Yoa. 16
16
1“Adau ayoŋ alimun ŋakiro ŋun daadaŋ, ikotere nyioliyosi iyes ananupit kus. 2Ikiritarete ikes iyes alosinagogae; kire ebuni apaki ŋina ikiaryata ŋituŋa iyes ebasi kori ikitiyae ŋuna ecamit Akuj. 3Itiyaete ikes ŋun, anerae nyeyenuna ikes Papa kori ayoŋ. 4Nai akalimok ayoŋ iyes ŋakiro ŋun, ikotere ani apaki ŋina itiyakinotor neni kus, totamut atemar aris ayoŋ kakalimok iyes.
Etic ŋolo ke Etau a ŋolo Asegan
“Nyelimokina ayoŋ iyes ŋakiro ŋun anakisyakinet, anerae ikirukit iyes ka ayoŋ. 5Nai tokona aboŋori ayoŋ neni a ŋolo ekeyakuunit ayoŋ, nai emam iyes ipei daŋ ŋini ekeŋisi ayoŋ tema, ‘Ai ilosi iyoŋ?’ 6Aŋuna tokona adaunia ayoŋ alimokin iyes ŋun daadaŋ, eyaloloŋ ŋikusitai nooi. 7Nai akalimokini ayoŋ iyes ŋuna a kire atemar, ikijoikini iyes kalot ayoŋ, anerae pa kalot ayoŋ aneni kus, nyebuni ekeŋarakiniton neni kus. Nai kalot ayoŋ, eyakuuni iŋes neni kus. 8Ani edoluni iŋes, itunupi ŋituŋa ŋulu ka akwap ŋuna ka asecit ka ŋuna ka akiyookino, ta ŋuna ka atubokino. 9Itunupi ŋuna ka asecit, anerae nyakanupito ikes ayoŋ. 10Itunupi ŋuna ka akiyookino, anerae alosi ayoŋ neni a Papa, nyikianyuwasi nabo. 11Itunupi ŋuna ka atubokino, anerae adaun ekepukan ŋolo ka akwap a na atubokin.
12“Eyakasi ŋakiro ŋuna alalak ŋuna acamit ayoŋ alimokin iyes, nai nyipedorete atitinyikin. 13Nai ani ebuni Etau ŋolo irworo ŋuna a kire, ikiyoori iyes nakiro daadaŋ ŋuna a kire; anerae nyirwori iŋes aŋuna ka apedor keŋ bon, nai ebuni iŋes akirwor ŋuna iirarit, nabo ikilimokini iyes ŋuna epote. 14Eketopoloori iŋes ayoŋ, anerae ebuni iŋes akijaar ŋuna kaŋ, itolimok iyes. 15Ŋinibore daadaŋ eyakar Papa kaŋ, erae ŋini kaŋ, iŋes nai alimunitor ayoŋ atemar, ebuni iŋes akijaar ŋuna kaŋ, itolimok iyes.
Epote ŋikasyomak aryamun akiyaloloŋ, nai ekaku elelyanete
16“Apaki adio cicinyikianyuwarete ayoŋ nabo; apaki adiocici ekaku, ikianyuwarete ayoŋ nabo.” 17Kiŋitanaros ŋikasyomak keŋ ŋice ebasi, “Okoe! Nyo mono apolou ŋina a ŋakiro a ŋun? Ikilimok iŋes iwon atemar, ‘Apaki adiocici nyikianyuwarete ayoŋ nabo; apaki adiocici ekaku, ikianyuwarete ayoŋ nabo;’ ka daŋ abala, ‘Anerae alosi ayoŋ neni a Papa.’ 18Nyo mono tokona apolou ŋina ka akirot a ŋina ebala iŋes ‘Iwadiocici’. Ikikuruwo apolou ŋina a ŋakiro a ŋuna irworo iŋes!”
19Ayeni Yesu atemar acamito ikes akiŋit iŋes ŋakiro ŋun. Aŋun, tolimok ikes tema, “Ikwa ŋuna iŋitanarosi iyes alokidiŋ kus ŋuna alimunit ayoŋ atemar, ‘Apaki adio cicinyikianyuwarete ayoŋ nabo; apaki adio ciciekaku, ikianyuwarete ayoŋ nabo’ a? 20Akalimokini ayoŋ iyes kire atemar, ipote iyes akigworo ka akiwolol, nai elelyani akwap nooi; ipote iyes akiyaloloŋ, nai ibelekin akiyaloloŋ kus toruwor alelyan. 21Iyaloloŋi aberu apaki ŋina eryebakinor, anerae adol akeepaki ŋina idounio; nai ani kedau iŋes akidoun, imuryakini iŋes aryeba, anerae elelyani iŋes akidoun ikoku nakwap. 22Ikote nenipei ŋakiro aneni kus: iyaloloŋete iyes tokona, nai akaanyuni ayoŋ iyes nabo, ido tolelyana ŋitai kus. Emam idiotuŋanan elemari alelyan ŋin aneni kus.
23“Ani ŋina edolunio Akoloŋit ŋin, emam idiobore ipote iyes akiŋit ayoŋ. Nai akalimokini ayoŋ iyes kire atemar, ibore daadaŋ ŋini iŋitasi iyes alokiro kaŋ, ebuni Papa kaŋ ainakin iyes. 24Akitodol tokona nyiŋita iyes idiobore alokiro kaŋ; kiŋita iryamunete, ikotere alelyan kus ilelebikin.
Elou Yesu akwap
25“Erwor ayoŋ ŋakiro ŋun daadaŋ a ŋakitadapeta. Ebuni apaki ŋina nyerworya ayoŋ a ŋakitadapeta, nai abuni akisileerekin iyes Papa. 26Akoloŋit ŋin, ipote iyes akiŋita alokiro kaŋ, nai nyakalimokinit ayoŋ iyes atemar ekelipakini iyes Papa kaŋ; 27anerae ikimina iyes Papa elope. Ikimina iŋes iyes, anerae ikiminasi iyes ayoŋ ka inupito atemar abunit ayoŋ aneni a Papa. 28Abu ayoŋ aneni a Papa, abu nakwap, nabo aesikini ayoŋ akwap, oboŋo neni a Papa.”
29Ido tolimokis ŋikasyomak iŋes temasi, “Abe bo tokona nyeriŋa iyoŋ irworo a ŋakitadapeta, nai ileereete ŋakiro kon. 30Ikiyeni tokona isua atemar iyeni iyoŋ ŋakiro daadaŋ, iŋes nai nyiitanitor idiotuŋanan akiŋit iyoŋ akirot. Ikitunupa nu isua atemar, ibunit iyoŋ aneni ka Akuj.”
31Toboŋok Yesu ikes tema, “Inupa kire iyes tokona a? 32Ebunit apaki, kire adolu apaki ŋina ikielarere iyes, ŋina elosyo ŋinituŋanan lore keŋ, okoesikin ayoŋ bon; nai nyedoŋi ayoŋ bon, anerae ikirukit Papa ka ayoŋ. 33Akalimok ayoŋ iyes ŋun, ikotere toryamut iyes ekisil alotooma kaŋ. Ikiteryamuni akwap iyes ŋican, nai toena ŋitai! Elou ayoŋ akwap.”
Currently Selected:
Yoa. 16: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.
