Olianyanpi kin 16
16
1Hehan Derbe qa Lustra ekta iyohi; unkan iho, waonspekiyapi kin wanji hen un, Timotheos eciyapi, Juda winoḣinca wicake cin he cinhintku, tuka atkuku kin e Helenes oyate kin etanhan.
2Hunkawanjin kiciyapi Lustra, qa Ikonium en yukanpi kin hena, he waśte e oyakapi.
3Hetanhan Palos kici ya cin, qa Juda wicaśta hen unpi kin hena on, he icu qa bakiciḣdaya; atkuku kin Helenes heca e owasin sdonyapi.
4Unkan otonwe iyaza yapi, qa yewicanśipi kin, kunka wicayapi ko, Jerusalem en yukanpi kin woahope kagapi qon hena tanyan yuhe wicaśipi.
5Hecen okodakiciye kin wacinyanpi kin en wicayusutapi, qa anpetu otoiyohi nina yuota aya.
6Unkan Phrugia qa Galatia makoce kin opta iyayapi, qa Asia en wicoie kin oyakapi kte cin Woniya Wakan kin teḣinda qchan;
7Hehan Musia ekta ipi, qa hetanhan Bithunia ekta ye wacinpi, tuka Woniya kin iyowicaki śni.
8Unkan Musia opta iyayapi qehan, Troas en iyohipi.
9Unkan hanyen Palos wowanyake wan wanyaka; Wicaśta wan Makedonia etanhan taninyan inajin, qa cekiye c̣a, Makedonia en u, qa ounkiya po, eya.
10Wowanyake kin do wanyake cin heon hinnakaha Makedonia heciya unyanpi kta e uncinpi, Itancan kin hena wotanin waśte kin owicunkiyakapi kta cin heon unkicopi e unhdukcanpi.
11Hecen Troas etanhan pacanan iyeunyanpi, qa Samotrake ekta owotanna unyanpi, qa hetanhan ihanḣanna Neapolis en unkipi.
12Qa hetanhan Philippi en unkipi, otonwe teca qa Makedonia makoce onśpa kin he en otonwe tokapa kin hee. Qa anpetu tonana otonwe kin he en unkanpi.
13Unkan anpetu wakan hehan, otonwe kin etanhan inaunpapi, qa wakpa wan icahda wocekiye eyapi ece qon he en unkipi; hen unkiyotankapi, qa winoḣinca ece en mniciyapi kin hena owicunkiyapi.
14Unkan winoḣinca wan, Ludia eciyapi, Thuatira otonwe kin etanhan, wokoyake duta ece wiyopeye cin heca, Wakantanka kokipeyahan un he naḣon yanka: unkan cante kin Itancan kin yuzamni, on Palos oie kin anagoptan.
15Unkan tiyohnaka kin om baptem qupi qehan, hehan ceunkiyapi qa, Itancan kin on wicawaka kecanmayakinpi hecinhan, wati kin en tin upi, qa ohna yukan pe, eye c̣a ecen econ unkiyapi.
16Hetanhan wocekiye eya unyanpi eca, wicinyanna wan itkounkipapi ece, he taku wakan woyaka ece kin yuhe c̣a, wakanyan wohdag un kin heon tawayapi kin taku ota wicakicamna.
17He Palos unkiyepi ko unkihakam u, qa; Wicaśta kin dena Wakantanka tehan wankantuya un kin taokiye wicaye cin, wiconi canku kin unkokiyakapi kin hena eepi ce, eya hoyekiya.
18Qa anpetu ota hecen econ. Tuka Palos nagiyeye cin heon hakikta qa, Jesus Messiya caje on winoḣinca kin de etanhan tankata inanpe ciśi, taku wakan kin eciya. Unkan wihijayedan oape kin he en tankan hiyu.
19Unkan winoḣinca kin de yuhapi kin heepi, taku kamnanpi kte cin he akitakunipi śni kin he wanyakapi e etanhan, Palos Silas kici wicayuzapi, qa tipi hocoka kin ekta wicaśta tokahe wicakiyapi kin en awicayapi:
20Qa wicaśta itancan wicakiyapi kin en wicakaipi, qa heyapi, Wicaśta kin dena Juda wicaśta kin hecapi, otonwe unkitawapi kin nina nagiyeyapi;
21Qa wicoḣan onspewicakiyapi kin hena e, Roma wicaśta heuncapi kin, unkicupi qa unkopapi kta e iyecece śni.
22Unkan oyate kin owasin witaya takpe wicaupi; qa wicaśta itancan wicakiyapi kin wokoyake awicayupotapi, qa wicakapsinpsinte wicaśipi.
23Unkan ota awicapapi, hehan wicakaśka tipi kin en iyewicayapi, qa tipi awanyake cin sutaya wicayuhe śipi.
24He hecen econ śipi, unkan wicakaśka tipi temahentuya kin he en onawicataka, qa siha kin can on kaśkapi ece kin en sutaya kaśka wicahnaka.
25Unkan hanye cokaya hehan, Palos Silas kici Wakantanka cekiyapi, qa yatan dowanpi; unkan wicaśta wicakaśkapi kin he naḣonpi.
26Unkan ihnuhanna maka kin nina huhuzahan, qa tipi ahe cin hena yuhuhuzapi, qa tiyopa kin owasin kazamni iyaye c̣a, on pawicaḣtapi kin owasin mdecahan hinhda.
27Hececa, unkan wicakaśka tipi awanyag kiyapi kin kikta, qa tiyopa kin yuzamni han wanyaka, unkan wicaśta wicakaśkapi kin owasin kihdapi kecin, heon mazasagye ehdaku qa on ic̣ikte kta;
28Tuka Palos nina hoyekiye c̣a, Kiuniiciye śni wo, owasin den unkanpi ce, eya.
29Hehan petijanjan wan da, qa tin iyaye c̣a, cancan Palos Silas kici siha hdepi kin en eḣpeic̣iya;
30Qa tankan awicaye c̣a, Itancanpi wani kta e token ecamon kta he, ewicakiya.
31Unkan, Jesus Messiya Itancan kin wacinyan wo, hecen nicinca om yani kta ce, eciyapi.
32Qa Itancan oie kin okiyakapi, tona ti kin en yukanpi kin hena owasin koya.
33Unkan hanyetu kin wihiyayedan oape kin he en, iwicacu, qa oape kin wicakiyujaja, qa hehan baptem qupi, tiyohnaka owasin ko.
34Qa iye ti kin en awicaki qa won wicaya; qa tiyohnaka kin om wicada qa iyuśkin.
35Unkan wanna anpa qehan, itancan wicakiyapi kin akicita eyanpaha kin ekta ye wicaśipi, qa, Wicaśta kin hena wicakiyuśka wo, eyapi.
36Unkan wicakaśka tipi awanyake cin, hena oie kin Palos okiyake c̣a, Itancan wicakiyapi kin niciyuśkapi kta keya hośi hipi, heon etanhan tankan kinanpapi, qa wookiye hda po, eya.
37Tuka Palos hewicakiya, Roma wicaśta heuncapi, tuka unyacopi śni ecen taninyan unkapsinpsintapi, qa onatag eunhnakapi, qa hinnakaha anaḣbeya hde unśipi he: hiya, iye atayedan upi, qa tankan unkaupi kta, eya.
38Hehan akicita eyanpaha kin itancan wicakiyapi kin dena owicakiyakapi, unkan Roma wicaśta kin hecapi e naḣonpi kin heon inihanpi.
39Qa iye atayedan ekta ipi, qa cewicakiyapi, qa tankan awicaupi, qa otonwe kin etanhan hdapi kta icewicakiyapi.
40Unkan wicakaśka tipi kin etanhan tankata inanpapi, qa Ludia ti kin en ipi; qa hunkawanjin kiciyapi kin wanwicahdakapi, hehan wicakihnapi, qa etanhan tokan iyayapi.
Currently Selected:
Olianyanpi kin 16: DAKOTANT
Highlight
Share
Copy
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.
