Ntha 3

Ngai nîwetire Musa

1Mûthenya ûmwe Musa akîrîthia ndîthia ya mûthoniwe Jethiro, mûthînjîri-Ngai wa Midiani, nîwavirire mbûri ikîranîrîtie werûrî na igîkinya kîrîmarî gîa Sinai. Kîrîma gîa Sinai Kîamrî kîrîma kîtheru. 2#Ciîko 7.30-34 Nake mûraika wa Ngai-Mûnene nîwaumîrîre Musa. Mûraika ûcio aarî rûrîrîmbîrî rwa mwaki waumaga kîthakarî. Nake Musa nîwaroririe na akîona kîthaka gîgîakana mwaki, nwatî gîtiavîcaga. 3Musa nîwaugire atîrî, “Ûyû nî ûndû mûgeni. Kîthaka kîrarega kûvîa nîkî? Nîngûthiî vakuvî ngone.”

4Rîrîa Ngai-Mûnene oonire Musa nîwakuvîvîria, arî gatagatî ga kîthaka nîwamwîtire atîrî, “Musa! Musa!” Musa nîwacokirie atîrî, “Îî nîrî ava.”

5Nake Ngai-Mûnene nîwamwîrire atîrî, “Ndûgaûke vakuvî makîria. Ruta iratû nîûndû ûrûngamîte vandû vatheru. 6Nie nînie Ngai wa methe menyu ma tene, Ngai wa Iburahimu, Isaka na Jakovu.” Nake Musa nîwakunîkire ûthiû wake nîûndû nîwetigagîra kûroria Ngai.

7Ngai-Mûnene nîwerire Musa atîrî, “Nîmonete mathîna ma andû akwa arîa marî Misiri. Nîmbîguîte makîrîra nîguo matethue kuuma kûrî anene ao na nîmenyete ûrîa marathînîka. 8Kwoguo nie nyûrûrûkîte mbûke nîmatethûre kuuma kûrî andû a Misiri, nîmarute Misiri nîmavire vûrûri mwaro na mûnene. Vûrûri ûcio wîcûrîte îria na ûûkî, na nîkuo gûtûûragwa nî Akanaani, Ahiti, Amori, Aperizi, Ahivi na Ajebusi. 9Nî ma nîmbîguîte kîrîro Kîam andû akwa na nîmonete ûrîa andû a Misiri maramavinyîrîria. 10Rîu nîngûgûtûma ûthiî kûrî mûthamaki wa Misiri nîguo ûgatongorie andû akwa a Isiraeli kuuma vûrûri wake.”

11Nwatî Musa nîwerire Ngai atîrî; “Nie nîrî û atî nîguo nthiî kûrî mûthamaki ngarute andû a Isiraeli maume Misiri?”

12Ngai nîwacokerie Musa atîrî; “Ngethagîrwa nîrî nawe, na waruta andû a Isiraeli kuuma Misiri nîmûkaangooca mûrî kîrîmarî gîkî. Kîu nîkîo gîgaatuîka kîmenyithia atî nie nîngûtûmîte.”

13 # Ntha 6.2-3 Nake Musa nîwerire Ngai atîrî; “Nîngîthiî kûrî andû a Isiraeli nîmere, ‘Ngai wa methe menyu ma tene nîke ûndûmîte kûrî mue’, na mambûrie, ‘Ke etagwa atîa?’ Ngaameera atîa?”

14 # Kûguû 1.4,8 Ngai nîwerire Musa atîrî, “NÎNIE ÛRÎA NIE. Kwoguo wagîrîrwe nîkûmera atîrî, ‘Ûrîa wîtagwa NIE nîke ûndûmîte kûrî mue.’ ” 15Ngai nîwacokire akîra Musa ere andû a Isiraeli atî Ngai-Mûnene Ngai wa methe menyu, Ngai wa Iburahimu, Isaka, na Jakovu nîwandûma kûrî mue. Rîrî nîrîo rîîtwa rîakwa tene na tene na ûguo nîguo njiarwa cionthe ciagîrîrwe nî kûndirikanaga. 16Thiî ûnganie atongoria onthe a andû a Isiraeli vamwe na ûmere atî, Ngai-Mûnene, Ngai wa methe menyu, Ngai wa Iburahimu, Isaka na Jakovu nî arakuumîrîre. Meere nîmonete ûrîa andû a Misiri marameka, 17na nînduîte atî nîngûmaruta vûrûri wa Misiri kûu matûûraga na mathîna nîmavire vûrûri wîcûrîte ûûkî na îria. Vûrûri ûcio nîguo ûtûûragwa nî andû Akanaani, Ahiti, Amori, Aperizi, Ahivi na Ajebusi.

18“Andû akwa nîmakaathikîrîria ûrîa ûkaamera. Nawe, vamwe na atongoria a andû a Isiraeli nîmûkaathiî kûrî mûthamaki wa Misiri mûmwîre atîrî, ‘Ngai-Mûnene, Ngai wa Ahibirania nîatumîrîrîte. Rîu, twîtîkîrie tûthiî rûgendo rwa mîthenya îthatû werûrî nîguo tûkarutîre Ngai-Mûnene, Ngai wetû magongoona.’ 19Nîmbîcî atî mûthamaki wa Misiri ndageetîkîra mûthiî tiga nwa aringîrîrîtue gwîka guo. 20Nwatî nîngaavûthîra vinya wakwa nîguo mverithie Misiri na njîra ya gwîka maûndû ma kûmakania. Vuva wa gwîka ûguo nîmakaamûrekereria mûthiî.

21 # Ntha 12.35-36 “Nîngaatûma andû a Misiri mamûve gîtîîo nîguo rîrîa andû akwa makaauma Misiri, matikaaume kuo njara ntheri. 22Mûndûmûka wa wonthe Mûisiraeli nîakaathiî kûrî Mûmisiri ûrîa mariganîtie nake na kûrî mûndûmûka Mûmisiri ûrîa ûtûûraga gwake nyomba na amwîtie nguo na indo cia thaavu na sîlûva. Andû a Isiraeli nîmagekîra anake na erîtu ao indo icio na nîmagaakuua ûtonga wa andû a Misiri.”

Currently Selected:

Ntha 3: KKB

Highlight

Copy