Yoa. 17
17
Kilipak Yesu ŋikasyomak keŋ
1Kedau Yesu akirwor ŋakiro ŋun, kireo nakuj, kilip tema, “Papa, adolu apaki, kitopoloo Lokoku kon, ikotere ikitopoloo Lokoku kon iyoŋ. 2Anerae iinak iyoŋ Lokoku apedor ŋinakipukaet ŋituŋa daadaŋ, ikotere iinakini akiyar ŋina nyedaun neni a ŋulu daadaŋ ibu iyoŋ inak iŋes. 3Erae na akiyar ŋina nyedaun, itoyenete ikes iyoŋ, Akuj ŋina erae apei bon ŋina a kire ka Yesu Kristo ŋolo ibu kiyaku iyoŋ. 4Etoodik ayoŋ apolou kon nakwap anakirikakin etic ŋolo ikiinakinit iyoŋ ayoŋ akitiya. 5Papa, inakinae ayoŋ apolou tokona alokiŋaren kon, apolou ŋinapei ikiyakar ayoŋ ka iyoŋ eriŋa tari akwap nyesubuna.
6“Adau ayoŋ akisileerekin ekiro kon lotuŋa ŋulu ibu iyoŋ ikiinak ayoŋ anakwap a na. Arae ikes ŋulu kon, ibu iyoŋ ikiinak ayoŋ ka ericakis ikes akirot kon. 7Tokona eyenete ikes atemar, ibore daadaŋ ŋini ikiinak iyoŋ ayoŋ, ebunit aneni kon. 8Anerae alimok ayoŋ ikes ŋakiro ŋuna ikilimokini iyoŋ ayoŋ, ka acamut ikes. Ayenut ikes atemar, abunit ayoŋ kire aneni kon, ka anupa atemar, iyoŋ ikiyakuuni ayoŋ.
9“Elipi ayoŋ aŋuna kec; nyelipi ayoŋ aŋuna ka akwap a daadaŋ, nai elipi aŋuna a ŋulu ikiinak iyoŋ ayoŋ, anerae erae ikes ŋulu kon. 10Ŋini erae ŋini kaŋ erae ŋini kon ka ŋini erae ŋini kon erae ŋini kaŋ, itoodiunitae apolou kaŋ aneni kec. 11Abunit ayoŋ neni kon; nyeriŋa ayoŋ ayai nakwap, nai eriŋa ikes eyakasi nakwap. Papa ŋolo Asegan, kiyok iyoŋ ikes ka apedor a ŋina ke ekiro kon, ekiro ŋolo ikiinakinit iyoŋ ayoŋ, ikotere eruworosi ikes ŋipei, ikwaŋina ikiraakar iwon ŋipei. 12Ani eriŋa ayoŋ ikirukit ka ikes, abu eyok ikes ka apedor a ŋina ke ekiro kon, ekiro ŋolo ikiinakinit iyoŋ ayoŋ. Eyok ayoŋ ikes, emam ŋini aoliyo, mati ipei ŋini etemokino tooliyo--ikotere kiyookinotor Ŋakigireta. 13Nai tokona abunit ayoŋ neni kon, adau ayoŋ akirwor ŋakiro ŋun anakwap, ikotere eryamunete ikes alelyan kaŋ ilelebikina alotai kec. 14Ainak ayoŋ ikes akirot kon; etidiŋa ŋituŋa ŋulu ka akwap ikes, anerae nyerae ikes ŋulu ka akwap, ikwaŋinapei nyaraakar ayoŋ daŋ ŋolo ka akwap. 15Nyekelipit ayoŋ iyoŋ atemar tolema ikes anakwap, nai ekelipit ayoŋ iyoŋ atemar, kiyok iyoŋ ikes aneni a ŋolo Aronon. 16Nyerae ikes ŋulu ka akwap, ikwaŋinapei nyaraakar ayoŋ daŋ ŋolo ka akwap. 17Kituruwo ikes ŋulu etyakunitae nakirot ŋina a kire; akirot kon iŋes erae ŋina a kire. 18Ikwaŋinapei ibunio iyoŋ ikiyakiya ayoŋ nakwap, eyakiyarit ayoŋ daŋ ikes nakwap. 19Aruwor ayoŋ ŋolo akatyakunitae aŋuna kec, ikotere toruworos ikes daŋ ŋulu seuna anakirot a ŋina a kire.
20“Nyelipakinit ayoŋ ikes make, nai elipakinit tari ŋulu akanupete ayoŋ aŋuna ka akitatam kec. 21Elipit ayoŋ atemar toruworos ikes daadaŋ ŋipei.
“Papa! [Ikwaŋinapei iyakar iyoŋ tooma kaŋ, ka ayoŋ daŋ tooma kon,] pena ikes tooma yok, ikotere enupi akwap atemar, ikiyakuunit iyoŋ ayoŋ. 22Ainak ayoŋ ikes apolou ŋinapei ikiinit iyoŋ ayoŋ, ikotere eruworosi ikes ŋipei, ikwaŋinapei ikiraakar iwon ŋipei. 23Ayai ayoŋ tooma kec, iyai iyoŋ tooma kaŋ, ikotere toruworos ikes ŋipei jik, ikotere nai toyenu akwap atemar ikiyakuunit iyoŋ ayoŋ ka atemar imina iyoŋ ikes, ikwaŋinapei ikiminar iyoŋ ayoŋ.
24“Papa! Acamit ayoŋ ŋulu ikiinakinit iyoŋ ayoŋ, oruko ka ayoŋ aneni ayai ayoŋ, ikotere eanyunete ikes apolou kaŋ, ŋina ikiinakinit iyoŋ ayoŋ; anerae ikimina iyoŋ ayoŋ eriŋa tari akwap nyesubuna. 25Okoe Papa ŋolo ka akiyookino! Nyikiyeni iyoŋ akwap kire, nai akayeni ayoŋ iyoŋ; eyenete lu atemar ikiyakuunit iyoŋ ayoŋ. 26Eketeyenu ayoŋ iyoŋ ikes ka arubakini ekoni nenipei, ikotere min amina ŋina ikiminar iyoŋ ayoŋ tooma kec ka ayoŋ daŋ tooma kec.”
Currently Selected:
Yoa. 17: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.
