Mot 36
36
Ũtiĩwa wa Aka ala Atwae
1Atongoi ma mĩsyĩ ya Ngileati mwana wa Makili mwĩsũkũũe wa Manase, ala maumĩte mĩsyĩnĩ ya nzyawa sya Yosevu, nĩmookie maneena na Mwose na atongoi ma andũ ma Ĩsilaeli. 2#Mot 27.7 Nĩmaisye atĩĩ, “Mwĩai Ngai nĩwamwĩaĩie mũaanĩsye andũ ma Ĩsilaeli nthĩ ya Kanaani kwa nzĩa ya kũkũna kula. O ta ũu nĩwamwĩaĩie mũnenge eĩtu ma mwana-a-ĩthe waitũ Nzeloveati kĩsio kya ng'ũndũ ya ĩthe woo. 3Ĩndĩ ethĩwa eĩtu asu makatwawa nĩ aũme ma mbaĩ ĩngĩ, kĩsio kĩu kya ng'ũndũ kĩkatwĩka kya mbaĩ ĩsu, na isio sya ng'ũndũ ila tũnengetwe ikeethĩwa syaoleka. 4Mwakanĩ wa kũtũnga syĩndũ, yĩla syĩndũ syonthe ila syathooiw'e itũngĩawa ene masyo, kĩsio kya ng'ũndũ kya eĩtu ma Nzeloveati kĩkeethĩwa kĩ kya andũ ma mbaĩ ĩla eĩtu asu matwaĩtwe na andũ ma mbaĩ yaitũ makeethĩwa maasya kĩsio kĩu kya nthĩ.”
5Nĩvo ĩndĩ Mwose wanengie andũ ma Ĩsilaeli mwĩao ũũ kuma kwa Mwĩai Ngai: “Ũndũ andũ ma mbaĩ ya nzyawa sya Yosevu mekwasya nĩ wa w'o, 6na kwoou Mwĩai Ngai easya kana eĩtu ma Nzeloveati me na ũthasyo wa kũtwawa nĩ mũndũ o na wĩva ũla ũkwenda, ĩndĩ ethĩwe e wa mbaĩ yoo. 7Vai kĩsio kya ng'ũndũ kya andũ ma Ĩsilaeli kyaĩlĩte kũthamĩĩwa kuma mbaĩnĩ ĩmwe kĩnengwe ĩngĩ, nũndũ andũ onthe ma Ĩsilaeli maĩlĩte kũlũmya kĩsio kya ng'ũndũ kya mbaĩ ya aaĩthe moo. 8Mũndũ mũka kuma mbaĩnĩ o na yĩva ya Ĩsilaeli ũla wĩnengwa kĩsio kya ng'ũndũ, no nginya atwawe nĩ mũndũ wa mbaĩ yake. Kwa nzĩa ĩsu andũ onthe ma Ĩsilaeli makanengawe kĩsio kya ng'ũndũ kya aaĩthe moo. 9Vai kĩsio kya ng'ũndũ kĩkathamĩĩw'a kuma mbaĩnĩ ĩmwe kĩnengwe ĩngĩ, nũndũ andũ ma mbaĩ sya Ĩsilaeli maĩlĩte kũlũmya kĩsio kya ng'ũndũ kĩla manengetwe.”
10Eĩtu ma Nzeloveati nĩmeekie kwĩanana na ũndũ Mwĩai Ngai wamwĩaĩie Mwose. 11Eĩtu asu ma Nzeloveati ala nĩ Maala, Tilisa, Okila, Milika na Noa nĩmatwaiwe nĩ ana ma endw'a-ĩthe moo 12ma kuma mbaĩnĩ ya Manase mwana wa Yosevu, na kwoou kĩsio kyoo kya ng'ũndũ kyaendeea kwĩthĩwa kĩ kya mbaĩ ya ĩthe woo.
13Ĩsu nĩyo mĩao na myamũlo ĩla Mwĩai Ngai wanengie andũ ma Ĩsilaeli, kwĩsĩla vala ve Mwose me ũiĩnĩ wa Moavi mũingo wa Ũsĩ wa Yolotani vakuvĩ na ndũa ya Yeliko.
Currently Selected:
Mot 36: KAMBA
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011