Luk. 17
17
Asecit
(Mat. 18:6-7, 21-22; Mar. 9:42)
1Tolimok Yesu ŋikasyomak keŋ tema, “Kire epote ŋakitemyeta ŋuna epedorete akitesec ŋituŋa, nai ekaŋ iŋes ŋini eyauni ŋakiro ŋun! 2Kitemokino iŋes toenikinae amoru ŋinakiryeet lomosiriŋ, tocakakinae nanam, akilo iŋes akitesec ipei a ŋulu cicik a lu. 3Tocoikinito! Ani kesec lokaato kon, kiyayak iŋes; ani keki, kisyoni. 4Ani kesec iŋes aneni kon ŋarwa ŋakanikaarei apeipaaran, ido toboŋu ŋarwa ŋakanikaarei tolimu tema, ‘Aki, kisyoni,’ itemokino nai kisyoni iŋes.”
Anupit
5Tolimokis Ŋikiyakia Yesu temasi, “Ekapolon, kiyatak anupit kosi.”
6Toboŋok Yesu ikes tema, “Kerae tari todit anupit kus totya icokit ŋini ikoni ŋini ke ebobore, kipedosi alimokin ekitoe lo atemar, ‘Torutun anataagor, min torup ananam!’ Iirari iŋes.
Etic ŋolo ke eketiyan
7“Ani keyai ipei alokidiŋ kus ŋini eyakar eketiyan ŋolo itae kori iyoki ŋamesekin, ŋina ebunio iŋes alomanikor, itemari iyoŋ iŋes kiboikin kimuj a? 8Mam jik! Ilimokini iyoŋ iŋes itema, ‘Tonap arapet, kidoroki akaakimuj atipei. Kidareu daŋ emuj ka omat ayoŋ mono, ani ekaku, kimuj nai iyoŋ.’ 9Nyejok alimokin eketiyan atemar alakara aŋuna ke etic keŋ, kori ai? 10Ikote neni tari aneni kus. Ani kitiyata iyes ŋuna ikicikakinitae daadaŋ, temasi, ‘Ikirae isua ca ŋiketiyak, ikitiya isua ŋuna make ikicamakinitae akitiya!’ ”
Kitaŋaleu Yesu ŋikilyok ŋitomon ŋulu erumit atapon
11Ani elosi Yesu Yerusalem, kitor kidiŋ Samaria ka Galileya. 12Ani eapiyari lore ŋolo alosi, kiryamun ka ŋikilyok ŋitomon ŋulu erumit atapon ŋulu apotu towua anawae. 13Kiworout ikes ebasi, “Yesu Eketataman, kisyoni isua!”
14Kiŋolik Yesu ikes tolimok tema, “Toloto neni a ŋisacaradotin ikisyemeto ikes iyes.” Ani elosete ikes alorot, toŋaleut ikes tosegut. 15Nai ani eanyuni epei alokidiŋ kec atemar aŋaleu, toboŋo elakara ipuro Akuj ka iworoe ke etoil a ŋolo apolon. 16Tolot toramakin kwap nakejen a Yesu kijuuru, tolakar neni keŋ. Arae iŋes Esamaritanoit. 17Kiŋit Yesu iŋes tema, “Pa takae arae ŋikilyok ŋitomon etaŋaleunio a? Nyaalu bo ŋikanikaomwon? 18Inyoni eraakar ituŋanan ŋini ka acekwap eboŋuni akipuro Akuj?” 19Tolimok Yesu iŋes tema, “Tonyou tolot, ikitaŋaleu iyoŋ anupit kon.”
Abunore ŋina ka Apukan ka Akuj
(Mat. 24:23-28, 37-41)
20Kiŋita Ŋiparisayon ŋice Yesu temasi, “Ori ebunio Apukan ka Akuj?” Toboŋok Yesu ikes tema, “Nyebuni Apukan ka Akuj etakanete ŋakitoodiuneta keŋ. 21Emam ituŋanan ŋini etemari, ‘Kiŋolik, eyai ne!’ kori ‘Eyai ama!’ Anerae eyai Apukan ka Akuj neni kus.”
22Tolimok nai Yesu ŋikasyomak keŋ tema, “Epote ŋirwa ŋulu iitaniata iyes akiŋolikin tari apeikoloŋit ŋina a Lokoku a Ituŋanan, nai nyiŋolikinete jik. 23Epote ŋice ŋulu ikilimokinete iyes temasi, ‘Kiŋoliyasi ama!’ kori ‘Kiŋoliutu nege!’ Nai nyilot kori nyiwuapakis ikes. 24Anerae ikoni abunore a Lokoku a Ituŋanan akimilyaunet ŋina ebuni ke epeiwae akwap tari lowae ŋoloce, kinuak akwap daadaŋ. 25Nai itemokino mono iŋes kisicanae nooi, nabo toŋero ŋituŋa ŋulu a ŋirwa a lu. 26Ikwaanikinosi ŋakiro ŋuna a ŋirwa a Lokoku a Ituŋanan ka ŋuna koloŋ a ŋirwa a ŋulu a Noa. 27Emujete ŋituŋa daadaŋ ka tomasete, eitanarete ŋikilyok, nabo epotonoryo ŋapesur kiitae tari akitodol akoloŋit ŋina alomarya Noa nataker; nai tomunyasi ŋakipi ŋituŋa ŋuluce daadaŋ. 28Ikwaanikinosi ŋirwa ŋul ka ŋirwa ŋulu a Lot, emujete ŋituŋa daadaŋ ka tomasete, agyelete, nabo togyelanarete, etaete ka todukete. 29Nai akoloŋit ŋina arotokinio Lot alo Sodoma, totiyaun akim ka Sulpa alokidiama ikwa akiru, tomunya ŋituŋa ŋuluce daadaŋ. 30Ikokinete ŋakiro neni Akoloŋit ŋina etakanunia Lokoku a Ituŋanan.
31“Akoloŋit ŋin, nyitemokino ituŋanan ŋini eyai kidiama akai, edokuni alemun ŋiboro keŋ ŋulu eya tooma akai. Ituŋanan ŋini eyai lomanikor daŋ, nyitemokino iŋes eboŋuni kai. 32Totamunito aberu a Lot! 33Ŋinituŋanan iwarit aiun akiyar keŋ, ecakari; ŋini ejali akiyar keŋ, eiuni. 34Akalimokini ayoŋ iyes atemar, Akoloŋit ŋin nakwaare, eryamunio ŋituŋa ŋiarei alokitaada; elemaryo ipei, toesikinae ŋinice. 35Eryamunio ŋaberu ŋaarei iryeete; elemaryo apei, toesikinae ŋinace. [ 36Eryamunio ŋikilyok ŋiarei itiyaete etic alomanikor; elemaryo epei, toesikinae ŋoloce.]”
37Kiŋita ŋikasyomak keŋ iŋes temasi, “Ai Ekapolon?” Toboŋok iŋes tema, “Neni eyai ibore ŋini atwan, iŋes iudakin ŋataruk.”
Currently Selected:
Luk. 17: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.
