Ntha 10

Ngige

1Ngai-Mûnene nîwacokire akîra Musa atîrî, “Thiî ûkone mûthamaki wa Misiri. Nie nîndûmîte ngoro yake na ngoro cia anene ake ciûme, nîguo ngaavota kûringa ciama ciakwa gatagatî kao. 2Mue nîmûkaavota kwîra ciana cienyu wana ciana ciao maûndû ma vinya marîa nekire na ciama irîa naringîre andû a Misiri. Na mue muonthe nîmûkaamenya atî nie nînie Ngai-Mûnene.”

3Kwoguo Musa na Aroni nîmaathiîre kûrî mûthamaki wa Misiri na makîmwîra atîrî, “Ngai-Mûnene, Ngai wa Ahibirania augîte ‘Nî îvinda rîgana atîa ûgwîkara ûregete kûmwathîkîra? Tiga andû akwa mathiî nîguo makangooce. 4Na ethîrwa nîûkûrega mathiî, rûyû nîngaatûma ngige ciûke gûkû vûrûrirî ûyû waku. 5Nacio ngige icio ikeethîrwa irî nyîngî mûno. Nîigaakunîkîra nthî yonthe na nîikaarîa kîrîa kîonthe gîatigarire gîtacûkîtue nî mbura ya mbembe na irîe mîtî yaku yonthe îrîa îrî mîgûndarî. 6Nîigaatonya ciîcûre nyomba ciaku, nyomba cia anene aku na cia andû aku onthe a Misiri. Ûndû ûcio wa ngige icio ûkethîrwa ûrî mûcûku mûno atî wana methe menyu ma tene matirî moona ûndû ta ûcio.’ ” Nake Musa nîwavuvatîre mûthamaki wa Misiri na akîthiî.

7Nao anene a mûthamaki nîmaamûririe atîrî, “Mûndû ûyû nî athiî na mbere gûtûthînia nginya rî? Tiga andû a Isiraeli mathiî, nîguo makagooce Ngai-Mûnene, Ngai wao. Anga ndûrona ûrîa Misiri îcûkangîtue?”

8Kwoguo Musa na Aroni nîmaacokirue kûrî mûthamaki wa Misiri. Nake mûthamaki nîwamerire atîrî, “Mue nwa mûthiî mûkagooce Ngai-Mûnene, Ngai wenyu. Nwatî arîa makûthiî nî a?”

9Nake Musa nîwamûcokerie atîrî, “Tue tuonthe nîtûkûthiî, tûrî na ciana cietû na andû etû arîa akûrû. Nîtûkûthiî na anake etû na erîtu etû, wa vamwe na ng'ondu, mbûri na ng'ombe cietû, nîûndû nwanginya tûkaagîa na kîrugo nîguo tûkumie Ngai-Mûnene.”

10Nake mûthamaki wa Misiri nîwaugire atîrî, “Nîngwîvîta na rîîtwa rîa Ngai-Mûnene atî ndingîtîkîra mûthiî na aka na ciana cienyu. Nîkûronania waro atî mue mûrenda kûgîa na mûgomo. 11Naarî! Arûme arîa marî gatagatîrî kenyu nîo makûthiî makagooce Ngai-Mûnene ethîrwa ûguo nîguo mûkwenda.” Nao Musa na Aroni nîmaacokire makîvinyûrua kuuma varî mûthamaki wa Misiri.

12Ngai-Mûnene nîwacokire akîra Musa atîrî, “Ûkîrîria njara yaku îgûrû rîa vûrûri wa Misiri nîguo ûtûme ngige ciûke kuo. Nacio nîikûrîa kîrîa kîonthe gîkûraga, kîrîa gîatigarire vîndî ya mbura ya mbembe.” 13Kwoguo Musa nîwaûkîrîrie mûragi wake, na Ngai-Mûnene agîtûma rûkûngi rumîte mwena wa îrathîro rûvurutane kûu vûrûrirî wa Misiri mûthenya na ûtukû wonthe. Na gûgîkîa kîraûko rûvuvo rûu kuuma mwena wa îrathîro rwarî rûretu ngige. 14#Kûguû 9.2-3 Ngige icio ciaûkire irî gîtutu na igîcûra vûrûri wonthe wa Misiri. Ciarî gîtutu kînene mûno kîrîa gîtarî kîonekana, kana gîkoonekana rîngî. 15Nacio nîciakunîkire nthî nginya îkîgîa rangi mwirû nîûndû wacio. Nacio nîciarîre kîndû kîonthe kîrîa gîatigarîte gîgîkûra vîndî ya mbura ya mbembe, na ikîrîa wa na matunda monthe marîa maarî mîtîrî. Gûtirî îthangû rîatigarire rîgîkûraga mîtîrî kana mîmerarî yonthe kûu vûrûrirî wa Misiri.

16Mûthamaki wa Misiri nîwacokire agîîta Musa na Aroni na îvenya na akîmera atîrî, “Nie nînjîvîtie mbere ya Ngai-Mûnene, Ngai wenyu na ngevia mbere yenyu. 17Rîu njoverani wa rîngî na mûvoe Ngai-Mûnene, Ngai wenyu athengutie îverithia rîîrî rîa gîkuû kuuma kûrî nie.” 18Musa nîwaumire varî mûthamaki wa Misiri na akîvoya Ngai-Mûnene. 19Nake Ngai-Mûnene nîwagarûrire rûvuvo rûrîa rwavurutanaga rumîte mwena wa îrathîro, rûkîambîrîria kûvurutana rumîte mwena wa îthûîro. Naruo nîrwavurutanire na rûgîkuua ngige cionthe rûgîcikia Îria Îtune. Gûtirî ngige wanarî îmwe yatigirwe Misiri. 20Nwatî Ngai-Mûnene nîwatûmire ngoro ya mûthamaki îtuîke nyûmû na mûthamaki akîrega gwîtîkîra andû a Isiraeli mathiî.

Nduma

21Ngai-Mûnene nîwacokire akîra Musa atîrî, “Ûkîrîria njara yaku îroretie na îgûrû maturî. Na nîgûkûgîa nduma nene mûno îngîvota kûnyitîka na îîgûkunîka vûrûri wonthe wa Misiri.” 22#Tha 105.28; Kûguû 16.10 Na Musa nîwaûkîrîrie njara yake îroretie na îgûrû maturî. Nakuo nîkwagîre nduma nene mûno vûrûri wa Misiri îvinda rîa mîthenya îthatû. 23Gûtirî mûndû ûngîavotire kwona ûrîa wîngî na gûtirî mûndû waumire gwake nyomba kavinda kau. Nwatî kûu andû a Isiraeli maatûûraga kwarî na ûtheri.

24Mûthamaki wa Misiri nîwacokire agîta Musa akîmwîra atîrî, “Thiîni mûkagooce Ngai-Mûnene. Nwa mûthiî na aka enyu na ciana cienyu. Nwatî ng'ondu, mbûri, na ng'ombe cienyu nî itigwe gûkû.”

25Nake Musa nîwamûcokerie atîrî, “Nwanginya ûtwîtîkîrie tûthiî na nyamû cia kûrutîra Ngai-Mûnene Ngai wetû magongoona na cia magongoona ma kûvîvua. 26Tue nîtûkûthiî na ndîthia cietû, gûtirî wanarî îmwe îgûtigwa. Imwe ciacio nîcio tûkaarutîra Ngai-Mûnene magongoona na tûtiîcî nî irîkû. Tûkaamenya twakinya kuo irîa tûkaaruta nîguo tûgooce Ngai-Mûnene, Ngai wetû.”

27Ngai-Mûnene nîwatûmire ngoro ya mûthamaki wa Misiri îtuîka nyûmû na mûthamaki akîrega gwîtîkîria andû a Isiraeli mathiî. 28Nîwacokire akîra Musa atîrî, “Uma varî nie! Menyerera ndigakwone rîngî. Nîngîgaakwona, mûthenya ûcio we nîûgaakua!”

29Musa nîwacokire akîmwîra atîrî, “Wata ûguo wauga, ndûkaamona rîngî.”

Currently Selected:

Ntha 10: KKB

Highlight

Copy