Mar. 3

Kitaŋaleu Yesu ekile ŋolo amitarit akan

(Mat. 12:9-14; Luk. 6:6-11)

1Toloma nabo Yesu losinagoga, ayai nen ekile ŋolo amitarit akan. 2Tolokut ŋituŋa iŋes kepedori akitaŋaleun ekile ŋol akoloŋit ŋina a Sabato, ikotere isitakiniata iŋes. 3Tonyara Yesu ekile ŋolo amitarit akan tema, “Bua kiŋaren nege.”

4Kiŋit ŋituŋa tema, “Nyo ecamakinitae kitiyae akoloŋit ŋina a Sabato, ŋuna ajokak kori ŋuna aronok, akiteyar kori akiar?”

Kililiŋa ikes cek. 5Kitek Yesu ikes daadaŋ eŋoit, kitiilito daŋ aŋuna ka aniniku a ŋakecetameta. Tolimok nai ekaŋwalan tema, “Toriyo akonikan.” Toriyo iŋes, toŋaleu akeekan. 6Tolomasi Ŋiparisayon kiŋa, totukut kaapei ka ŋituŋa ŋulu ka atukot a ŋina ke Erode epite ŋoloaret Yesu.

Kiwuapakis ŋasepico a ŋituŋa Yesu

7Toloto Yesu ka ŋikeekasyomak nanam, kiwuapakis ŋasepico ŋuna aponito alo Galileya, alo Yudaya, 8Yerusalem, Idumea; ka anakwap a ŋina alokekwaye Yorodan ka ŋice daŋ alokidiŋ Tiro ka Sidon. Tocunun ŋituŋa ŋulu alalak neni keŋ, aŋuna sek kiiraritotor ŋuna ajokak ŋuna etiyae Yesu. 9Tolimok Yesu ŋikeekasyomak akitaapuun ataker neni keŋ, ikotere nyeridyata ŋituŋa iŋes, 10anerae abu iŋes kitaŋaleu ŋituŋa ŋulu alalak. Todiŋuna ŋulu adyakasi daŋ ecamito akitap iŋes. 11Ŋinapaki daadaŋ iŋolikiniata ŋituŋa ŋulu a ŋipyan Yesu, aramanakin ikes kiŋaren keŋ, kiworoete ebasi, “Irae iyoŋ Lokoku ka Akuj!”

12Tolimok Yesu ikes tema, “Nyikiteyan ayoŋ ŋituŋa!”

Toseu Yesu Ŋikiyakia ŋulutomon ka ŋiarei

(Mat. 10:1-4; Luk. 6:12-16)

13Todoka Yesu lomukura, tonyarau ŋituŋa ŋulu acamit iŋes, potu nai ŋul neni keŋ. 14Toseu iŋes ŋikilyok ŋitomon ka ŋiarei, tolimok ikes tema, “Akaseu ayoŋ iyes oruko ka ayoŋ toloseneneete akitatam 15ka toryamut apedor ŋina kiritanaret ŋipyan.”

16Ŋirorwa a ŋikilyok a ŋulutomon ka ŋiarei ikes luta: Simoni (ŋolo abu Yesu tolimok ecekiro Petero), 17Yakobo ka lokaato keŋ Yoana, ŋidwe a Sebedeo, ŋulu abu Yesu tolimok ekecekiro Boanerige, (iŋes atemar ŋidwe ŋulu adedeŋ ikwa agirokinet), 18Anderia, Pilipo, Batolomayo, Matayo, Tomas ka Yakobo lokoku ka Alipayo, Tadeo, Simoni ŋolo arae Eseletoit 19ka Yuda Isikariot ŋolo alukini Yesu.

Yesu ka Belesebul

(Mat. 12:22-32; Luk. 11:14-23, 12:10)

20Tolot nai Yesu lore, tocunun nabo asepic neni keŋ, todaun iŋes ka ŋikeekasyomak apaki ŋinakimujet. 21Ŋina eiraryata ŋituŋa keŋ ŋakiro ŋun, toloto arikun iŋes, anerae abasi ŋituŋa ebe ekerepik iŋes.

22Tari ŋiketatamak a Ŋikisila ŋulu apote alo Yerusalem temasi, “Eyai iŋes Belesebul ŋolo isiritanari iŋes ŋipyan, ŋolo erae daŋ ekapolon a ŋipyan.”

23Tonyarau nai Yesu ŋituŋa neni keŋ, kisirwor ikes a ŋakitadapeta tema, “Ikokini Satan iritari Satan ai? 24Akwap ŋina etyakatyakatar ŋituŋa bon, nyepedori akicat. 25Ani ketyakatyakasi ŋituŋa ŋulu ke epeikal, nyepedorete akiboi kaapei. 26Ani kelosikin Satan bon, nyepedori akicat, nai esaluni.

27“Emam ituŋanan ŋini epedori alomar kai a ituŋanan a ŋini agogoŋon ademar ŋikeeboro, mati mono keen elope a ŋiboro a ŋul; tosodi nai tolema ŋiboro alokai keŋ.

28“Akalimokini ayoŋ iyes kire atemar, isyoniyo ŋasecisya a ŋituŋa daadaŋ ka ŋiyany kec. 29Nai iŋes ŋini iyanyi Etau ŋolo Asegan, nyisyoniyo jik, anerae asec iŋes asecit ŋina nyisyoniyeneneo.” 30Alimuni Yesu ŋun, anerae abasi ŋituŋa ŋice, “Ikamunit ekipye iŋes.”

Toto a Yesu ka ŋikaitotoi a Yesu

(Mat. 12:46-50; Luk. 8:19-21)

31Potu Maria ka ŋikaitotoi a Yesu, towua alokiŋa akai, kiyakiyasi nai ituŋanan anyarare Yesu. 32Kiboiyete ŋituŋa ŋulu alalak anawae Yesu. Tolimokis ikes iŋes temasi, “Eyakasi toto kon ka ŋikaitotoi kon kiŋa ikinyarito iyoŋ.”

33Toboŋok Yesu ikes tema, “Ŋae toto kaŋ ka ataŋae ŋikaitotoi kaŋ?” 34Kitek iŋes daadaŋ ŋulu aya nawae keŋ, tolimok tema, “Kiŋolikisi, lugu ikes erae toto kaŋ ka ŋikaitotoi kaŋ! 35Aŋun, ŋini itiyae ŋuna ecamit Akuj, iŋes erae lokaato kaŋ, nakaato kaŋ ka toto kaŋ.”

Currently Selected:

Mar. 3: NIB2008

Highlight

Copy