Lukas 12
12
1Unkan wicota ḣinca en ahimniciya, hecen akicihanpi ece, hehan waonspewicakiye cin hewicakiya; Tokaheya Pharisee kin on napoḣyapi tawapi kin he itonpa po, he wanaic̣iḣmanpi kin hee ce.
2Taku akaḣpetonpi qa yuzamnipi kte śni wanica; qa nakun taku anaḣmanpi qa yuotaninpi kte śni wanica ce.
3Hecen otpaza ehna taku token ehapi kin he anposkantuya naḣonpi kta; qa onaḣbe tipi kin ohna wicanoge kin en token ehapi kin he tipi akan ieyanpahapi kta.
4Qa kodamayayapi kin, niś heciciyapi; Wicatancan ktepi qa sanpa takudan okihipi śni kin hena kowicakipapi śni po.
5Tuka tuwe koyakipapi kte cin he ito kanyehan ociciyakapi kte: Tuwe wicakte, qa hehan wakanśica tipi kin en eḣpewicaya okihi kin he eca kokipa po; han, Hee kokipa po, eciciyapi ce.
6Zitkadan zaptan mazaśadan nonpa iyopewicayapi śni he: heca eśta Wakantanka hena wanjidan kaeś akiktonje śni.
7Tuka niyepi kin paha ee kaeś owasin niyawapi ece. Heon etanhan wikopapi śni po; zitkadan ota isanpa niyawapi ece.
8Qa nakun heciciyapi ce; Tuwe kaśta wicaśta kin wicitokam miye mayaotanin kinhan, Wicaśta Cinhintku kin Wakantanka taohnihde kin hena itokam he yaotanin kta.
9Tuka tuwe wicaśta kin wicitokam amakta śni kinhan, Wakantanka taohnihde kin hena itokam, he aktapi kte śni.
10Qa tuwe kaśta Wicaśta Cinhintku kin itkom wicoie wanji eciye cinhan, kicicajujupi kte; tuka tuwe Woniya Wakan waośtehda kinhan, kicicajujupi kte śni.
11tohan omniciye tipi kin en anihipi kinhan qa wicaśtayatapi wowaśake ko ekta, taku qa token aduptapi kta, qa taku ehapi kte cin awacinpi śni po.
12Woniya Wakan kin he iye iyehantudan ḣin taku ehapi kta iyececa he onspeniciyapi kta ce.
13Unkan wicota kin etanhan wanji heciya; Waonspekiye cin, misunka woyuha hanke micu kta, keciya wo.
14Unkan heciya; Wicaśta kin, niwankam wiyukcan qa wapamni kte cin tuwe makaga he.
15Unkan hewicakiya; Iwanihdaka po, qa wakonpi kin kokipa po; wicaśta nipi kin he taku iyakic̣uya tonpi kin he en un śni ece.
16Hehan wiyacinpi wan owicakiyake c̣a heya; Wicaśta wijica wan tamaga kin taku ota icaḣya.
17Unkan cante mahen he awacin qa heya; Token ecamon kta he; waskuyeca mitawa kin tukten wehnake kte cin mduhe śni ce
18Hehan heya; Knken ecamon kta; wopiye wahdujuju kta, qa tankinkinyan wakage kta; qa hena ohna taku imicicaga woyuha mitawa ko owasin ewaju kta.
19Qa minagi kin hewakiye kta; Minagi, taku ota yehnake cin he waniyetu ota oiyahde kta ce; ito oziiciye, c̣a wote, c̣a wayatke, c̣a wiyuśkin wo, eya.
20Tuka Wakantanka heciya; Winitkotkoke cin, hanyetu kin de ninagi kin inicicupi kta; hecen wayehnake cin hena hehan tuwe tawa kta he.
21Tuwe woyuha kihnaka, tuka Wakantanka ekta wijice śni kin he he kicica ce, eya.
22Unkan waonspewicakiye cin hewicakiya; Hecen on heciciyapi ce, Yanipi kin on taku yatapi kte cin, qa iś tancan kin taku kodakapi kte cin, hena on nagiyeic̣iyapi sni po.
23Wicani kin he woyute kin isanpa ece; qa wicatancan kin iś wokoyake isanpa ece.
24Kangi kin hena iwicayukcan po; he iye wojupi śni qa woksapi śni, qa dotopiye woḣa ko nicapi: unkan Wakantanka hena wo wicaqu ece. Waḣupakoza kin isanpa niyawapi śni he.
25Qa niyepi wanji awacannipi kin on wiciśpa wanjidan kaeś nihduhanskapi oyakihipi he.
26Hecen taku iyotan cistinna kin he oyakihipi śni ehantanhan, unma kin on tokeca ecin nagiyeniciyapi he.
27Mnaḣcaḣca kin he token icaga ece kin he iyukcan po; ḣtani sni qa nakun wakahmun śni; tuka heciciyapi ce, Solomon token okitanin eśta, dena wanji iyecen wakoyake śni.
28Hecen Wakantanka peji anpedehan mngata hiyeya, qa heyakecinhan petan eḣpeyapi kin hee kaeś wokoyake qu ehantanhan, kitanna wicayndapi kin, niś iyotan wokoyake nic̣upi kte śni he.
29Qa taku yatapi qa datkanpi kte cin he ihnihdnpi śni po; qa nakun waceṭunhdaya wacin yuzapi śni po.
30Maka oyate kin hena owasin hecen ihnihdapi ece; qa niye taku kin hena yacinpi kin Ateyayapi kin sdonya ece.
31Tuka Wakantanka tokiconze kin hee tokaheya ihnihda po, kinhan dena owasin koya nic̣upi kta.
32Optaye cistinna kin, wikopapi śni po; wokiconze kin hee nic̣upi kta e Ateyayapi kin iyokipi ece.
33Taku yatonpi kin wiyopekiya po, qa wicaqu po. Wojuha kukaka aye kte śni, maḣpiya ekta woyuha owihanke kte śni hena ic̣icaga po; heciya wamanon sa kiyedan u śni, qa wamduśkadan wayapote śni ece.
34Woyuha tukten niciyankapi hecinhan, iś eya nicantepi kin en un ece e kta.
35Ipiyag kiton yaunpi kta, qa petijanjan nitawapi ideyahan un kta;
36Qa niś wicasta wicayuhe cin kiciyuzapi kin eciyatanhan hdi kta ape hiyeye cin hena iyecen un po; tohan hdi qa tiyopa hdatoto kinhan wancake kiciyu ḣdokapi kta.
37Wicayuhe cin hdi kinhan, ookiye kin tona wakta unpi iyewicakiye cin, hena wicayawaśtepi; awicakehan heciciyapi ce, Wicayuhe cin iye ipiyagkiton, qa ookiye kin hena wote kta iyotangwicakiye, c̣a u, qa owicakiye kta ce.
38Hecen inonpa waktapi kin en, qa iś iyamni waktapi kin iyehan hdi, qa ecen iyewicaye cinhan, ookiye kin hena wicayawaśtepi ece.
39Qa de sdonya po, tipi tawa kin wamanon sa tohan hi kta sdonya unkanś, wakta un qa tipi kin kiciyuḣdokapi kte cin anapte kta tuka.
40Heon etanhan niś eya wiyeya un po; Wicaśta Cinhintku kin tohan awacannipi śni kinhan hehan u kta ce.
41Unkan Inyan hehan heciya; Itancan, wiyacinpi kin de unkiśnana unkoyakidakapi, qa iś owasin wicayaka he.
42Unkan Itancan kin heya; Ookiye wanji waawanyagkiyapi kin he wayupike, c̣a okiksape cinhan, yuhe cin tiwahe kin yuhekiye kta, qa hecen iyehanyan wo wicaqu ece e kte cin he tuwe he.
43Itancan tawa kin ku, qa taokiye wanji hecen econ yanka wanhdake cinhan, hee yawaśtepi ece.
44Awicakehan heciciyapi; Taku token tawaye cin he owasin yuhekiye kta ce.
45Tuka ookiye kin he cante mahen, Itancan kin tehan hdi kte śni ecin; qa wicaookiye qa winyanookiye kin hena awicape, c̣a wote, c̣a wayatke, c̣a witkoic̣iye cinhan,
46Ookiye kin he anpetu wan yuhe cin hdi ape śni, qa sdonkiye śni hehan hdi, qa kicakae, c̣a waceṭunhdapi kin hena owicapeya ounyekiye kta.
47Qa ookiye wanji yuhe cin tawacin kin sdonya, tuka wiyeya ic̣ihnake śni, qa tawacin kin okicipe śni kinhan, he ota apapi kta.
48Tuka tuwe sdonye śni kinhan, he iś apapi kte cin iyecen oḣanyan eśta tonana apapi kta ce. Tuwe taku ota qupi kinhan, hee taku ota iwangapi kta; qa wicaśta kin tuwe taku ota yuhekiyapi ca, he iyotan ota kicapi ece e kta.
49Maka akan peta iyayewaye kta wahi; qa token wacanmi he, wanna ideyapi eśta.
50Tuka baptem wanji on baptem maqupi kta; qa he tohanyan yuśtanpi śni hehanyan aoṭinsmayanpi ce.
51Maka akan wookiye wicaqu wahi kecannipi he. Hiya, tuka wicayuomdecapi kin iś ee kta, eciciyapi ce.
52Detanhan tipi wanjidan ohna zaptan yukanpi kta, qa yuomdecapi kta, yamni nonpa om, qa nonpa yamni om kicipajinpi kta.
53Wicaśta wan iye cinhintku kin kipajin kta, qa cinhintku kin iś atkuku kin; hunku kin cunwintku kin kipajin kta, qa cunwintku kin iś hunku kin; nakun kunku kin takośku kin, qa takośku kin iś kunku kin kipajin ece e kta, eya.
54Unkan nakun oyate kin hewicakiya; Wiyoḣpeyata tanhan maḣpiya wanji wankan u wandakapi eca, wancake, Magaju kta ce, ehapi: unkan ecetu ece.
55Qa itokaga tate uya eca, Odidita kta ce, ehapi; unkan ecen hiyohi ece.
56Wanaic̣iḣmanpi kin, niś maḣpiya ite kin maka ko iyukcan oyakihipi; tuka tokeca e nakaha kin idukcanpi śni he.
57Han, niye cinka tokeca e taku owotanna kin idukcanpi śni he.
58tohan tuwe icazoniciye cin kici wicoope awanyake cin ekta de cinhan, tahepi niyuśkapi kte cin akite ḣinca wo: okinni he wayaco kin ekta aniye kta, qa wayaco kin iś akicita kin ekta nic̣u kta, qa hecen kaśka nihnakapi kta.
59Mazaśadan ehake ḣince cin he tohanyan yecu śni hehanyan hetanhan yahdicu kte śni, eciciya ce, eya.
Currently Selected:
Lukas 12: DAKOTANT
Highlight
Share
Copy
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.
