Luk. 4

Kitem Satan Yesu

(Mat. 4:1-11; Mar. 1:12-13)

1Toboŋu Yesu alo Yorodan ileleba Etau ŋolo Asegan ŋolo abu toriko iŋes naloŋisat, 2kiboi aina ŋirwa ŋatomoniomwon, kitem Satan iŋes. Kiriya iŋes ŋirwa ŋul daadaŋ nyimuja, tonyam nai akoro.

3Tolimok Satan iŋes tema, “Ani kirae iyoŋ Lokoku ka Akuj, tolimok ceni amoru na toruwor akimuj.”

4Tolimok Yesu iŋes tema, “Igiritae Nakigireta ebe, ‘Nyeyari ituŋanan ka akimuj bon.’ ”

5Toriko Satan Yesu kidiama emoru, kitoodik iŋes ŋibukui ŋulu ka akwap daadaŋ apeikitoodikinet bon, 6tolimok iŋes tema, “Akainakini ayoŋ iyoŋ apolou ka ebari lo daadaŋ; akainakinio koloŋ ayoŋ daŋ ka apedori ayoŋ ainakin ŋinituŋanan acamit. 7Ŋiboro lu daadaŋ eruworosi ŋulu kon, erae kiryedik iyoŋ alokiŋaren kaŋ, ikima ayoŋ.”

8Toboŋok Yesu iŋes tema, “Igiritae Nakigireta ebe,

‘Iryediki iyoŋ kitopoloo Ekapolon Akuj kon,

kitiyanak iŋes bon!’ ”

9Toriko nabo Satan Yesu Yerusalem, kitowuo iŋes alobibiru a ŋolo ka Akai ka Akuj, tolimok iŋes tema, “Ani kirae iyoŋ Lokoku ka Akuj, kimasar kwap a ne. 10Anerae igiritae Nakigireta ebe,

‘Icikakini Akuj ŋimalaikan keŋ akiyok iyoŋ.’

11Igiritae nabo daŋ atemar,

‘Ikigagaunete iyoŋ a ŋakan kec,

ikotere nyewan amoru tari ŋakejen kon.’ ”

12Toboŋok Yesu iŋes tema, “Ebookoi ebe,

‘Nyitem Ekapolon Akuj kon.’ ”

13Kedau Satan akitem Yesu a ŋirotin a daadaŋ, abu iŋes toesik Yesu mono.

Kisyak Yesu etic keŋ anakwap a ŋina a Galileya

(Mat. 4:12-17; Mar. 1:14-15)

14Toboŋo Yesu Galileya ileleba apedor ke Etau a ŋolo Asegan neni keŋ, tokeikin ŋakiro keŋ nakwap ŋin daadaŋ. 15Etatami iŋes alosinagogae kec ka apotu ŋituŋa daadaŋ kituruut iŋes.

Toŋeroe Yesu a Nasaret

(Mat. 13:53-58; Mar. 6:1-6)

16Bu nai Yesu Nasaret neni koloŋ apolounio iŋes; ani akoloŋit ŋina a Sabato, tolot losinagoga ikwaŋinapei sek. Abu iŋes tonyou akisyom; 17inakinae iŋes ekitaabo ŋolo ke ekadwaran Isaya. Toŋaa iŋes ekitaabo, toŋau neni egiritae ebe,

18“Eyai Etau ke Ekapolon neni kaŋ,

anerae ekeos iŋes ayoŋ aŋuna ka akiserakin

Ŋakiro ŋuna Ajokak lokulyak.

ekeyakuu iŋes ayoŋ alimokin

ŋulu eenitae atemar elacakinio ikes

ka aŋaar ŋakonyen a ŋimudukanotin

ka alakakin ŋipi,

19ta akiseraun atemar adol apaki

ŋina eiunia Ekapolon ŋituŋa keŋ.”

20Togolok Yesu ekitaabo, inak eketiyan, kiboikin nai iŋes. Kitekis ŋituŋa daadaŋ ŋulu aya losinagoga iŋes nooi. 21Kisyak iŋes alimonokin ikes tema, “Nakoloŋit na, eyookinosi ŋuna igiritae Nakigireta nu, ikwaŋina sek ipupyoto iyes esyomyo.”

22Apotu ŋituŋa daadaŋ kipuro iŋes ka toumokis ikes a Ŋakiro a ŋuna Ajokak a ŋuna erworo iŋes temasi, “Meere nai lo lokoku a Yosepu a?”

23Tolimok Yesu ikes tema, “Ayeni ayoŋ atemar ikilimokinete iyes ayoŋ akitadapet ŋina ebala, ‘Emuron, kitaŋaleun bon. Ikiira isua daadaŋ ŋuna kibu iyoŋ kitiya alo Kaperenaum. Kitiya a ne anakwap kon daŋ ŋunapei.’ 24Akalimokini ayoŋ iyes kire atemar, emam ekadwaran ŋolo ecamitae anakwap keŋ.”

25“Nai akalimokini ayoŋ iyes atemar, alalak ŋapuseru alo Isirael ŋirwa ŋulu ke Eliya, ŋina aŋopiyarya akiru ŋikaru ŋiuni ka ŋilapyo ŋikanikapei, bu eron ŋolo aronon nooi nakwap ŋin daadaŋ. 26Nai aponi nyiyakiyar Eliya tari neni ka apei a ŋuna aya Isirael, mati neni ka apuserut ka apei a ŋina ayai Serepito, nakwap ŋina a Sidonia. 27Nabo aya ŋituŋa ŋulu alalak ŋulu erumit atapon alo Isirael ŋirwa ŋulu ke ekadwaran Elisa; emam ikes ipei daŋ ŋini aponi kitaŋaleunoe, mati Naaman ŋolo ka akwap a ŋina a Siria.”

28Ani iirarete ŋituŋa ŋulu aya losinagoga ŋakiro ŋun, toŋoa nooi. 29Tonyout ikes, kijukasi iŋes kiŋa etaun, torikosi iŋes nakope ŋina ke emukura a ŋolo adukitoe etaun, anerae acamito ikes akimasar Yesu a nen. 30Nai kitor Yesu kidiŋ kec, tolot.

Kitaŋaleu Yesu ekile ŋolo ekamunit ekipye

(Mar. 1:21-28)

31Tolot Yesu Kaperenaum, lotaun epei alo Galileya; kitatam iŋes ŋituŋa akoloŋit ŋina a Sabato. 32Toumokis ŋituŋa aŋuna ka akitatam keŋ, anerae etatami iŋes ka apedor. 33Ayai tooma losinagoga ekile ŋolo ekamunit ekipye. Abu iŋes kiworou tema, 34“Wooi! Eya iyoŋ ŋakiro ka isua Yesu ŋolo a Nasaret a? Ibunit iyoŋ amunyar isua a? Akayeni ayoŋ iyoŋ, irae iyoŋ ŋolo Asegan ŋolo ka Akuj!”

35Kiŋenyak Yesu ekipye tema, “Kililiŋ, tolomu alokile a lo!” Toramak ekipye ekile ŋol kwap kidiŋ ŋituŋa, tolomu nai aneni keŋ, nyewana iŋes.

36Toumokis ŋituŋa daadaŋ kirworikinos make temasi, “Anikirot na, ŋina eyakar ekile lo apedor ka apolou ŋina kiŋenyakinet ŋipyan, ido tolomut!” 37Tokeikin arwonu a Yesu akwap ŋin daadaŋ.

Kitaŋaleu Yesu nakamuran a Simoni ka ŋituŋa ŋulu alalak

(Mat. 8:14-17; Mar. 1:29-34)

38Tonyou Yesu alosinagoga, tolot kai a Simoni. Ekamunit elekes nakamuran a Simoni nooi, ido aponi tolimokinae Yesu ŋakiro ka adyak keŋ. 39Tolot Yesu towo alodiye ekitaada ŋolo ka aberu a ŋin, kiŋenyak elekes aesikin iŋes, toesik nai elekes iŋes atipei. Tonyou iŋes atipei, kisyak akisimuj ikes.

40Ani edoiyori akoloŋ, apotu ŋituŋa daadaŋ ŋulu adyakasi ŋikecetuŋa ŋidekesyo ŋulu agelegelya, yaut ikes neni a Yesu. Kidokonok iŋes ikes daadaŋ ŋakan, kitaŋaleu. 41Tari ŋipyan apotu tolomut alotuŋa iworoete ebasi, “Irae iyoŋ Lokoku ka Akuj!” Nai kikilyanak Yesu ikes nyecamak tari epei akirworikin, anerae ayenete ikes atemar Yesu erae Kristo.

Kitatam Yesu alosinagoga

(Mar. 1:35-39)

42Ani iwalari, tonyou Yesu alore, tolot nariet. Kisyakis ŋituŋa akiwarit iŋes; ani eryamunete, kiitana akiretakin iŋes nyelot iwace. 43Nai tolimok iŋes ikes tema, “Itemokino ayoŋ etatam Ŋakiro ŋuna Ajokak ŋuna ka Apukan ka Akuj tari lotaunio ŋuluce daŋ; anerae erae ŋun ekeyakuunitere ayoŋ.”

44Kitatamenenee iŋes alosinagogae a ŋulu ka akwap a ŋin.

Currently Selected:

Luk. 4: NIB2008

Highlight

Copy