Lukas 6

1Unkan anpetu wakan inonpa tokaheya, hehan wojupi kin ehna iyaya; unkan waonspewicakiye cin iś wahuwapa yuksapi, napopabagapi, qa yutapi.

2Hehan Pharisee kin wanjikji hewicakiyapi; Tokeca e anpetu wakan kin en taku iyowinwicakiyapi śni kin he eca ecen ecanonpi he.

3Unkan Jesus awicayupte c̣a heya; Dawid token econ qon hee kaeś tohinni dawapi śni he; iye qa tona om un qon wotektehdapi qehan.

4Wakantanka tipi tawa kin en tin iyaye, c̣a aguyapi taninyan ehnakapi, qa wawayuśnapi kin iye iśnana hetanhan yutapi kte cin iyowinwicakiyapi qon, he icu, qa yute, c̣a om unpi qon hena iś eya hetanhan wicaqu.

5Unkan hewicakiya; Wicaśta Cinhintku kin iś nakun anpetu wakan kin Itancan ce.

6Unkan anpetu wakan tokeca wan omniciye tipi kin en tin iyaye, c̣a waonspekiya: unkan wicaśta wan nape etapa kin śnija e en yanka.

7Unkan wowapi kagapi qa Pharisee kin hena anpetu wakan icunhan asniye kta hecinhan he iwanyakapi, taku iyaonpapi kta akitapi.

8Tuka iye tawacinpi kin sdonwicaya, qa wicaśta nape śnije cin he heciya; Najin qa cokaya inajin wo. Unkan najin hiyaye c̣a en inajin.

9Unkan Jesus hewicakiya; Miś ito taku wanji iciwangapi kta; Anpetu wakan icunhan taku waśte, qa iś taku śica econpi kta he; wanikiyapi, qa iś waṭeyapi kta, unma tukte hecetu he, eya.

10Unkan itanihdukśan owasin awicatonwe c̣ehan, wicaśta qon heciya; Nape kin hdukatin wo. Unkan ecen econ; qa nape kin unma kin iyecen iyekicetu.

11Unkan śihdapi ḣince, c̣a iye iyakitedan Jesus token ecakiconpi kta hecinhan he iwohdakapi.

12Unkan anpetu kin hena en Jesus paha wan ekta wocekiye eya i; qa hanyetu osan Wakantanka cekiya un.

13Unkan wanna anpa qehan, waonspewicakiye cin wicakico, qa etanhan akenonpa wicahdaḣnige c̣a, Wahośiyapi, ewicakiya.

14Simon he Inyan nakun eya caśton, qa he sunkaku kin Andrew, Jakob qa Johannes, Philip qa Bartholomew;

15Mattheos qa Thomas, Jakob Alpheus cinhintku, qa Simon nakun Zelotes eciyapi;

16Qa Judas Jakob sunkaku, qa Judas Iskariot, nakun wiyopeye kte cin hee.

17Hehan hena om kun hdicu, qa makomdaya en hdinajin; unkan waonspewicakiye optaye kin, qa Juda owancaya qa Jerusalem, qa mde kahdaya Turos qa Sidon henakiya etanhan wicota ḣinca, hena ia naḣonpi, qa tona wayazankapi kin asniwicayapi kta e en ahi:

18Nakun tona woniya śapa on kakijapi kin hena; unkan asniwicayapi.

19Unkan wicota kin iyuḣpa yutanpi kta akitapi; etanhan wowaśake hiyu qa owasin asniwicaya ece kin heon etanhan.

20Unkan waonspewicakiye cin awicatonwe, c̣a heya; Niwaḣpanicapi kin niś niyawaśtepi ce; Wakantanka tokiconze kin he niye nitawapi.

21Dehan wotekteyahdapi kin niś niyawaśtepi ce; imnahanniyanpi kta. Dehan yaceyapi kin niś niyawaśtepi ce; iyaḣapi kta.

22tohan wicaśta śicenidapi, qa yuiyog iyayeniyanpi, qa iennihdepi, qa Wicaśta Cinhintku kin on nicajepi kin taku śica iyecen tankan eḣpeyapi kinhan, niyawaśtepi ece.

23Anpetu kin he en wiyuśkinpi, qa wopida on śkehanhan po; iho, maḣpiya ekta wokajuju tanka duhapi; atewicayapi kin iś eya iyecen wicaśta wokcanpi wicakuwapi qon.

24Tuka winijicapi kin niś wotehi niciyankapi ece; wicocante waśte kin he wanna yahduhapi

25Winipipi kin niś woteḣi niciyankapi ece; wotekteyahdapi kta. Dehan iyaḣapi kin niś woteḣi niciyankapi ece; waśinyahdapi qa yaceyapi kta.

26Tohan wicaśta owasin tanyan eniciyapi kinhan, woteḣi niciyankapi ece; atewicayapi kin hecen wicaśta wokcan itonśni wicakuwapi qon.

27Tuka naḣon dukanpi kin heciciyapi ce, Tokaniyanpi kin hena cantewicakiya po, qa śicenidapi kin hena tanyan ecawicakicon po;

28Niyaśicapi kin wicayawaśte po, qa wawicanksiya nicuwapi kin hena wocekiye ewicakiciya po.

29Qa tuwe iyoḣa sani kin en anipe cinhan unma eciyatanhan kipazo wo; qa tuwe śina inicicu kinhan, onḣdoḣda kin nakun teḣinda śni wo.

30Wicaśta otoiyohi taku nicida kin qu wo; qa tuwe woyuha nici kinhan, ake kica śni wo.

31Qa wicaśta kin token ecaniconpi yacinpi kin, he iyecen ecawicakicon po.

32Tona waśtenidapi kin henana waśtewicayadapi kinhan, wopida tukte e duhapi kta he: waḣtanipi sa kin eepi kaeś tona cantewicakiyapi kin iś itkom oantewicakiyapi ece.

33Qa tona tanyan ecaniconpi kin henana tanyan ecawicayeconpi kinhan, wopida tukte e duhapi kta he; waḣtanipi sa kin iś iyecen econpi ece.

34Qa ake nic̣upi kta kecannipi kin henana owicayaqupi hecinhan, wopida tukte e duhapi kta he; waḣtanipi sa kin iś waḣtanipi sa owicaqupi ece, iyacinyan wicakicupi kta heon.

35Tuka niś tona tokaniyanpi kin cantewicakiya po, taku waśte econpi qa owicaqu po, ake taku nic̣upi kta kecinpi śni po; kinhan wokajuju tanka duhapi kta, qa Iyotan Wankantu kin he cinca yaunpi kta: he iye tona pida śni qa śicapi kin cantewicakiya ece.

36Hecen Niyatepi kin iś token waonśida kin niś eya he iyecen waonśida po.

37Wayacopi śni po, kinhan niyacopi kte śni: owawicakiyepi śni po, kinhan owaniciyepi kte śni: wicakicicajuju po, kinhan nicicajujupi kta:

38Wicaqu po, kinhan nic̣upi kta; wiyutapi waśte, paoṭinzapi, paipuskicapi qa apaśboka, hecen wicaśta kin maku kin en nic̣upi kta. Wiyutapi on widutapi kin hee on winiciyutapi ece e kta.

39Unkan wiyacinpi wan owicakiyaka: Istagonge cin iśtagonga napata yus aya okihi he: napin ośkokpa kin en iyoḣpayapi kte śni he.

40Waonspekiyapi kin he waonspekiye cin itokapa śni; tuka tuwe yuśtanpi kin otoiyohi waonspekiye tawa kin iyecece kta.

41Qa tokeca nisunka iśta kin ohna sukaza yanke cin he wandaka; tuka niye niiśta kin ohna cankaga wanke cin he wanyahdake śni he.

42Qa, Misunka, sukaza iśta ohna niyanke cin he ito ciciyusdoke kta ce, token nisunka eyakiye kta he, qa icunhan niye niiśta kin ohna cankaga wanke cin he wanyahdake śni. Wanayakiḣbe cin, niś tokaheya cankaga iśta ohna niwanke cin he ito tokan eḣpeya wo; qa hehan hinakaha nisunka iśta kin ohna sukaza yanke cin he yeciyuśdoke kta mdesya wandake kta ce.

43Can wanji waśte kin waskuyeca śica icaḣye śni; qa nakun can wanji śice cin he waskuyeca waśte icaḣye śni.

44Can kin otoiyohi waskuyeca tawa kin on sdonyapi ece: wicaśta kin taspanhu kin etanhan suken pahipi śni, qa iś eya tokahu kin etanhun hustanhanka pahipi śni.

45Wicaśta waśte kin he cante woyuha waśte kin etanhan taku waśte icaḣya ece; qa wicaśta śice cin he cante woyuha śice cin etanhan taku śice icaḣya ece: wicacante taku iyakic̣uya ohnaka kin he etanhan i kin eciyatanhan enapeya ece, eya.

46Unkan tukeca, Itancan, Itancan, emayakiyapi ece, qa taku epe cin ecen ecanonpi śni he.

47Tuwe ekta mahi, qa mioie naḣon, qa ecen econ kin he tuwe kicica hecinhan he ito ociciyakapi kta.

48Wicaśta wan tipi kaga; unkan temahentu maka qe, c̣a oahehde kin imnija wan akan ehde: unkan minitan aye c̣ehan, wakpa kin tipi kin he en nina kaduza, tuka kahuhuze kta okitpani, imnija akan ehdepi nakaeś, he iyececa.

49Tuka tuwe naḣon tuka ecen econ śni kinhan, wicaśta wan oahehde codan maka akan tipi kage cin he iyececa; unkan he en wakpa kin nina kaduza, qa hecehnana hinḣpaya; qa tipi kin he woatakuniśni tanka.

Currently Selected:

Lukas 6: DAKOTANT

Highlight

Copy