Ntha 9

Gîkuû kîa nyamû irîa irîthagua mîciî

1Ngai-Mûnene nîwacokire akîra Musa atîrî, “Thiî kûrî mûthamaki wa Misiri na ûmwîre atî, Ngai-Mûnene, Ngai wa Ahibirania auga ‘Reka andû akwa mathiî, nîguo makangooce. 2Ethîrwa nîûkûrega rîngî mathiî, 3nie ngaakûverithia na gûgûtûmîra mûrimû mûcûku mûno kûrî nyamû ciaku cionthe irîa irîthagua, mbarathi ciaku, mvunda, ngamîîra, ng'ombe, ng'ondu na mbûri. 4Nie nîngekîra ngûrani gatagatî ka nyamû cia andû a Isiraeli na nyamû cia andû a Misiri irîa irîthagua mîciî. Nyamû irîa irîthagua mîciî cia andû a Isiraeli itigaakua. 5Nie, Ngai-Mûnene nînauga atî rûyû nîrîo ngeeka ûguo.’ ”

6Mûthenya ûcio wîngî Ngai-Mûnene nîwekire ûrîa aaugîte nî ageeka. Nyamû irîa irîthagua mîciî cia andû a Misiri cionthe nîciakuire. Nwatî cia andû a Isiraeli itiakua. 7Nake mûthamaki wa Misiri nîwatûmire andû magatuîrie. Nao matuîria nîmaamenyire atî gûtirî nyamû wana îmwe ya andû a Isiraeli yakuîte. Mûthamaki wa Misiri nîwaûmirie ngoro na akîrega gwîtîkîria andû a Isiraeli mathiî.

Mavûva

8Ngai-Mûnene nîwacokire akîra Musa na Aroni atîrî, “Vakûrani ngundi ciîgana ûna cia mûu kuuma riiko na Musa agaaikia mûu ûcio na îgûrû mbere ya mûthamaki. 9Mûu ûcio îûkaanyagania ta rûkûngû rûvinyu vûrûri wonthe wa Misiri. Naruo nîrûgaatûma ironda cia mavûva itûrîke mîîrîrî ya andû na nyamû vûrûrirî wonthe wa Misiri.” 10#Kûguû 16.2 Kwoguo nîmaavakûrire mûu na makîthiî naguo kûrî mûthamaki wa Misiri, makîrûngama mbere yake. Musa nîwaikirie mûu îgûrû rîerarî na ûgîtûma mîîrî ya andû na nyamû îgîe mavûva marîa maatûrîkire magîtuîka ironda. 11Nao andû arîa maarî na ûûgî wa kûringa ciama a Misiri matianavota kûrûngama mbere ya Musa nîûndû maarî na mavûva, wata andû acio engî a Misiri. 12Nwatî Ngai-Mûnene nîwatûmire ngoro ya mûthamaki wa Misiri îtuîke nyûmû na mûthamaki akîrega kûthikîrîria Musa na Aroni.

Mbura ya mbembe

13Ngai-Mûnene nîwacokire akîra Musa atîrî, “Rûyû kîraûko tene ûkaarûngama mbere ya mûthamaki wa Misiri ûmwîre Ngai-Mûnene, Ngai wa Ahibirania auga atîrî, ‘Tiga andû akwa mathiî nîguo makangooce. 14Vîndî îno ngaakûverithia, ndûme îvera kûrî anene aku na kûrî andû aku. Nawe nîûkaamenya atî gûtirî wîngî wîkariî tanie nthî yonthe. 15Nîûndû kethîrwa nînatambûrûkirie njara nîguo ngûverithie vamwe na andû aku, nîngîamûcûkangirie na mûrimû mûkîthira viû. 16#Aro 9.17 Nwatî nie nîndûmîte ûtûûre nîguo wone ûvoti wakwa nayo ngumo yakwa îtambe nthî yonthe. 17Nawe nwakwa ûretûgîria na ûkarega andû akwa mathiî. 18Rûyû thaa ta ino nîngaatûma kuure mbura ya mbembe îtarî yanonwa Misiri kuuma tene. 19Rîu athana uge nyamû ciaku cia kûrîthia irîa irî mîgûndarî na kîrîa kîonthe kîrî nja yaku gîtonyue nyomba. Mbura ya mbembe nî îkura, yurîre andû na nyamû cia kûrîthia irîa itarî nyomba na nîigûkua.’ ” 20Anene amwe a mûthamaki nîmeetigîrire ûrîa Ngai-Mûnene aaugire. Nao nîmaatonyirie ndîthia ciao nyomba vamwe na ngombo ciao. 21Nwatî arîa mataathikîrîria ûrîa Ngai-Mûnene aakananagia nîmaatigire ndîthia ciao wana ngombo nja.

22Ngai-Mûnene nîwacokire akîra Musa atîrî, “Ûkîrîria njara yaku ûmîerekeretie na îgûrû matuurî na mbura ya mbembe nîkuura vûrûrirî wonthe wa Misiri. Nîkuurîra andû, nyamû cionthe wana mîmera yonthe îrîa îrî mîgûndarî.” 23Kwoguo Musa nîwaûkîrîrie njara yake amîerekeretie na îgûrû matuurî. Nake Ngai-Mûnene nîwaretithirie ngwa na mbura ya mbembe, nacio mveni ikîvenia nginya gûkû nthî. Ngai-Mûnene nîwatûmire 24#Kûguû 8.7; 16.21 kuure mbura ya mbembe na mveni ciavenagia itagûtigithîrîria. Îo nîyo yarî mbura nene mûno gûtarî kwanonwa îngî ta yo kuuma rîrîa vûrûri wa Misiri wambîrîrie. 25Mbura îo ya mbembe nîyaurire vûrûri wonthe wa Misiri na îgîcûkangia kîndû wa kîonthe gîtaarî kîgitîre, vamwe na andû na nyamû cionthe. Nîyacûkangirie mîmera yonthe îrîa yarî mîgûndarî na îkiunaga mîtî yonthe. 26Gosheni gîcunjî kîrîa andû a Isiraeli maatûûraga nwakuo gûtaaura mbura îo ya mbembe.

27Nake mûthamaki nîwatûmanîre Musa na Aroni na akîmera atîrî, “Kavinda gaka nie nînjîvîtie, Ngai-Mûnene ekîte ûrîa kwagîrîrîte. Nwatî nie na andû akwa tûrî avîtiu. 28Thaitha Ngai-Mûnene, nîûndû mbura îno ya mbembe na ngwa nî mbîganu. Nîngwîranîra atî nîngûmûrekia mûthiî mûtigekare gûkû makîria.”

29Musa nîwerire mûthamaki atîrî, “Wona narîkia kuuma nja ya îtûûra rîîrî rînene, ngaaûkîrîria njara ciakwa ngîvoya Ngai-Mûnene. Ngwa îgakira, na mbura ya mbembe îtige kuura, nîguo ûmenye atî nthî nî ya Ngai-Mûnene. 30Nwatî nîmbicî atî we vamwe na anene aku mûtiîtigîrîte Ngai-Mûnene, Ngai.”

31Mîtî ya ndigi cia kûthondeka nguo na cairi nîciacûkangirue, nîûndû ngano ya cairi yarî ngûrû, nayo mîtî ya ndigi cia kûthondeka nguo yarî na marao. 32Nwatî ngano itîacûkangua nîûndû ikûraga vuva.

33Musa nîwaumire varî mûthamaki wa Misiri na akîthiî nja ya îtûûra rînene. Na rîrîa aaûkîrîrie njara ciake na îgûrû akîvoya Ngai-Mûnene, ngwa na mbura ya mbembe nîyatigire kuura gûkû nthî. 34Nwatî vîndî îrîa mûthamaki wa Misiri oonire atî ngwa na mbura ya mbembe nîyatiga kuura, nîwevirie rîngî. Ke mwene wana anene ake nîmaaûmirie ngoro. 35Kwoguo ngoro ya mûthamaki wa Misiri nîyaûmire, na akîrega gwîtîkîra andû a Isiraeli mathiî wata ûrîa Ngai-Mûnene aarîtie na njîra ya Musa.

Currently Selected:

Ntha 9: KKB

Highlight

Copy