Lukas 5
5
1Unkan oyate kin Wakantanka oie kin naḣonpi kta e aohduteyapi qehan, Geneseret mde kin icahda inajin.
2Qa mde kin en wata nonpa wanka wanyaka; tuka hokuwapi kin iś wanna tokan iyayapi, qa ho kin hdujajapi.
3Unkan wata unma Simon tawa kin he en ope c̣a, kitanna canan wapa iyayeye kta cin. Hehan en iyotanke c̣a, wata kin etanhan oyate kin waonspewicakiya.
4Unkan wanna ayaśtan qehan Simon heciya; Mini śbe kin ekta iyaye c̣a ho kin minin iyoḣpeya wo.
5Unkan Simon waayupte, c̣a heciya; Waonspekiye cin, hanyetu osan ḣtaunnipi, qa takudan unktepi śni; tuka nioie kin on ho kin iyoḣpewaye kta ce.
6Unkan heconpi qehan, hogan utkanna yuzapi; unkan ho kin papsakapi.
7Unkan tawaśitkupi wata unma en opapi qon hena namwicakicawinpi, en upi qa owicakiyapi kta. Unkan en hipi qa wata napin ojukiyapi, hecen iyujimnana hiyeya.
8Unkan Simon Inyan he wanyake c̣ehan, Jesus hupahu kin en makata eḣpeic̣iye c̣a heya; Itancan, eḣpeya imayaya wo, wicaśta waḣtani sa hemaca ce.
9He iye qa tona om un qon hena hogan yuzapi kin on etanhan owasin inihanpi.
10Unkan Jakob qa Johannes Zebede cinhintku kin hena oza, Simon tawaśitkuwicaya, iś eya inihanpi. Unkan Jesus Simon heciya; Wikope śni wo, detanhan wicaśta kin wicaduze kta ce.
11Unkan wata qon hutata ahdihunipi qehan, owasin eḣpekiyapi, qa iyahna yapi.
12Unkan otonwe wan en un qehan, iho, wicaśta wan lepros ececa ḣinca, he Jesus wanyake c̣ehan, ite makipuskin eḣpeic̣iye c̣a, cekiye c̣a heya; Itancan, yacin kinhan mayaduska kta oyakihi.
13Unkan nape yekiye, c̣a yutan, qa heya; Wacin ce; ska un wo, eya. Unkan wancake lepros ececa qon asni hinhda.
14Unkan tuwedan okiyake śni śi; tuka wawayuśna kin ekta ye c̣a wanyagic̣iye kta, qa wayuskapi kta on token Moses econ wicaśi qon he ecen econ kta, keya; hecen wowicakiyake kta.
15Tuka heon iyotan tankaya wicoḣan kin he oyakapi; hecen wicota en mniciyapi, naḣonpi kta, qa wayazankapi wicayuhapi kin asniwicaye kte cin heon.
16Hehan icunonpa makotahedan wan ekta ye c̣a wocekiye eya.
17Unkan anpetu wan waonspewicakiya icunhan, Pharisee qa wicoope onspekiye cin hena, Galile otonwe kin owasin, qa Juda qa Jerusalem etanhan, en ahi kin hena en iyotankapi; unkan Itancan towaśake kin asniwicaye kta e en un.
18Unkan iho, wicaśta wanṭaṭake cin he owinja ohna wicaśta yuha upi: qa timahen ayapi qa itokam ehnakapi kta akitapi:
19Tuka wicota kin on token en aipi kte śni wanyakapi qehan, tipi akan inajinpi, qa akaḣpe yuḣdokapi eciyatanhan cokaya Jesus itokam kun hiyuyapi.
20Unkan wacinyanpi kin he wanyake c̣ehan, heciya; Wicaśta, wayaḣtani kin nicicajujupi ce.
21Unkan wowapi kagapi qa Pharisee kin iś waakinicapi qa heyapi; De tuwe e taku śica decen eya he. Tuwe woaḣtani kajuju kta okihi he; Wakantanka ecedan okihi.
22Tuka tawacinpi kin Jesus iwicayukcan, hehan waayupte c̣a hewicakiya; Taku e cante mahen aynkinicapi he:
23Wayaḣtani kin nicicajujupi ce; qa iś, Najin qa mani wo, eyapi kte cin unma tukte waśakadan he
24Tuka Wicaśta Cinhintku kin he iś maka akan woaḣtani kajuju kta okihi sdonyayapi kta; hehan ṭaṭake cin he heciya; Najin qa nitowinja ehdaku qa yati kin ekta hda wo, eciciya ce, eya.
25Unkan wancake wicitokam najin hiyaye, c̣a akan wanke ciqon he ehdaku, qa iye ti kin ekta hde, c̣a Wakantanka yatan.
26Unkan owasin inihanpi, qa Wakantanka yatanpi; qa wikopapi ḣince, c̣a heyapi; Wicoḣan nakaka toktokeca wanunyakapi ce, eyapi.
27Unkan taku kin dena iyohakam hetanhan ye, c̣a wamnayanpi kin heca wanji Lewi eciyapi, wamnayanpi oyanke kin en iyotankehan yanka e wanyaka; qa, Miyahna u wo, eciya.
28Unkan taku owasin eḣpeye c̣a, najin hiyaye c̣a, ihakam iyaya
29Unkan Lewi iye ti kin en wohanpi tanka kicaga; unkan wamnayanpi kin iś wicota, qa toktokeca nakun en opeya wotapi kta iyotankapi.
30Tuka wowapi kagapi wicayuhapi qa Pharisee kin hena waonspewicakiye cin wicakigepi, qa heyapi; Tokeca e wamnayanpi qa waḣtanipi sa om wayatapi qa wadatkanpi ece he.
31Unkan Jesus waayupte c̣a hewicakiya; Tona zanipi kin hena pejihutawicaśta cinpi śni, tuka wayazanpi kin.
32Owotanpidan kin hena iyopeic̣iyapi kta e wicakico wahi śni, tuka waḣtanipi sa.
33Unkan heciyapi; Tokeca e Johannes waonspewicakiye cin hena ijehan wote śni unpi qa wocekiye eyapi he, qa Pharisee tawapi kin iś eya; tuka nitawa kin wotapi qa wayatkanpi ece.
34Unkan hewicakiya; Hihnaton ti kin cinca kin hena tawicu ton kin he iś owicapeya un kin icunhan wote śni wicayakiyapi kta oyakihipi he.
35Tuka anpetu kin u kta, en tawicu ton kin he ewicakiciyakupi kta; hehan anpetu kin hena en wote śni unpi kta.
36Unkan wiyacinpi wan owicakiyaka: Wicaśta tuwedan śina teca onśpa śina tanike cin en akihdagye śni ece; heconpi kinhan teca qon iś yuḣdeca ece, qa onśpa teca etanhan kin he tanike cin kicica śni ece.
37Qa nakun wicaśta tuwedan miniśa teca ojuha tanike cin en okaśtan śni ece; heconpi kinhan miniśa kin skepe kta, qa ojuha kin atakuni kte śni.
38Tuka minima teca kin he ito ojuha teca en ohnakapi kta; qa sakim yutehanpi ece.
39Iś eya wicaśta tuwedan miniśa tanika wanna yatke c̣a, hehan hinnakaha teca cin śni; Tanike cin eeś waśte ce, eya ece.
Currently Selected:
Lukas 5: DAKOTANT
Highlight
Share
Copy
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.
