Mot 27
27
Eĩtu ma Nzeloveati Mainengwa Ng'ũndũ
1Maala, Noa, Okila, Milika na Tilisa maĩ eĩtu ma Nzeloveati mwana wa Eevieli, mwana wa Ngileati, mwana wa Makili, mwana wa Manase, mwana wa Yosevu. 2Eĩtu asu nĩmaendie maũngama mũvĩanĩ wa Ĩeema ĩtheu ya kũkomanĩa na Mwĩai Ngai me mbee wa Mwose, mũthembi Eleasali, atongoi na mbee wa andũ onthe ma Ĩsilaeli na masya, 3“Ĩthe waitũ akw'ĩĩe weũnĩ na ndaĩ vamwe na aatĩĩi ma Kola ala mang'endeie Mwĩai Ngai, ĩndĩ akwie nũndũ wa naĩ yake mwene, na ndaĩ na syana sya aũme. 4Nĩkĩ ĩsyĩtwa ya ĩthe waitũ yĩkũekwa yae kuma andũnĩ ma mũsyĩ wake nĩkwĩthĩwa ndaĩ na kavĩsĩ? Tũnengei ng'ũndũ katĩ wa ana-a-ĩthe ma ĩthe waitũ.”
5Mwose nĩwaendie kũtavya Mwĩai Ngai ũndũ eĩtu asu maisye. 6Mwĩai Ngai nĩwamũsũngĩie amwĩa atĩĩ, 7#Mot 36.2 “Kĩla eĩtu ma Nzeloveati meũkũlya nĩkyaĩlĩte; manengei ng'ũndũ katĩ wa ana-a-ĩthe ma ĩthe woo. Nĩmanengwe ũtiĩwa wa ĩthe woo. 8Tavya andũ ma Ĩsilaeli ũmee atĩĩ, ‘Ethĩwa mũndũ nĩwakw'a atena kavĩsĩ, nengai eĩtu make ũtiĩwa wake. 9Ethĩwa mũndũ ũsu nde na mwĩĩtu, nengai ana-a-ĩthe make ũtiĩwa wake. 10Ethĩwa mũndũ ũsu nde na ana-a-ĩthe, ũtiĩwa wake ũnengwe ana-a-ĩthe ma ĩthe wake. 11Ethĩwa ĩthe wake nde na ana-a-ĩthe, ũtiĩwa wake ũnengwe mũndũ wa mbaĩ yake ũla mathengeanĩe kĩ-mũsyĩ wĩthĩwe wake.’ Andũ ma Ĩsilaeli no nginya maatĩĩae ũndũ ũsu ta mwĩao na ũtw'ĩo o tondũ Nyie Mwĩai Ngai nakwĩaĩa.”
Yosua Ainyuvwa Atw'ĩke Mũtongoi Ĩtina wa Mwose
(Kũt 31.1-8)
12 #
Kũt 3.23-27; 32.48-52 Mwĩai Ngai nĩwaneenie na Mwose amwĩa atĩĩ, “Ambata iĩmanĩ sya Avalimu nĩ kana wone nthĩ ĩla nyie Mwĩai Ngai ngũnenga andũ ma Ĩsilaeli. 13Wamina kwona nthĩ ĩsu, nũũkw'a o tondũ mwana-a-inyia waku Alũni wakwie, 14nũndũ we wĩ nake nĩmwaleile kwĩanĩsya mwĩao wakwa yĩla mwaĩ weũnĩ wa Nzini, vala andũ onthe ma Ĩsilaeli manyungunyĩisye nũndũ wakwa me Meliva, nĩmwaleile kũmony'a kana nyie nĩ Ngai Mũtheu.” Meliva nĩ kĩthima kĩla kĩ Katesi weũnĩ wa Nzini.
15Mwose nĩwavoyie Mwĩai Ngai ayasya, 16“Mwĩai Ngai, Ngai ũla ũnenganae thayũ, nĩngũkwĩsũva ũnyũve mũndũ ũtonya kũtongoesya andũ, 17#1Asu 22.17; Esek 34.5; Mat 9.36; Mk 6.34 na ũtonya kũmeaĩa yĩla mathi kaũnĩ, nĩ kana andũ maku maikethĩwe mailyĩ ta malondu mate na mũĩthi.”
18 #
Kuma 24.13
Nĩvo ĩndĩ Mwĩai Ngai weeie Mwose atĩĩ, “Osa Yosua mwana wa Nuni, ũla wĩna Veva nthĩnĩ wake na ũimwilĩĩla moko. 19Mwĩe nĩaũngame mbee wa mũthembi Eleasali na andũ onthe ma Ĩsilaeli, na e vau ũimũtw'ĩkĩthya mũtongoi woo. 20Mũnenge ũmwe wa ũtonyi waku nĩ kana andũ onthe ma Ĩsilaeli mamwĩw'ae. 21#Kuma 28.30; 1Sam 14.41; 28.6 Akatetheeaw'a nĩ mũthembi Eleasali ũla ũkamanyaa kwenda kwakwa aitũmĩa Ulimu na Thumimu.#27.21 Ulimu na Thumimu: Ii nĩ syĩndũ ilĩ ila syatũmĩawa nĩ mũthembi nĩ kana amanye kwenda kwa Ngai; kũyĩsĩkĩe nesa ũndũ syatũmĩawa. Kwa nzĩa ĩsu Eleasali akatavasya Yosua vamwe na andũ onthe ma Ĩsilaeli ũndũ maĩlĩte kwĩka.” 22Mwose nĩweekie maũndũ onthe ala Mwĩai Ngai wamwĩaĩĩte. Nĩweeie Yosua nĩaũngame mbee wa mũthembi Eleasali na andũ onthe ma Ĩsilaeli. 23#Kũt 31.23 Nĩwamwilĩĩile moko na amũtw'ĩkĩthya mũtongoi wa andũ ma Ĩsilaeli o tondũ Mwĩai Ngai wamwĩaĩĩte.
Currently Selected:
Mot 27: KAMBA
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011