Luk. 5

Tonyarau Yesu ŋikasyomak ŋulu esyaunak

(Mat. 4:18-22; Mar. 1:16-20)

1Apeikoloŋit ewuoi Yesu alokipetot a ŋolo ka anam a Genesaret, todiŋun ŋituŋa neni keŋ ecamito akiirar ŋakiro ŋuna ka Akuj. 2Kiŋolik iŋes ŋatakerin ŋaarei eya lokipetot ŋolo ka anam, aya ŋikekamak ŋikolya kiŋa kec, alokete ŋatibae kec. 3Todoka Yesu nataker apei ŋina arae ŋina a Simoni, tolimok iŋes tema, “Kisiyoto iwadio alokipetot.” Kiboikin nai Yesu nataker, kitatam ŋituŋa eyakasi lokipetot.

4Ani kirikak Yesu akitatam, tolimok iŋes Simoni tema, “Kisiyoto ataker nenicukul, tolokak ŋatibae kus nanam, kikamuniata ŋikolya.”

5Tolimok Simoni iŋes tema, “Eketataman, ikitiya isua akuwar kya, nai emam ibore ikikam ipei daŋ. Ani bo ca tokona kilimunit iyoŋ ikoŋina, acakakini ayoŋ ŋatibae nanam.” 6Tocakakis ikes ŋatibae, ido kikamut ŋikolya ŋulu alalak nooi, ŋulu adikino eŋedeŋedaarete ŋatibae kec. 7Toketut ikes ŋikecerukitos ŋulu anataker a ŋinace aponare akiŋarakin ikes. Potu nai ikes kilelebikis ŋikolya natakerin ŋunaarei ŋun, todikino esiporete. 8Ani iŋolikini Simoni Petero ŋakiro ŋuna apotu kitiyakin, toryedik alokiŋaren Yesu tema, “Ekapolon, kiyotok aneni kaŋ, anerae arae ayoŋ ekasecan!”

9Tobul iŋes ka ŋirukitos keŋ aŋuna ka alalau a ŋikolya a ŋulu apotu ikes kikamut. 10Tobul tari Yoana ka Yakobo ŋidwe a Sebedeo ŋulu arukitotor Simoni. Tolimok Yesu Simoni tema, “Nyikibul! Ameun tokona, iruwor iyoŋ ekekaman ŋituŋa.”

11Tomiasi ikes ŋatakerin lokipetot, kimyekis nai ŋiboro daadaŋ, kiwuapakis Yesu.

Kitaŋaleu Yesu ekile ŋolo ka atapon

(Mat. 8:1-4; Mar. 1:40-45)

12Apeikoloŋit, ayai Yesu lotaun ece, ayai nen ekile ŋolo erumit atapon. Ani eanyuwari iŋes Yesu, toramakin kiŋaren nakejen keŋ, kijuuru kimaima iŋes tema, “Ekapolon, ani kicamit iyoŋ, ipedori akitaŋaleun!”

13Torwaa Yesu akan keŋ, totap iŋes tema, “Acamit; toŋaleu!” Ŋolopeikiro, todaun atapon alokile a ŋol. 14Kicik Yesu iŋes tema, “Nyilimok idiotuŋanan ŋakiro nu, nai tolot kitoodiyar neni ka esacaradoti, ikisyem iŋes iyoŋ; ido tolemu ainakinet aŋuna ka asegun kon, ikwaŋina icikakinitor Moses; ikotere toanyunia ŋinituŋanan atemar isegu iyoŋ.”

15Nai apotu ŋituŋa togeut akirworor Yesu nooi; aŋun, potu ŋasepico a ŋituŋa neni keŋ akiirar ŋakiro ka akitaŋaleuno alodekesyo kec. 16Nai tolot Yesu neni asilon akilip.

Kitaŋaleu Yesu ekile ŋolo alilimiyorito ŋakoyo ka akuwan

(Mat. 9:1-8; Mar. 2:1-12)

17Apeikoloŋit itatami Yesu, ayakasi Ŋiparisayon ka ŋiketatamak a Ŋikisila daŋ lotuŋa ŋul, ŋulu aponito alorerya a daadaŋ a ŋulu ka akwap a ŋina a Galileya, Yudaya ka Yerusalem daŋ. Ayai neni a Yesu apedor ŋina ka Akuj ŋina kitaŋaleunet. 18Kilepuleput ŋikilyok ŋice ekile ŋolo alilimiyorito ŋakoyo ka akuwan, eperi anaperyet keŋ, ecamito ayaar iŋes tooma kai akiperikin kiŋaren Yesu. 19Ikwaŋinapei alalakyata ŋituŋa, abu todaun ikes epite ŋolo yaaret iŋes tooma. Todokaryata nai ikes iŋes kidiama akai, topedo inaa, kiyooliut iŋes ka aperyet keŋ kidiŋ ŋituŋa kiŋaren Yesu. 20Ani iŋolikini Yesu anupit kec tema, “Ekile, esyoni ŋasecisya kon.”

21Apotu ŋiketatamak a Ŋikisila ka Ŋiparisayon kiŋitas make temasi, “Ŋae ŋini iyanyi Akuj ikona en? Emam ituŋanan ŋini epedori akisyon ŋasecisya, mati Akuj bon!”

22Ikwaŋina ayenia Yesu ŋuna atamete ikes, tolimok ikes tema, “Nyo itamyata iyes ŋakiro ŋuna ikote ŋun alotai kus? 23Nyo epatana nooi, alimokin ekaŋwalan atemar, ‘Esyoni ŋasecisya kon,’ kori atemar, ‘Tonyou, torotok’? 24Nai acamit ayoŋ iyes toyenut atemar, eyakar Lokoku a Ituŋanan apedor ŋinakisyoniyet ŋasecisya anakwap.” Tolimok iŋes ekaŋwalan tema, “Akalimokini ayoŋ iyoŋ atemar, tonyou, tolema akoniperyet, tolot lore!”

25Tokuraun iŋes atipei alokiŋaren kec, tolema akeeperyet, tolot lore ipuro Akuj. 26Totaaŋaŋa ŋituŋa daadaŋ nooi! Kitopoloosi Akuj temasi alokabule kec, “Okoe! Ikiŋolik nakoloŋit na ŋakiro ŋakapolok!”

Tonyarau Yesu Lepi

(Mat. 9:9-13; Mar. 2:13-17)

27Kedaun ŋakiro ŋun, tolot Yesu kiŋa, toanyuwa ekeriran ocur ŋolo anyaritae Lepi, iboi anapis a ŋina etacere ocur. Tolimok Yesu iŋes tema, “Kiwuapakinae ayoŋ.” 28Tonyou nai Lepi, toesik ibore daadaŋ, kiwuapak iŋes.

29Kitiya Lepi ŋasuban alokai keŋ aŋuna a Yesu; aya nen ŋikerirak ocur ŋulu alalak ka ŋituŋa ŋuluce daŋ. 30Tosodo Ŋiparisayon ŋice ka ŋiketatamak a Ŋikisila ŋulu arukito ka iŋes, kiŋuruŋurakinos, kiŋita ŋikasyomak a Yesu temasi, “Nyo imujata ka imasyata iyes ka ŋikerirak ocur ta ŋikasecak?”

31Toboŋok Yesu ikes tema, “Nyiitanito ŋituŋa ŋulu eŋaleete emuron, nai ŋulu edyakasi. 32Nyabunit ayoŋ anyarare ŋulu iyookino, nai ŋikasecak, ikotere tokiwa ŋasecisya kec.”

Kiŋitae Yesu ŋuna ka akikany akimuj

(Mat. 9:14-17; Mar. 2:18-22)

33Tolimokis ikes iŋes temasi, “Ikanyeneneete ŋikasyomak a Yoana, nabo ilipete daŋ; ŋikewuapak a Ŋiparisayon daŋ ikote nenipei, nai imujete ŋikasyomak kon ka emaseneneete!”

34Toboŋok Yesu ikes tema, “Ipedorete iyes akisikany ŋituŋa ŋulu enyaraunitae lokiitanu eriŋa ikes erukito ka ekeitan a? 35Nai epote ŋirwa ŋulu edemarere ikes ekeitan. Ŋirwa ŋul, ikes nai ikanyakineta ikes.”

36Tolimok nabo Yesu ikes akitadapet na tema, “Emam ituŋanan ŋini eciluni arac alolou a ŋolokitete, todapak lolou ŋoloŋorot. Ani kitiya ituŋanan ikoŋina, ecili elou ŋolokitete, nabo emam nyikwaanikin arac keŋ ka elou ŋoloŋorot. 37Kori emam tari ituŋanan ŋini epedori atikakin ewinyiwiny lotwol ŋulu eŋorotonito. Ani ketikaki, ebwaŋabwaŋaari ewinyiwiny ŋitwol ŋul, tosodi tobukor ewinyiwiny daŋ. 38Nai etikanakinio ewinyiwiny lotwol ŋulu kitet! 39Ka daŋ emam ituŋanan ŋini iitanit ewinyiwiny kenaiki ŋagwe ŋuna adwarak, anerae etemari ebe, ‘Ejokak ŋuna adwarak.’ ”

Currently Selected:

Luk. 5: NIB2008

Highlight

Copy