Johannes 14
14
1Ihnuhan eante niśicapi kinhan; Wakantanka wicayadapi, qa miś nakun wicamayadapi.
2Ate ti kin en ounyanpi kte cin ota yanka; he hecece śni unkanś ociciyakapi kta tuka; ekta wahde c̣a oyanke kin ciciyuśtanpi kta.
3Ekta mde c̣a oyanke ciciyuśtanpi kinhan, hehan ake wau qa acihdapi kta; hecen miś waun kin he en niś nakun yaunpi kta.
4Unkan tokiya mde cin he sdonyayapi, qa canku kin he nakun sdonyayapi.
5Itancan, tokiya de cin sdonunyanpi śni, tokiya tanhan canku kin he sdonunyanpi kta he, Thomas eciya.
6Unkan Jesus heciya; Canku, qa wowicake, wiconi ko he miye; tuwedan Ateyapi kin en u śni, miye eciyatanhan ecedan en u ece.
7Sdonmayayapi unkanś nakun Atewaye cin sdonyayapi kta tuka; qa detanhan sdonyayapi qa wandakapi ce.
8Itancan, Ateyaye cin wanyag unyan po, hecen iunmnanpi kta, Philip eciya.
9Hehan Jesus heciya; Philip, wanna wanakajatanhan cicipi waun, tuka nahanḣin sdonmayaye śni he; tuwe wanmayake cin he Ateyapi kin wanyaka; hecen tokeca, Ateyapi kin wanyag unyan miye, eha he.
10Atewaye cin he wecica qa Atewaye cin he micica kin he wicayada śni he. Wicoie eciciyapi kin dena miye cinka eciciyapi śni; Atewaye micica kin he wicoḣan kin hena iye econ.
11Atewaye cin he wecica qa Atewaye cin he micica he wicamada po; qa iś wicoḣan kin he na e on wicamada po.
12Wowicake, wowicake on heciciyapi; Tuwe wicamada kin he wicoḣan ecamon kin hena iś iyecen econ kta, nakun eeś sanpa tanka econ kta; Ate ekta wahde kte cin heon etanhan.
13Qa micaje kin on taku yadapi kinhan, ecen ecamon kta; Ateyapi kin Cinhintku kin on yutanpi kta e heon.
14Taku wanji micaje on yadapi kinhan, ecen ecamon kta.
15Waśte mayadapika hecinhan, mitawoahope kin tanyan yuha po.
16Hehan Ate cewakiye kta, unkan wicakicanpte wan tokeca ntc̣upi kta, he owihanke wanin nicipi un kta.
17Wowicake Woniya kin hee, oyate kin he icu okihipi śni, tohinni wanyakapi śni qa sdonyapi śni; tuka niye he sdonyayapi, he nicipi un qa en niunpi kta.
18Wamdenica eḣpeciyapi kte śni; ake cihdiyohipi kta.
19Wanna ptenyedan kinhan oyate wanmayakapi kte śni, tuka niye wanmayadakapi kta wani waun, qa niś yani yaunpi kte cin heon.
20Anpetu kin he en, Atewaye cin he wecica, qa niś miyecicapi, qa miś ocicipapi kin he sdohyayapi kta.
21Tuwe mitawoahope yuho c̣a, hena ope cinhan he waśtemadake cin ee; qa tuwe waśtemadake cinhan, Atewaye cin he waśtedake kta, qa miś nakun waśtewadake kta, qa en mihdutanin kta ce.
22Hehan Judas, Iskariot hee śni, he heciya; He tokeca Itancan, unkiśnana sdonniye unyayapi kta he, qa oyate kin sdonniyanpi kte śni.
23Jesus waayupte c̣a heciya; Tuwe waśtemadake cinhan mioie kin yuhe kta; qa Atewaye cin waśtedake kta, qa tukten un kinhan en unhipi kta, qa ti kin en kici unyakonpi kta.
24Tuka waśtemadake śni kin he mioie kin yuhe śni. Wicoie nayaḣonpi kin de mitawa śni, Atewaya umaśi kin he iye tawa.
25Ocipapi kin en taku kin hena heciciyapi.
26Tuka Wicakicanpte, Woniya Wakan kin hee, Atewaye cin micaje on uśi kte cin he, taku owasin onspeniciyapi kta, qa taku eciciyapi kin owasin kiksuyeniciyapi kta.
27Wokiyapi aiḣpeciyapi; wookiye mitawa cic̣upi: wicaśta akantu kicic̣upi he iyecen cicupi śni. Ihnuhan cante niśicapi qa kopehda yaunpi kinhan.
28Wahde c̣a ake en ciupi kta eciciyapi kin he wanna nayaḣonpi. Waśte mayadapi kinhan iduśkinpi kta; Atewaye cin ekta wahde kta epe cin he; Atewaye cin he iye mikapeya tanka.
29Qa nakaha hena heciciyapi, taka kin itokam; tohan he hiyohi kinhan hehan wicayadapi kta.
30Detanhan taka ota eciciyapi kte śni; maka akan itancan kin wanna u, tuka miye kin en takudan tawa śni.
31Tuka Atewaye cin waśtewakida; qa Ate taka emakiye cin owasin ecen ecamon ece, he oyate kin sdonyapi kta. Najin po, detanhan icunonpa unyanpi kta.
Currently Selected:
Johannes 14: DAKOTANT
Highlight
Share
Copy
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.
