Olianyanpi kin 5
5
1Tuka wicaśta wan Ananias eciyapi, tawicu Sapphira kici, maga wan wiyopekiya;
2Qa mazaska apa anakiḣbe, tawicu kin iś nakun sdotkiya; unkan apa ahi, qa yewicaśipi kin sihapi kin en ehnaka.
3Tuka Inyan heciya; Ananias, tokeca e Woniya Wakan kin oiyaton kte śni e Satan nicante kin en ocowasin iyoḣpaya, qa maga iyopeyapi kin apa anayakiḣman he;
4Nahaḣin ecen un qon he ehan yahduhe śni he; qa wiyopekiyapi kin he ehan nakun nitawa śni he. Tokeca nicante ekta hecen econ wacani he. Wicaśta akantu kin hee śni, tuka Wakantanka en iyatonśni ce.
5Unkan Ananias hena oie kin naḣon qehan, hinḣpaye c̣a ṭa iyaya. Unkan tona hena taku kin naḣonpi kin owasin nina wikopapi.
6Unkan kośka kin najinpi, qa opazuntapi, qa tankan ayapi, qa ḣapi.
7He iyohakam wihiyayedan oape yamni, hehan tawicu kin taku econpi qon sdonye śni ecen tin hiyu.
8Unkan Inyan heciya; Kana on maga iyopeyakiyapi he, omakiyaka wo. Unkan iś; Han, kana on, eya.
9Unkan Inyan; Token on sakim Itancan Taniya kin iyutanyayapi kta ecen wacinduzapi he. Wanyaka wo, tona nihihna ḣapi kin hena sihapi kin tiyopa kin en najinpi, qa niye nakun tankan aniyanpi kta, eciya.
10Hehan iś eya hecehnana iye siha kin ekta hinḣpaye c̣a ṭa iyaya. Unkan kośkapi qon en hiyupi, qa wanna ṭa e wanyakapi, hehan iś eya tankan ayapi, qa hihnaku kin kici ḣapi.
11Unkan okodakiciye kin ocowasin, qa tona hena taka kin naḣonpi owasin nina wikopapi.
12Unkan yewicaśipi kin napepi kin on oyate kin en wowinihan wicoḣan qa wowapetokeca ota econpi. Unkan owasin wicacante wanjidan yuha Solomon omanipi tawa kin ohna yukanpi.
13Qa wicaśta tokeca tuwedan en owicapa okihi śni, tuka oyate kin wicakinihanpi.
14Qa tona wicadapi kin sanpa ota Itancan kin en opapi, wica winyan ko wicota.
15Hecen tona wicayazan kin hena tankan awicaupi, qa canku otoiyohi ohna, ohehdepi qa owinja ko akan ahiwicahnakapi, Inyan hen hiyaye cinhan hunḣ ohanzi wicaye kte cin heon.
16Unkan, otonwe itan ihdukśan kin hena etanhan wicota Jerusalem en hipi, qa tona wayazanpi, tona taku wakan śica wicayuhnaśkinyanpi ko en awicahipi; unkan owasin asnipi.
17Hehan wośna kagapi itancan kin najin hiyaye c̣a, tona om un kin, Saddukee wicowazi kin etanhanpi, hena winawizipi on ojupidan;
18Qa nape on yewicaśipi kin iyawicahpayapi, qa wicakaśka tipi ikceka kin ohna ewicahnakapi.
19Tuka Itancan taohnihde ye cin he hanyen wicakaśka tipi tiyopa kin yuzamni, qa tankan awicau qa heya;
20Hunktiya po, tipi wakan kin ohna inajinpi qa wiconi kin de wicoie kin owasin oyate kin owicakiyaka po.
21He naḣonpi unkan hanḣenna ḣin tipi wakan kin timahen yapi, qa wowicakiyakapi. Hehan wośna kagapi itancan, qa tona om un kin hena witaya iheyapi, qa omniciye tanka kin mniciye wicaśi, Israel cinca hunkawicayapi kin owasin koya; unkan wicakaśka tipi kin ekta wicahuweye wicaśipi.
22Tuka akicita kin wicakaśka tipi kin en hipi, qa iyewicayapi śni, hehan hośi hdapi;
23Qa heyapi; Awicakehan wicakaśka tipi kin sutaya onotakapi ecen iyeunyanpi, qa tiawanyag wicakiyapi kin tiyopa kin itokam najinpi; tuka unyuḣdokapi qehan, tuwedan en wanunyakapi śni.
24Unkan wośna kagapi itancan, qa tipi wakan en itancan kin, wośna kagapi kin hena koya, hena wicoie kin naḣonpi qehan, he toketu kta hecinhan iyukcanpi śni.
25Hehan wanji en hi qa; Iho, wicaśta wicakaśka tipi kin en ewicayahnakapi qon hena tipi wakan kin ohna inajinpi qa oyate kin waonspewicakiyapi ce, eya owicakiyaka.
26Hehan akicita tancan kin akicita ko ekta yapi qa iwaśtedan awicaupi, oyate kin inyan on wicakininpi kta e kokipapi heon etanhan.
27En awicahipi qa omniciye kin wicaookaya najin wicakiyapi; unkan wośna kagapi itancan kin wiwicawanga,
28Qa heya; Wicacaje kin de on wowicayakidakapi kte śni, nina unkeniciyapi śni he; unkan iho, woonspe nitawapi kin on Jerusalem ojudan yayapi, qa wicaśta kin de we kin en unkayaupi kta wacannipi.
29Hehan Inyen, yewicaśipi kin om, awicayupte c̣a heya; Wicaśta akantu hee śni, tuka Wakantanka hee e anaungoptanpi kta iyececa.
30Jesus yaktepi qa can akan otkeyayapi qon he atewicunyanpi ta Wakantankapi kin hduecetu:
31Hee kin Wakantanka wankan ehdaku, iye nape etapa kin ekta Itancan qa Wanikiya un kta, Israel ihduecetupi qa woaḣtani kajujupi kin wicaqu kta e heon.
32Unkan unkiye, iye on, wicoie kin hena unkoyakapi ece, qa Woniya Wakan tona Wakantanka anagoptanpi wicaqu kin, he iś eya hena yuotanin ece.
33He naḣonpi qehan canteptanyanpi, qa ṭewicayapi kta e akiiapi.
34Hehan Pharisee wan Gamaliel eciyapi, woope waonspekiya, qa oyate kin en okinihan, he omnic̣iye kin en najin, qa yewicaśipi kin cistiyedan tankan aye wicaśi:
35Qa hehan hewicakiya; Israel wicaśta, wicaśta kin dena taku ecawicakicon wacannipi kin he itonpa po.
36Anpetu kin dena itokam Thudas icaga, he taku wicaśta keiciya; unkan wicaśta opawinge topa ecetu ihakam yapi; tuka he iye ktepi, qa tona wicadapi qon owasin enanakiya iyewicayapi qa takuni śni aya.
37Qa he iyohakam Judas Galile etanhan, owicawapi anpetu kin he ehan inajin, qa oyate ota ihakam awicaya; he nakun ihangyapi, qa tona wicadapi qon owasin enanakiya eyaya.
38Heon nakaha heciciyapi; Wicaśta kin dena wiciḣeyata najinpi, qa awicayuśtan po; wokonze qa wicoḣan kin de wicaśta akantu kin etanhan hecinhan atakuni kte śni;
39Tuka Wakantanka eciyatanhan un kinahan; yujuju oyakihipi śni; okinni Wakantanka kici yeciza dukanpi kta naceca, eya.
40Unkan he anagoptanpi, qa yewicaśipi kin wicakipanpi, qa wicakapsinpsintapi qehan, Jesus caje kin on woyake śni wicaśipi, qa wicakiyuśkapi.
41Unkan iye omniciye kin etanhan hdapi, qa Jesus caje kin on wowiśtece en awicaupi iyececa wicayawapi kin heon wiyuśkinpi.
42Qa anpetu otoiyohi tipi wakan kin ohna, qa tipi iyaza wahokonwicakiyapi, qa Jesus Measiya oyakapi ayaśtanpi śni.
Currently Selected:
Olianyanpi kin 5: DAKOTANT
Highlight
Share
Copy
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.
