nũndũ mayaanengwa ũtiĩwa vamwe namo.
63Andũ asu nĩmo Mwose na mũthembi Eleasali matalĩte yĩla matalaa andũ ma Ĩsilaeli me ũiĩnĩ wa Moavi, mũingo wa Ũsĩ wa Yolotani vakuvĩ na Yeliko. 64Katĩ wa andũ asu matalilwe nĩ Mwose na mũthembi Eleasali vai ũmwe waĩ aatalwa nĩ Mwose na Alũni yĩla andũ ma Ĩsilaeli matalilwe me weũnĩ wa Sinaĩ. 65#Mot 14.26-35 Mwĩai Ngai nĩweeĩte andũ asu ma Ĩsilaeli maĩ Weũnĩ wa Sinaĩ kana onthe makakw'ĩĩa kw'o, na vai ũmwe woo ũkatiala ate o Kalevu mwana wa Yevune na Yosua mwana wa Nuni.
Currently Selected:
Mot 26: KAMBA
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011