Luk. 18
18
Akitadapet ŋina ka apuserut ke ekatubon ŋakiro
1Tosodi Yesu tolimok ŋikeekasyomak akitadapet aŋuna ka akitatamya ikes atemar itemokino ikes akilipenen jwi jwi tomam akiup. 2Tolimu iŋes tema, “Ayai lotaun ece ekatubon ŋakiro ŋolo pa akerit Akuj ka pa amisit ŋituŋa. 3Ayai apuserut lotaun ŋolopei ŋol, ŋina abuneene neni ke ekatubon, ecamit kiirarae ŋakiro keŋ ebala, ‘Totub akirot ŋina akatyakit ayoŋ ka ituŋanan ŋini ikiŋoitor!’ 4Abu ekatubon ya apaki ŋina aoyan nyetyaka ŋakiro; nai ani ekaku, totamu iŋes tema, ‘Tari pa kakerit ayoŋ Akuj kori ŋituŋa, 5nai aŋuna ekecania ayoŋ apuserut naga, atubi ayoŋ ŋakeekiro eriyan, anerae acepaki akanipi iŋes ayoŋ aŋuna ka abunenen keŋ jik!’ ”
6Tema Ekapolon, “Kiirasi ŋakiro ŋuna alimuni ekatubon ŋolo aronon. 7Ani bo Akuj, nyepedori mono iŋes akitiya neni ajokan loseuna keŋ ŋulu igworonokinete iŋes apaaran jwii ka akuwar kya ecamito akiŋarakino a? Edidi iŋes akiŋarakin ikes a? 8Akalimokini ayoŋ iyes atemar, einakini iŋes ikes ibore ŋini ecamito atipei. Nai ŋina ebunio Lokoku a Ituŋanan, eryamuni mono iŋes anupit anakwap a?”
Eparisayot ka ekeriran ocur
9Tolimu Yesu akitadapet naga ikotere ŋituŋa ŋulu abasi ikirae ŋulu iyookino ka tojamuwarito daŋ ŋuluce. 10“Apotu ŋikilyok ŋiarei, toloto Kai ka Akuj akilip; arae epei Eparisayot, torae ŋoloce ekeriran ocur.
11“Towo Eparisayot kilip nenipei keŋ bon tema, ‘Akuj, alakara ayoŋ neni kon, anerae nyikikwaan ayoŋ ka ŋituŋa ŋuluce, ŋikademanarak, ŋikokolak, ŋikalomak, kori daŋ ikwa ekeriran ocur ŋol. 12Aroneene ayoŋ ŋaroniet ŋaarei a ŋolosabit, nabo akalemianakini iyoŋ atutubet apei ŋina kitomonet a ŋinibore a daadaŋ aryamuni ayoŋ.’
13“Towo ekeriran ocur aneni alwana, nyireo ŋakeekonyen tari nakuj, toram etau keŋ tema, ‘Akuj, kisyoni ayoŋ ekasecan!’ 14Akalimokini ayoŋ iyes atemar, abu ekeriran ocur tolot lore keŋ iyookino alokiŋaren Akuj, akilo Eparisayot; anerae ŋinituŋanan itopolooryo bon, itiditeunio; nai ŋini itiditeuna bon, itopolooryo.”
Kiterereŋ Yesu ŋidwe ŋulu cicik
(Mat. 19:13-15; Mar. 10:13-16)
15Torikut ŋicetuŋa ŋidwe neni a Yesu, ecamito iŋes kidokok ŋakeekan neni kec; nai ani iŋolikinete ŋikeekasyomak ŋun, kiretakis ikes. 16Tonyarau Yesu ŋidwe neni keŋ tema, “Kimyekisi ŋidwe potu neni kaŋ! Nyiretakis ikes, anerae erae Apukan ka Akuj ŋina a ŋulu ikote lu. 17Akalimokini ayoŋ iyes kire atemar, ŋinituŋanan nyijauni Apukan ka Akuj ikwa ikoku ŋini cici, nyelomari jik Napukan ŋin.”
Ekile ŋolo abarit
(Mat. 19:16-30; Mar. 10:17-31)
18Kiŋit ekepukan ece ŋolo a Ŋiyudayan Yesu tema, “Eketataman ŋolo ajokan, nyo itemokino ayoŋ etiya oryamunia akiyar ŋina nyedaun?”
19Kiŋit Yesu iŋes tema, “Kaanukiro ikinyaritor iyoŋ ayoŋ ŋolo ajokan? Emam ituŋanan ŋini ajokan, mati Akuj bon. 20Iyeni iyoŋ Ŋakiciketa, ‘Nyilom, nyiar, nyikoko, nyisudi ŋakiro, tokerite papa kon ka toto kon.’ ”
21Tolimu ekepukan tema, “Eketataman, ŋinapei koloŋ alokiditeu kaŋ, ericit ayoŋ Ŋakiciketa ŋun daadaŋ.”
22Ani iirari Yesu ŋakiro ŋun, tolimok iŋes tema, “Ipeibore bon ikibucit iyoŋ: togyela ibore daadaŋ ŋini iyakar iyoŋ, tokorak ŋisiliŋa lokulyak, ikotere min ebari kon nakuj. Ani ekaku, ibu ikiwuapak ayoŋ.” 23Ŋolopite eirarya iŋes ŋakiro ŋun, torotok esiliyorit nooi, anerae abarit iŋes nooi.
24Kiŋolik Yesu iŋes kesiliyo, tolimu tema, “Egogoŋ nooi ŋikabarak alomar Napukan ka Akuj! 25Epatana ekaal akitor napedot ŋina ke esindan, akilo ekabaran alomar Napukan ka Akuj!”
26Potu ŋituŋa ŋulu eirarete ŋakiro ŋun, kiŋita iŋes temasi, “Ŋae bo nai eiun?”
27Toboŋok Yesu ikes tema, “Ŋuna nyepedorosi alotuŋa, epedorosi aneni ka Akuj!”
28Tolimok Petero iŋes tema, “Ikijal isua ŋiboro kosi daadaŋ, ikiwuapak iyoŋ.”
29Toboŋok Yesu ikes tema, “Akalimokini ayoŋ iyes kire atemar, emam ituŋanan aesiki ekal keŋ, kori akeeberu, ŋikeekaitotoi, ŋikeekauruunak ka ŋikeedwe aŋuna ka Apukan ka Akuj, 30ŋini nyeryamuni abaru ŋina alalan tokona ka akiyar ŋina nyedaun alokaru a ŋulu esidyok.”
Kirwor Yesu akirworet ŋina a ŋauni ŋakiro ŋuna ka atwanare keŋ
(Mat. 20:17-19; Mar. 10:32-34)
31Tonyaraiya Yesu ŋikasyomak keŋ ŋulutomon ka ŋiarei nawae, tolimok ikes tema, “Kiirasi! Ikidokari iwon tokona Yerusalem, nabo ŋuna daadaŋ igirito ŋikadwarak ikotere Lokoku a Ituŋanan iyookinosi. 32Ipotokinio iŋes lobukui ŋulu nyerae ŋulu a Ŋiyudayan, tokyenatar ikes iŋes kibuŋata ka kimwaanakis. 33Ibuŋaete ikes iŋes toara; nai kelunyar ŋirwa ŋiuni, eyaruni iŋes.”
34Nai nyeyenut ŋikasyomak apolou a ŋakiro a ŋuna erworo iŋes tari iwadio, anerae ewuaitae apolou ŋina ke erwor keŋ aneni kec ka pa ayenete ikes ŋakiro ŋuna acamit Yesu alimun.
Kitaŋaleu Yesu emuduk ŋolo elipanar
(Mat. 20:29-34; Mar. 10:46-52)
35Ani edoli Yesu diyete Yeriko, eboi ekile ŋolo amudukana alodiyete erot kilipanar. 36Ani iirari emuduk asepic a ŋituŋa itori diye, kiŋit tema, “Anukiro nu?”
37Tolimokinae iŋes temarae, “Yesu ŋolo a Nasaret iŋes itorunit diye ne.”
38Tosodi iŋes kiworou tema, “Yesu! Lokoku a Daudi! Kisyoni kare ca ayoŋ!”
39Kiŋenyakis ŋituŋa ŋulu eŋarenete iŋes temasi, “Kililiŋ!” Nai torebor iŋes nooi tema, “Lokoku a Daudi! Kisyoni kare ca ayoŋ!”
40Towo Yesu tolimu tema, “Yautu ekile neni kaŋ.” Ani eapuuni emuduk diyete keŋ, kiŋit Yesu iŋes tema, 41“Inyoni icamit iyoŋ ayoŋ etiyak neni kon?” Toboŋok iŋes tema, “Ekapolon, acamit okienyu nabo.”
42Tolimok Yesu iŋes tema, “Tokienyu nabo! Ikitaŋaleu iyoŋ akoninupit.”
43Tokienyu iŋes atipei, kiwuapak Yesu ipuro Akuj elakara. Ani iŋolikini asepic a ŋituŋa ŋakiro ŋun, kipur Akuj.
Currently Selected:
Luk. 18: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.
