Luke 12

Wowic̄ak̇eṡni Iwaktapi Kte

1Oyate lila wiċota Jesus ahomniya igluwitayapi na wiċotapi heuƞ akiċililipi, hehaƞ Jesus ihakab-uƞpi ki hewiċakiye,

Pharisees hena oyate ki iċiḣmeya wauƞspewiċakiyapi he iwakta uƞpo! He ognayaƞ oyate ki wiċagnayawaċiƞpelo. 2Taku akaḣpeya waeċuƞpi hena awiċayuzamnipi kte na taku ki iyuha aṫaƞiƞ kte. 3Na tuwe oiyokpaza el waeyapi hena tuweni slolye ṡni keċiƞpi eyaṡ woiye hena aƞpetu iyojaƞjaƞ iyeċel aṫaƞiƞ kte na tuwe naḣma waeyapi hena tiwaƞkabtaƞhaƞ yaoṫaƞiƞpi ktelo.

Tuwe K̇okiṗe Pic̄a

4Mitakuye, oyate taku ṡic̄a eċanic̄iċuƞpi hena k̇owiċakiṗapi ṡni yo. Niktepi okihipi na he ohakabya hehaƞya takuni eċanic̄iċuƞpi okihipi kte ṡni yelo. 5Wak̇aƞṫaƞka eċa k̇oyakiṗapi kte ki he e. He iṡnala wiċoni niċi okihi na wiċotakuniṡni heċiya iyayeniya okihi. Ċa Wak̇aƞṫaƞka eċa k̇oyakiṗapi kte ki he e yelo.

6Mazaṡala numla uƞ ziƞtkala c̄ikʹalaḣc̄i ki zaptaƞ oṗewiċayaṫuƞ oyakihipi, eyaṡ Wak̇aƞṫaƞka waƞjini ewiċakiktuƞjiƞ kte ṡni yelo. 7Niṗehiƞpi hena yawa pic̄a ṡni eyaṡ Wak̇aƞṫaƞka iyohila taƞyaƞ slolye ċa takuni k̇okiṗapi ṡni yo! Niye ziƞtkala ota wiċisamya inic̄ipipelo.

8Tuwa oyate wiċiṫokab miṫaƞtaƞhaƞ oyaglakapi haƞtaƞṡ, Wiċaṡa-Ċiƞkṡitku hemaċa, miṡ-eya Wak̇aƞṫaƞka ṫaogligle wiċiṫokabya blaoṫaƞiƞ ktelo. 9Eyaṡ tuwa slolmaye ṡni kuƞze haƞtaƞṡ, hena ogligle wiċiṫokabya iƞṡ-eya slolyapi kte ṡni.

10Na tuwe keṡa Wiċaṡa-Ċiƞkṡitku hemaċa ki le kuṡeya hoyaṫaƞiƞpi eṡa Wak̇aƞṫaƞka enic̄iktuƞjapi kte, eyaṡ Woniya-Wak̇aƞ ki he anayaptapi haƞtaƞṡ Wak̇aƞṫaƞka nic̄ipajujupi kte ṡni yelo.

11Tohaƞl omnic̄iye-tipi el anihipi na wiċaṡa oiṫaċaƞ wiċiṫokabya niyasupi kihaƞ tokeṡke nanicʹijiƞpi kte ki he inaġiyeicʹiyapi ṡni yo. 12Woniya-Wak̇aƞ ki he tohaƞl iyehaƞtu kihaƞ wookiye nicʹu ktelo.

Jesus eye.

Wiċaṡa Wijic̄a Witko Wiyaċiƞpi

13Owiċota he etaƞhaƞ waƞji hekiye, “Wauƞspekiya, ċiye okiyaka yo. Ate woyuha eya uƞkakiyuṡtaƞpi waƞ hena taku omawaja hena weċiƞ keya yo.”

14Jesus leċel ayupte, “Tuwa niye e na niċiye taku woyuha luhapi hena kiluksapi kta wowaṡʹake makʹu hwo?” eye. 15Hehaƞ wiċota najiƞpi hena hewiċakiye, “Wateḣilapi ṡni yo! Woyuha ota luhapi heuƞ taƞyaƞ yauƞpi kta keċiƞpi ṡni yo.”

16Na wiyaċiƞpi waƞ owiċakiyake,

Wiċaṡa wijic̄a waƞ ṫamak̇a el woju yuƞk̇aƞ taƞyaƞ waiċaġe. 17Owoju taƞyaƞ waiċaġe ki he waƞglakiƞ na iṡnala eyaṡ heye, ‘Tokeṡke eċamu kta hwo? Lila waota waiċaḣwaye na tuktel amni kta ṫaƞiƞ ṡni,’ eye. 18Hehaƞ leċel eye, ‘Ehaƞuƞ kakel eċamu kte, wakignaka-tipi waƞ hena waglujuju na etaƞ ṫaƞkiƞkiƞya ċa wakaġiƞ kte, hel waiċaġe ki lena iyuha owakignakiƞ ktelo. 19Na leċami kte, “Woyute na woyuha ota wopiye yegnake ki he waniyetu ota ikipiya yaƞke, iṫo asnikiyiƞ na wota yo. Na wayatkiƞ na iyuṡkiƞicʹiya yo,” eṗe.’ 20Eyaṡ Wak̇aƞṫaƞka hekiye, ‘Witko, ṡic̄aya wilukc̄aƞ yelo! Haƞhepi ki le ihuƞni ṡnihaƞni wiċoni ki le eyegnakiƞ ktelo. Hehaƞl wayegnake ki hena tuwe ċa yuha kta hwo?’

21“Tuwa leċel wateḣila na wauƞṡila ṡni na woyuha uƞ iṡnala iwaṡteicʹiyiƞ na igluwijic̄a haƞtaƞṡ, Wak̇aƞṫaƞka iṫokabya inajiƞ kihaƞ, wiċaṡa ihaƞkeya uƞṡika heċa ktelo.”

Wak̇aƞṫaƞka Waċiƞyapi

22Hehaƞl ihakab-uƞpi ki hewiċakiye, “Lena uƞ ċa heċic̄iyapi, woyute na hayapi ki hena inaġiyeicʹiyapi ṡni yo. 23Wiċoni ki he woyute na hayapi hena isamṗa yelo. 24K̇aƞġi ki hena iwiċayukc̄aƞpo! Hena wojupi ṡni naiƞṡ wowaṡi eċuƞpi ṡni, oaglepi k̇o nic̄api eṡa, Wak̇aƞṫaƞka hena taƞyaƞ awaƞwiċakiglake. Eyaṡ, niye waḣupakoze ki isamṗaniċiyapi. 25Nakuƞ mak̇a akaƞ taku iċaƞniṡic̄api eyaṡ heuƞ mak̇a akaƞ wiċoni luhapi ki he yuhaƞskiƞ kte ṡni. 26Na taku leċel c̄ikʹala he e kʹeyaṡ oyakihipi ṡni, haƞtaƞṡ takuwe taku iyuha naġiyeniicʹiyapi hwo? 27Wanaḣc̄a hena waƞyaƞkapo! Wanaḣc̄a ki lena owaƞyaƞgwaṡteṡte. Wiċaṡa-yataƞpi waƞ Solomon ec̄iyapi ċa wijic̄a hakiṫuƞ ki he e kʹeyaṡ waiyehaƞl owaƞyaƞgwaṡte ṡni. 28Aƞpetu ki le mak̇oċe ki owaƞyaƞgwaṡte, eyaṡ hihaƞni kihaƞ waḣc̄a hena uƞ ċetipi kte. Wak̇aƞṫaƞka taku yuhaniċiyapi ċiƞ eyaṡ wowic̄ala niṫawapi ki iyehaƞyaƞ ṡni yelo.

29“Taku yatapi na latkaƞpi kte ki hena ikaġiicʹiyapi ṡni yo. 30Oyate eya Wak̇aƞṫaƞka wic̄alapi ṡni waƞ hena ohiƞniyaƞ taku ota iċaƞteṡic̄api. Wak̇aƞṫaƞka taku yaċiƞ ki hena slolye. 31Wak̇aƞṫaƞka ṫawokiċuƞze ki he ṫokaheyayapi ki, taku uƞ taƞyaƞ yanipi hena nicʹupi ktelo.”

Mak̇a Akaƞ Uƞniṡikapi Haƞtaƞṡ Maḣpiyata Winijic̄api Ktelo

32“Mitakuyepi wak̇okiṗapi ṡni yo! Wak̇aƞṫaƞka ṫawokiċuƞze ki he yuhaniċiyapi ċiƞ yelo. 33Waluhapi hena wiyoṗekiyapi na uƞṡikapi ki lena mazaska ki wiċakʹupo. Wak̇aƞṫaƞka taku iyotaƞla ki hena eċa tekiḣilapo. Maḣpiyata wowaṡte ki lena ojuha ċa tohaƞni okuke ṡni ċa ognakapi iyeċec̄a. Ho na maḣpiyata wamanu-wiċaṡa wanic̄api ċa wowaṡte ki lena tuweni animanu kte ṡni na kimimila ki otebyapi okihipi kte ṡni yelo. 34Tuktel waṫeyeḣila yagluha ki hetu ċa niċaƞtepi ki nakuƞ yaƞkiƞ ktelo.

Wowaṡi Eċuƞpi Ki Waktaya Uƞpi

35“Ṗetijaƞjaƞ he ileḣkiyapi kta wakta uƞpo. 36Wowaṡi eċuƞpi ċa, iṫaċaƞ ki kiċiyuzapi wiċawote waƞ eċiyataƞhaƞ glihuƞni kta aṗe uƞpi. He tohaƞl gli na tiyopa katoto ki waƞc̄agna kiyuġaƞpi kta aṗe uƞpi iyeċel. 37Tohaƞl iṫaċaƞ ki gli na wowaṡi ṫawa hena igluwiƞyeya uƞ iyewiċaye ki wiċayawaṡte kte. He iṫaċaƞ ki igluwiƞyeya na ṫawowaṡi ki hena yuonihaƞ wowiċakʹu kte, heċel iyewiċaye ki wiċayawaṡte kte. 38Wowaṡi ṫawa hena ohiƞniyaƞ waktaya opiicʹiyapi, haƞċokaƞya naiƞṡ hihaƞnilaḣc̄i ċa ku eyaṡ ohiƞniyaƞ waktapi kte. 39Tohaƞl wamanu-wiċaṡa waƞji yati el u kte ki he slolyayapi haƞtaƞṡ wayakta kte. 40Ċa ohiƞniyaƞ iwaktaya uƞpo! Tohaƞl Wiċaṡa-Ċiƞkṡitku ki ku kte ki he slolyayapi ṡni.”

Wowaṡi Eċuƞpi Awaċiƞpi Naiƞṡ Awaċiƞpi Ṡni

41Peter hehaƞ hekiye, “Iṫaċaƞ, wiyaċiƞpi ki le uƞkiṡnala uƞyak̇api hwo, na iƞṡ tuwe k̇o wiċayak̇a hwo?”

42Yuƞk̇aƞ Iṫaċaƞ ki leċel ayupte, “Wowaṡi eya ksabyakel wiyukc̄aƞpi waƞ hena eċa iṫaċaƞ ki waawaƞyaƞgwiċakiyiƞ kte na wowaṡi uƞma waƞ hena woyute wiċakikpamnipi kte.” 43Tohaƞl Iṫaċaƞ ki ku na leċel ṫawowaṡi ki iyewiċaye ki iye ċa pilaicʹiyapi kte. 44Na ṫawowaṡi waƞ taku lena iyuha taƞyaƞ eċuƞ ki tohaƞl iṫaċaƞ ki gli ki ṫawoyuha hena iyuha oiṫaċaƞkiyiƞ ktelo. 45Ognaṡ ṫawowaṡi waƞji iṫaċaƞ ki waktaṡniya uƞ na uƞma wowaṡi hena awiċaṗiƞ na iṡnala ipiicʹiyiƞ na itomniicʹiye. 46Aƞpetu waƞ el iṫaċaƞ ki ognahelaka gli. Wowaṡi waƞ waktaya uƞ ṡni waƞ he yusagsakiƞ na etaƞ waċetʹuƞglapi waƞ hena ob kaṫaƞkal iyewiċayiƞ kte.

47“Na ṫawowaṡi eya igluwiƞyeya uƞpi ṡni na wowaṡi eċuƞ ċiƞpi ṡni waƞ hena teḣiya oicʹiḣʹaƞpi kte. 48Wak̇aƞṫaƞka waablezapi ṡni hena uƞṡiwiċala kte na taƞyaƞ waablezapi waƞ hena aiyeċelya wawiċakta ktelo.

Taƞyaƞ Wiċouƞ Kte Ṡni Na Kiċipajiƞpi Kte

49“Mak̇a akaƞ oyate ki wiċawakaċaƞ na yukinuk̇aƞ iyewiċawayiƞ kte uƞ wahi. Wana ṗeta ki le wakaile iyeċetu waṡte sec̄e. 50Wana wokakije ki he waƞweglake na woteḣi ki he migluṡtaƞ kte ki kiyela he. 51Mak̇a akaƞ wookiye wakaġiƞ kta uƞ ec̄ela wahi keċanipi hwo? Hiya! Oyate ki wiċablublec̄iƞ kta uƞ wahi yelo. 52Iṫoṡ, tiwahe waƞ zaptaƞpi, yuƞk̇aƞ hena yukinuk̇aƞ uƞpi. Num hetaƞhaƞ uƞma yamni hena ob kiċipajiƞpi kte. 53Wiċaṡa waƞ iye ċiƞkṡitku he e kʹeyaṡ kiċipajiƞpi kte na wiƞyaƞ ki he iƞṡ-eya ċuƞwiƞtku ki iyeċel kiċipajiƞpi kte. Nakuƞ k̇uƞku waƞ ṫakoṡku ki kiċipajiƞpi ktelo.”

Aƞpetu Ki Ablezapi

54Jesus oyate ki iyuha hewiċakiye, “Wiyoḣpeyataƞhaƞ maḣpiya aku ċaƞ, ‘Maġaju ktelo,’ ehapi, ċaƞ iyeċetu. 55Na itokaġataƞhaƞ ṫate ki kaḣwoka ċaƞna, ‘Ok̇atiƞ ktelo,’ ehapi, ċaƞ iyeċetu. 56Maḣpiya na mak̇a el taku ṫaƞiƞ hena waƞlakapi na aƞpetu ṫokc̄a kte ki he slolyayapi, eyaṡ waeċamu ki lena ayablezapi ṡni yelo.

Niyasupi Ṡnihaƞni Wagluwaṡtepo

57“Taku owoṫaƞla ki hena waƞlaka yaċiƞpi ṡni. 58Na tohaƞl tuwe takuƞl iyaniuƞpapi nahaƞ wayasupi el aniyapi ċiƞpi eyaṡ kaiṫokabya taƞyaƞ apikiyapi ki he waṡte. Na heċanupi ṡni haƞtaƞṡ, wayasu-wiċaṡa ki iṫokabya niyaṡic̄api kte. Nahaƞ wayasu-wiċaṡa he akiċita ki nic̄aṡke wiċaṡi ktelo. 59Mazaska iyena yaglaiju haƞtaƞṡ ec̄ela okaṡke tipi hetaƞhaƞ yaglinaṗapi oyakihipi ktelo,” eye.

Currently Selected:

Luke 12: LKTNT20

Highlight

Copy