Luke 24

Jesus Kini

1Aƞpetu ic̄iṡakowiƞ hehaƞ aƞpo eċiyataƞhaƞ, wiƞyaƞ ki waḣpe waṡtemna yuwiƞyeyapi waƞ hena yuha Jesus ṫaċaƞ ḣpaye ki ekta ipi. 2Iḣʹe ṫaƞka gmigmela waƞ tiyopoṡtaƞ haƞ waƞ he ḣeyab pagmiya he. 3Na timahel iyayapi hehaƞ Iṫaċaƞ Jesus ṫaċaƞ ki tok̇aḣʹaƞ. 4Le tokel iyukc̄aƞpi ṫaƞiƞ ṡni. Yuƞk̇aƞ wiċaṡa num hayapi skalaḣc̄aka uƞpi eya wiċiṫokab ṫaƞiƞicʹiyapi. 5Wiƞyaƞ ki ṫaƞsagtʹapi heuƞ ṗamaglegle najiƞpi. Wiċaṡa ki lena wiƞyaƞ ki hewiċakiyapi, “Takuwe tuwa ni ṡk̇a ṫaċaƞ ki oyalepi hwo?” eyapi. 6“Jesus hehaƞya lel uƞ ṡni. Kini yelo. Kiksuyapo, Galilee mak̇oċe ekta taku onic̄iyakapi ki hehaƞ leye kʹuƞ, 7‘Oyate ki Wiċaṡa-Ċiƞkṡitku miyeċa oyuspamayayapi ktelo. Ċaƞic̄ipaweġa akaƞl omakataƞpi kta eyaṡ hetaƞhaƞ aƞpetu ic̄iyamni ki wakini ktelo,’ eye kʹuƞ.”

8Wiƞyaƞ ki Jesus hehaƞ waeye ki kiksuyapi. 9-10Wiƞyaƞ huƞḣ Jesus ṫaċaƞ ḣpaye k̇a ki ekta ipi. Wiƞyaƞ ki lena Mary Magdalene e na Joanna e na Mary, James huƞku ki oṗapi. Kihuƞnipi hehaƞ wahoṡiyapi ak̄e waƞji ki e na Jesus ihakab-uƞpi ki hena taku tok̇a ki lena owiċakiyakapi. 11Eyaṡ wiƞyaƞ ki woyakapi ki lena ċetʹuƞwiċaglapi. 12Yuƞk̇aƞ Peter ikpanajiƞ na Jesus ṫaċaƞ eyuƞpapi ekta inaḣni ihuƞni. Patuṡ eyokasʹiƞ eyaṡ mniḣuha haƞska ki ec̄ela ena yaƞka waƞyaƞke. Taku tok̇a ki ableze ṡni.

Emmaus Wiċotitakiya Yapi

13Jesus ihakab-uƞpi ki num Emmaus wiċoti eċetkiya yahaƞpi. Wiċoti ki le Jerusalem oṫuƞwahe etaƞhaƞ mak̇a-iyuṫapi ṡakowiƞ waheċetu. 14Taku tok̇a ki lena iwoglakahaƞpi. 15Eċuƞhaƞ Jesus iyuƞk̇ala ṫaƞiƞicʹiyiƞ na wiċisakib ob yahe. 16Ho eyaṡ Wak̇aƞṫaƞka Jesus iyekiyewiċakiye ṡni. 17Jesus iwiċayuƞġe, “Taku ċa iwoyaglakapi hwo?” eye.

Le naḣʹuƞpi hehaƞ inajiƞpi. Ċaƞteṡic̄api ki awiċableze. 18Waƞji, Cleopas ec̄iyapi, ki leċel ayupte, “Niṡnala Jerusalem oṫuƞwahe ki lel wana aƞpetu tona taku tok̇a ki slolyaye ṡni hwo?” eye.

19Jesus ake iwiċayuƞġe, “Taku tok̇a hwo?” eye.

Leċel ayuptapi, “Jesus Nazareth oṫuƞwahe etaƞhaƞ wiċaṡa-wak̇aƞ-waayaṫaƞiƞ heċa na waṡʹagya wauƞspewiċakiya. Wak̇aƞya waeċuƞ na Wak̇aƞṫaƞka e na oyate ki tohaƞyaƞ okihika yuwaƞka yuzapi. 20Waċekiye-wiċaṡa-oiṫaċaƞpi ki e na takuku oiṫaċaƞpi ki Jesus oyuspewiċakiyapi. Roman oiṫaċaƞḣc̄a ki ṫaakiċita ki Jesus ċaƞic̄ipaweġa akaƞl okataƞpi ċa hel teḣiya tʹe. 21Jesus uƞkiyuṡkapi kte ki he Israel oyate ki awaċiƞya uƞkʹuƞpi tk̇a. Wana aƞpetu ic̄iyamni na nahaƞḣc̄i wakta uƞkʹuƞpi. 22-23Yuƞk̇aƞ wiƞyaƞ eya yuṡʹiƞuƞyapi. Hihaƞnilaḣc̄i ṫaċaƞ eyuƞpapi ekta ipi. Yuƞk̇aƞ ṫaċaƞ ki tok̇aḣʹaƞ. Glihuƞnipi hehaƞ ogligle eya waƞwiċayaƞkapi keya oglakapi. Ogligle ki lena Jesus kini keya owiċakiyakapi. 24Ċa huƞḣ ekta ihuƞnipi yuƞk̇aƞ wiƞyaƞ ki oyakapi heċeḣc̄i Jesus ṫaċaƞ ki tok̇aḣʹaƞ,” eya oyakapi.

25Ċa Jesus hewiċakiye, “Ataṡ waayablezapi ṡni yelo. Wak̇aƞṫaƞka wiċaṡa-wak̇aƞ-waayaṫaƞiƞ ṫawa ki taku onic̄iyakapi ki nahaƞḣc̄i ċetʹuƞwiċayaglapelo. 26Wak̇aƞṫaƞka Messiah ki leċel kakijiƞ kta yuṡtaƞ na hehaƞl glukini na maḣpiyata gluonihaƞ kta yuṡtaƞ.” 27Hehaƞ Jesus Wowapi-Wak̇aƞ el woyakapi ki wiċakic̄iksuye. Moses e na wiċaṡa-wak̇aƞ-waayaṫaƞiƞ uƞma ki wowapi ki owiċakiyake.

28Wiċaṡa nupa ki ob wiċoti waƞ ekta yapi ki kiyela ihuƞnipi hehaƞ Jesus isam yiƞ kte sʹeleċec̄a ċa ablezapi. 29Ċa hoyekiyapi, “Wimaheliyayiƞ na eċani ki oiyokpaziƞ kta ċa lena uƞ wo,” eyapi. Ċa hena ob uƞ. 30Wol-iyotakapi hehaƞ Jesus aġuyapi waƞ ic̄u na yuwak̇aƞ. Ċokaƞ yuksiƞ na wiċakʹu. 31Walehaƞl Jesus iyekiyapi yuƞk̇aƞ ognahelaka tok̇aḣʹaƞ. 32Ċa hekiċiyapi, “Leċiya kiċi uƞkʹuƞ hehaƞ Wowapi-Wak̇aƞ ki eċel okaḣniḣuƞkiye kʹuƞ. Hehaƞ lila ċaƞteuƞwaṡte kʹuƞ,” ekiċiyapi.

33Waƞc̄agna ikpanajiƞpi na Jerusalem oṫuƞwahe ekta kipi. Ak̄e waƞji ki Jesus ihakab-uƞpi ki ob igluwitayapi. Wauƞspewiċakiyapi nupa ki lena igluwitapi ki iyuha iyewiċayapi. 34Oyate ki wiċaṡa nupa ki lena leċel owiċakiyakapi, “Iṫaċaƞ ki kiniḣc̄e na Peter el ṫaƞiƞicʹiyelo,” eyapi.

35Emmaus wiċoti etaƞhaƞ glipi waƞ hena nupiƞ leċel oglakapi, “Ċaƞku ogna Jesus atauƞyapi na aġuyapi ki yuksa hehaƞ nakeṡ iyeuƞkiyapi,” eyapi.

Jesus Ihakab Uƞpi ki El Ṫaƞiƞicʹiye

36Lena oglakapi eċuƞhaƞ ognahelaka Jesus ṫaƞiƞicʹiyiƞ na hewiċakiye, “Wak̇aƞṫaƞka taƞyaƞ awaƞniyaƞkapi ktelo,” eye.

37Lila iyuṡʹiƞyayapi. Wanaġi ċa waƞyaƞkapi keċiƞpi 38ċa Jesus hewiċakiye, “K̇omakiṗapi ṡni yo. Takuwe wakini ki le nahaƞḣc̄i ċetʹuƞmayaglapi hwo?” eye. 39“Si na napokaṡke ki aomakataƞpi ki waƞmic̄iyaƞkapo. Emayuṫaƞpi na amablezapo. Wanaġi waƞjini leċel eluṫaƞpi oyakihipi ṡni yelo,” eye.

40Leya hehaƞ tuktel okataƞpi ki kpazo. 41Woċetʹuƞgla eyaṡ wiyuṡkiƞ sam-iyayapi. Iwiċayuƞġe, “Takuƞl yul pic̄a luhapi hwo?” eye. 42Ċa hoġaƞ waƞ ṗelikc̄eya ṡpayaƞpi ċa kʹupi. 43Wiċiṫokab ic̄u na yute.

44Na lewiċakiye, “Niohaƞ wauƞ hehaƞ oċic̄iyakapi. Wowapi-Wak̇aƞ el taku omayakapi hena iyuha iyeċetu kta keṗe.”

45Nahaƞ Wowapi-Wak̇aƞ ki okaḣniḣwiċaye, 46na hewiċakiye,

Leċel miṫaƞtaƞhaƞ owapi, “Messiah ki kakijiƞ na teḣiya tʹiƞ kte. Ho na aƞpetu ic̄iyamni ki kini kte.” 47-48Mak̇asitomniya oyate ki Messiah ṫawokiċuƞze ogna leċel woyakapi kte: Oyate ki ṫoḣʹaƞ akiblezapi na Wak̇aƞṫaƞka kiksuyapi haƞtaƞṡ wagluṡnapi ki hena awiċakic̄iktuƞjiƞ kte. Makakijiƞ na teḣiya matʹiƞ na ake wakini ki lena waƞlakapi ċa Jerusalem etaƞhaƞ iyayapi na kaabyekiya oyakapo. 49Eyaṡ ṫokeya Wak̇aƞṫaƞka Ate eye ki iyeċel, eċani ki Woniya-Wak̇aƞ ki el niupi kta ċa oṫuƞwahe lel aṗe uƞpo.

Wak̇aƞṫaƞka Jesus Maḣpiyatakiya Glokiyagle

50Ho na Bethany oṫuƞwahe hehaƞya awiċai na hehaƞl awiċayuġatiƞ na wiċayuwak̇aƞ. 51Leċuƞ wahehaƞ Ate-Wak̇aƞṫaƞka maḣpiyatakiya glokiyagle. 52Ċa Jerusalem oṫuƞwahe etkiya lila wiyuṡkiƞyaƞ kiglapi. 53Na ohiƞniyaƞ Tipi-Wak̇aƞ ekta Wak̇aƞṫaƞka yawaṡtepi.

Currently Selected:

Luke 24: LKTNT20

Highlight

Copy