Olianyanpi kin 6
6
1Unkan anpetu kin hena en, waonspewicakiyapi kin wanna wicota aya qehan, Helenes Hebrew oyate kin wicabapi, anpetu otoiyohi wapamnipi kin en wiwazica wicayuhapi kin hena awicatonwanpi śni kin heon etanhian.
2Hehan akenonpapi kin waonspewicakiyapi kin owasin wicakicopi qa hewicakiyapi; Wakantanka oie kin unkayuśtanpi, qa wahna wotapi wiyeya eunhnakapi kte cin hecetu śni.
3Heon hunkawanjin unniyanpi enitanhanpi wicaśta owotanna yawapi, qa Woniya Wakan wicoksape ko on ojupidan śakowin wicakaḣniga po, wicoḣan kin de yuhe wicunkiyapi kta.
4Tuka unkiye qe cekiyapi qa wicoie oyakapi kin en ohinniyan ye unkic̣iyapi kta ce.
5Unkan wicoie kin he oyate kin owasin iyokipipi; qa Stephanos, wicaśta wan wacinyanpi Woniya Wakan ko ojudan, kin he kaḣnigapi, qa Philip, qa Procoros, qa Nikanor, qa Timon, qa Parmenas, qa Nikolas Antiyoka ekta en opekiyapi qon.
6Hena yewicaśipi kin wicacokaya ewicahdepi; unkan wocekiye eyapi, hehan nape on awicaputakapi.
7Unkan Wakantanka oie kin icage c̣a Jerusalem en waonspewicakiyapi kin nina ota aya; qa wośna kagapi kin ota nakun wacinyanpi kin en opapi.
8Unkan Stephanos wowacinye wowaśake ko on ojudan, taku on yuśinyayapi, qa wapetokeca tanka econ, oyate kin en.
9Unkan wicaśta wanjikji omniciye tipi wan, Wicakiyuśkapi tawapi eciyapi kin hetanhan, qa Kurene qa Aleksandre wicaśta kin, qa Kilikia qa Asia etanhanpi, hena en inajinpi qa Stephanos kici hdokinicapi.
10Tuka Woksape Woniya ko on ie cin he okihipi śni.
11Hehan wicaśta opewicatonpi, unkan hena e, Wicaśta kin de Moses qa Wakantanka nakun wicoie śica ewicakiya, naunḣonpi ce, eyapi.
12Hecen oyate kin, qa hunkawicayapi, wowapi kagapi ko iyowicapaśtakapi; unkan anatan hipi, qa yuzapi, qa omniciye kin en ahipi.
13Qa oitonśni waayatanin kin heca najin wicakiyapi; hena iś heyapi; Wicaśta kin de tipi wakan kin de wicoope ko on taku śica eye cin ayaśtan śni.
14Jesus Nazareth etanhan qon he tipi kin de ihangye c̣a, wicoḣan Moses unqupi qon hena yutokeca kta ce, eya naunḣonpi ce.
15Unkan omniciye kin en iyotankapi kin owasin opaḣta yukanpi, qa ite kin he maḣpiya ohnihde wan ite kin iyececa wanyakapi.
Currently Selected:
Olianyanpi kin 6: DAKOTANT
Highlight
Share
Copy
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.
