Olianyanpi kin 15
15
1Unkan wicaśta wanjikji Juda makoce kin etanhan apamahde yapi, qa hunkawanjinkiciyapi kin wahokonwicakiyapi qa, Mosea toope kin eciyatanhan baniciḣdayapi śni kinhan yanipi kte śni ce, eyapi.
2Unkan Palos Barnabas kici hena wicakigepi, qa nina awicakinicapi, henan wiwicawangapi kin he on, Palos Barnabas kici, qa iyepi kin etanhan wicaśta tokeca wanjikji ko, yewicaśipi kin, qa hunkawicayapi kin, Jerusalem ekta yakonpi kin, hena en wicayapi kta e konzapi.
3Unkan okodakiciye kin hena hecen yewicakiyapi qehan, Phe nike, qa Samaria opta yapi, qa Ikcewicaśta ihduhomnipi kin he oyakapi; qa hunkawanjin kiciyapi kin owasin en wowiyuśkin tanka kagapi.
4Unkan Jerusalem ekta ipi qehan, okodakiciye kin he, qa yewicaśipi kin, hunkawicayapi kin hena ko, tin hiyu wicakiyapi; hehan Wakantanka token econ wicakiye cin owasin ohdakapi.
5Tuka Pharisee yuomdecapi kin etanhan wanjikji wicadapi qon hena inajinpiqa heyapi, Bawicakiḣdayapi qa Moses toope kin ope wicaśipi kta iyececa ce, eyapi ce.
6Unkan wicoie kin de akiiapi kta e on yewicaśipi kin, hunkawicayapi ko witaya mniciyapi.
7Qa nina wikiciwangapi hehan, Inyan inajin qa hewicakiya, Wicaśta hunkawanjinciyapi kin, ehanna unketanhanpi kin Wakantanka miye makaḣnige c̣a, mii kin eciyatanhan Ikcewicaśta kin wotanin waśte oie kin naḣonpi, qa wicadapi kta e konza sdonyayapi.
8Qa Wakantanka wicacante kin sdonye cin he wicayaotanin, qa Woniya Wakan unkiye unqupi qon, he iyecen wicaqu.
9Qa takudan ocitkonze śni unkagapi, iye cantepi kin nakun wicadapi kin on wicakipakinta.
10Heon nakaha tokeca e Wakantanka iyutanyayapi, qa can nap̣inpi wan, hunkake wicunyanpi qa unkiyepi kin yuha unkokihipi śni kin he waonspewicakiyapi tahupi kin en eyahnakapi kta he.
11Tuka Jesus Messiya Itancan kin towaonśida kin on, iś iyepi kin wiconi yuhapi kte cin, he iyecen unkiś unhapi kta e wicaundapi ce.
12Hehan omniciye kin owasin inina yukanpi, qa Barnabas Palos kici, wowapetokeca wakanyan econpi ko, Wakantanka Ikcewicaśta kin ekta econ wicakiye cin hena ecen ohdakapi kin naḣonpi.
13Unkan wanna ayaśtanpi, hehan Jakob ayupte c̣a heya; Wicaśta hunkawanjin ciyapi, miye namaḣon po.
14Otokahe ekta token Wakantanka Ikcewicaśta kin etanhan oyate wanji, iye caje kin on, iwicacu kta e ekta wicai qon he Simon oyaka.
15Qa he kici wicaśta wokcan oiepi qon okonwanjidan, kaken wowapi en kagapi;
16He iyohakam mihdamna, qa Dawid tawakeya jujuwahe cin he piya wakage kta; qa mdecahe cin hena ake wakage c̣a ecen he wakiye kta.
17Qa hecen wicaśta okaptapi kin, Ikcewicaśta owasin ko, tona micaje icajewicayatapi kin hena Jehowa akitapi kta ce, Itancan kin hena owasin econ kin he heya ce.
18Otokaheya tanhan Wakantanka taku icaḣye cin owasin sdonkiya.
19Heon etanhan miś kaken imdukcan, Ikcewicaśta kin tona Wakantanka ekta ihduhomnipi kin hena nagiyewicunyanpi kte śni.
20Tuka wakagapi on aśapapi kin, qa wiinaḣmanpi kin, qa we, qa taku weye śni yuṭapi kin, hena itehan yeic̣iyapi kta e wowapi wicunkicagapi kta.
21Wanakaja tanhan tona Moses oyakapi kin hena otonwe otoiyohi kin en yukanpi, qa anpetu okiḣpapi eca, omniciye tipi kin ohna he yawapi ece, eya.
22Hehan iś iyepi kin etanhan wicaśta kaḣnigapi kin heca, Judas Barsabas eciyapi, qa Silas, hunkawanjin kiciyapi kin en wicaśta okinihan, hena Palos qa Barnabas kici, Antiyoka ekta ye wicaśipi kta e, yewicaśipi kin, hunka wicayapi kin, okodakiciye kin owasin ko iyokipipi.
23Qa heciya ayapi kta e kaken wowapi kagapi; Yewicaśipi kin, qa hunka wicayapi, hunkawanjin kiciyapi kin hena ko, hunkawanjin kiciyapi Ikcewicaśta etanhan, Antiyoka, qa Suria, qa Kilikia en yakonpi kin, Wookiye yukan po.
24Unkiyepi etanhan wanjikji iyayapi, qa wicoie on nagiyeniyanpi, qa ninagipi kin nipahohopi qa, Banic̣iḣdayapi, qa wicoope kin oyapapi kta ce, eniciyapi ce, naunḣonpi; unkiye tohinni heye wicunśipi śni tuka:
25Heou etanhan tawacin wanjidan hduha unwitayapi qehan, wicaśta kaḣnigapi kin heca e niyepi kin ekta ye wicunśipi kta e iyounkipipi, Barnabas qa Palos waśtewicunkidakapi kin hena om:
26Hena wicaśta kin wiconi eḣpekiyapi seca, Jesus Messiya Itancan unkiyapi kin heon etanhan.
27Hecen Judas qa Silas ye wicunśipi, hena e wicoie on atayedan hecen oniciyakapi kta.
28Woniya Wakan kici hecen iyounkipipi, waqinpi tokeca unkanihnakapi kte śni, tuka dena taku owotanna kin hecehnana;
29Taku wakagapi wakiyuśnapi, qa we, qa taku we ye śni yutapi, qa wiinaḣmanpi kin hena itehan yenic̣iyapi kta. Hena itehanyan yaunpi kinhan tanyan ecanonpi kta. Tanyan yaunpi nunwe.
30Hecen hena ye wicaśipi qehan, Antiyoka ekta ipi, qa oyate kin kawitaya iheyapi, hehan wowapi kin he wicaqupi.
31He yawapi, unkan wahokonwicakiyapi kin on nina iyuśkinpi.
32Unkan Judas qa Silas wicaśta wokcan kin hecapi, heon hunkawanjin kiciyapi kin oie ota on wahokonwicakiyapi, qa wicayasutapi.
33Wanna anpetu ota en yukanpi, hehan hunkawanjin kiciyapi kin hena yewicaśipi kin ekta wookiye hde wicaśipi.
34Tuka Silas en un kta e iyokipi.
35Palos qa Barnabas Antiyoka en unpi, wicaśta tokeca ota ko, oyate kin waonspewicakiyapi, qa Itancan oie kin oyakapi.
36Unkan iyohakam anpetu tonana, hehan Palos Barnabas heciya, Tukten Itancan oie kin unkoyake ciqon, ake otonwe otoiyohi ekta unye c̣a, hunkawanjin wicunye cin wanwicunhdake c̣a, token yakonpi kin sdonunye kta ce, eya.
37Unkan Barnabas he iś, Johannes Markos eciyapi, yuha yapi kta cin.
38Tuka he Pampulia ekta eḣpewicaye c̣a wicoḣtani kin en owicape śni qon, heon etanhan Palos he yuha yapi kte cin iyokipi śni.
39Unkan he on hdokinicapi qa hecen otoiyohi eḣpekiciyapi: unkan Barnabas Markos yuha Kupros ekta waton iyaya.
40Tuka Palos Silas kaḣnige c̣a, Wakantanka towaonśida kin kici un kta e hunkawanjinkiciyapi kin icekiyapi qehan, hehan iyaya;
41Qa Suria qa Kilikia opta iyaye c̣a, okodakiciye kin suta wicakaga.
Currently Selected:
Olianyanpi kin 15: DAKOTANT
Highlight
Share
Copy
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.
